Uppgjafa ríkisstjórn

Ríkisstjórnin, eða ríkisvinnuflokkurinn, virðist vera algerlega getulaus í öllum málum, öðrum en skattamálum, en þar eru hækkunarhugmyndirnar óþrjótandi.

Vinnuflokkurinn gat ekki staðið sameinaður að afgreiðslu tillögunnar um aðild að ESB, heldur var því máli vísað til afgreiðslu stjórnarandstöðunnar á Alþingi.

Nú gefst vinnuflokkurinn upp á ríkisfjármálunum og vísar þeim til afgreiðslu aðila vinnumarkaðarnins, eða eins og segir í fréttinni:  "Fram hafi komið á fundinum í morgun, að glíman við ríkisfjármálin væri verkefni af þeirri stærðargráðu að það ynnist ekki án aðkomu aðilavinnumarkaðarins. Sú staða setji mikla ábyrgð á hendur þessum aðilum."

Ekki er nema von að Jóhanna, ríkisverkstjóri, sé nánast í felum og Össur,grínari, á flandri um Evrópu, án þess að nokkur hafi í raun tekið eftir því, að hann hafi skroppið frá.

Viðræðum haldið áfram

Alíslensk og ótengd króna í forgjöf

Efnahagskerfið í Lettlandi er við það að hrynja, án þess að Lettneskir bankar séu að fara á hausinn, því allir helstu bankar landsins eru erlendir.  Hrun í Lettlandi getur þó hæglega dregið ýmsa erlenda banka með sér í fallinu.

Munurinn á Íslandi og Lettlandi er ekki síst sá, að Latið er bundið við Evru, en Íslendingar hafa sína krónu blessunarlega lausa við allar Evróputengingar, eða eins og segir í lok fréttarinnar:  "Segir Magnussen að veiking íslensku krónunnar hafi komið sér vel fyrir íslenska útflytjendur. Veiking latsins í Lettlandi myndi að sama skapi styrkja útflutninginn þar í landi en koma sér illa fyrir þá sem skulda í erlendum myntum, þar á meðal lettnesku bankana. Þar sé samlíkingin við Ísland síðastliðið haust."

 Til að vera ekki með óþarfa endurtekningar, vísast í þetta  blogg frá því í gær, um sama mál.

 

 

Lettland sem hið nýja Ísland

Fréttir af fiskum

Það er alveg magnað, að það skuli þykja frétt, þegar fyrsti fiskur er dreginn á land úr hverri einustu ársprænu á landinu, þar sem einhver síli þrífast á annað borð.  Við þetta fá veiðimennirnir sínar fimmtán mínútur af frægð og eru auðvitað geysilega upp með sér.

Síðan er fréttaflutningurinn stöðugur allt sumarið og allir fjölmiðlar keppast við að birta myndir af mönnum og fiskum, hringinn í kringum landið og aflatölum úr hverri á, dembt yfir landsmenn, nánast daglega. 

Skyldu svona ekkifréttir rata í fjölmiðla, annarsstaðar en á Íslandi?

Af hverju eru ekki birtar fréttir af því hve margar golfkúlur eru slegnar daglega, vikulega eða mánaðarlega á hverjum einasta golfvelli landsins?

Fyrsti laxinn úr Norðurá

Séríslenskt efnahagslögmál

Evrópski seðlabankinn ákvað í dag að halda stýrivöxtum sínum óbreyttum, þ.e. 1%, og Englandsbanki ákvað einnig að halda sínum vöxtum óbreyttum í 0,5%.  Íslenski seðlabankinn ákvað hinsvegar að lækka sína stýrivexti um heilt prósent, eða niður í 12%. 

Ekki eru allir sáttir við að Evrópski seðlabankinn hafi ekki lækkað stýrivextina nún, eða eins og segir í fréttinni:  "Hagfræðingur hjá franska bankanum Societe Generale, James Nixon að nafni, segir í samtali við Bloomberg fréttastofuna, að evrópski seðlabankinn muni að öllum líkindum ekki lækkan stýrivexti sína frekar en orðið er. Hins vegar sé ljóst að að hans mati þurfi frekari aðgerðir að koma til í þeim tilgangi að örva efnahagslífið."

Þegar Steingrímur Hermannsson var forsætisráðherra, hélt hann því fram að almenn efnahagslögmál ættu ekki við á Íslandi og þess vegna þyrfti að viðhalda gjaldeyrishöftum og millifærslusjóðum, sem rugluðu í raun allan rekstur, sérstaklega í sjávarútvegi.

Nú virðist þessi kenning Steingríms, um séríslenskt efnahagslögmál, vera lifnuð við aftur og bæði ríkisvinnuflokkurinn og seðlabankinn virðast aðhyllast þessa hagfræðikenningu.

Ríkisvinnuflokkurinn gerir ekkert í efnahagsmálunum í þeirri von að þetta "reddist einhvernveginn" eins og venjulega og seðlabankinn virðist halda að íslenskt fyrirtæki þoli tíu- til tuttugufalda stýrivexti á við bresk og bandarísk.

Spekingarnir í ríkisvinnuflokknum og seðlabankanum verða að útskýra fyrir skilningslausum almenningi, hvernig þessi séríslenska efnahagsleið á að virka.

Efnahagslífið á Íslandi örvast ekki á meðan enginn skilur hvernig þessir menn hugsa.

 

Óbreyttir vextir Evrópubankans

Írar í ólgusjó kreppunnar

Írland var á undanförnum rúmum áratug talið eitt mesta gósenland Evrópu og ESB sinnar á Íslandi bentu oft á Írland, sem hina einu sönnu fyrirmynd í efnahagsmálum, enda væru þeir með Evru.  Þegar heimskreppan skall á, varð ekki algert bankahrun á Írlandi, enda jós írska ríkisstjórnin ómældu fé inn í bankakerfið, til að halda því á floti, sumpart með lánsfé og stundum með yfirtöku.  Þar skilur aðallega á milli Íslands og Írlands, þ.e. ekki var hægt að dæla fé úr ríkissjóði í íslensku bankana, vegna hlutfallslegrar stærðar þeirra, miðað við hagkerfið í heild.

Nú berast fréttir af miklum erfiðleikum á Írlandi, eða eins og m.a. segir í fréttinni:  "Hagvöxtur á Írlandi var með því mesta sem sást í Evrópu á tímabilinu frá 1997 til 2001, eða yfir 9% að jafnaði á ári. Samdrátturinn verður hins vegar meiri á þessu ári og því næsta en víðast hvar eða í kringu 12%. Þessu spáir rannsóknarstofnun í Dublin, Social Research Institute. Gangi spá stofnunarinnar eftir verður þetta versta útkoma í nokkru inðvæddu ríki frá því í kreppuni miklu á fjórða áratug síðustu aldar."

Til þess að bregðast við kreppunni, ætla Írarnir að lækka laun opinberra starfsmanna og hækka skatta "til að koma landinu upp úr þeim öldudal sem þjóðin gengur nú í gegnum eins flestar aðrar víðast hvar um heiminn".

Annað, sem skilur Írland frá Íslandi, í þessu er að þeir ætla að forðast þann "smánarblett", sem samstarf við AGS setur á þjóðir.

Vonandi gengur þeim vel að komast út úr sínum vandamálum án AGS.

Lækka laun og hækka skatta

Menn, mýs og rottur

Í þessu bloggi í morgun var því velt upp að það væru hvorki menn eða mýs, sem réðu ferðinni í seðlabankanum, en niðurstaðan var sú, að þar væru á ferðinni rottur sem nöguðu sundur undirstöður efnahagslífsins, hratt og örugglega, enda yrði afleiðingin dýpri og langvarandi kreppa en annars hefði orðið.

Nú hefur Peningastefnunefnd seðlabankans svarað fyrir þessa nánast enga stýrivaxtalækkun, en í greinargerð hennar kemur m.a. fram að:  "Eins og fram kom í maí telur peningastefnunefndin viðeigandi að samspil efnahagsaðgerða færist í átt til aukins aðhalds í fjármálum hins opinbera og slökunar peningalegs aðhalds, að því marki sem það samrýmist gengisstöðugleika. Fyrstu aðhaldsaðgerðir í fjármálum hins opinbera hafa þegar verið samþykktar á Alþingi. Eftir því sem fleiri aðgerðir koma til framkvæmda mun peningastefnunefndin meta áhrif þeirra og afleiðingar fyrir mótun stefnunnar í peningamálum. Nefndin telur að ákvarðanir um aðhaldsaðgerðir sem koma til framkvæmda í ár og skýr skuldbinding stjórnvalda um aðhaldsaðgerðir á árunum 2010-2012 séu grundvöllur þess að endurheimta traust markaðarins og skapa þannig svigrúm til áframhaldandi slökunar peningalegs aðhalds."

Samkvæmt þessari yfirlýsingu peningastefnunefndarinnar, er rottan sem er að eyðileggja alla möguleika á stýrivaxtalækkunum sjálf ríkisstjórnin, enda gefur nefndin engin fyrirheit um frekari stýrivaxtalækkanir, fyrr en ríkisvinnuflokkurinn hættir að skemma fyrir.

Þetta er dapurleg lýsing á ríkisvinnuflokknum af hendi seðlabankans (og AGS).

Seðlabankinn einangrar sig

Lettar og Evrutengingin

ESB sinnar halda því einatt fram, að aðalávinningur Íslendinga af ESB aðild væri að þá fengjum við strax fast gengi, með tengingu krónunnar við Evruna. 

Lettar og mörg önnur Evrópuríki, sum með Evru, önnur með tengingu við Evruna, eru nú í miklum fjárhagsvandræðum vegna kreppunnar og ekki er Evrópski seðlabankinn að gera nokkurn skapaðan hlut þeim til aðstoðar.

Financial Times er með frétt af erfiðleikum Letta og fram kemur m.a:  "Segir í frétt FT að meginástæðan fyrir áhugaleysinu í útboði ríkisskuldabréfanna stafi af því að talið sé að gengi latins, gjaldmiðils Letta, sé of hátt skráð. Nefnt hefur verið að það þurfi að lækka um þriðjung. Forsætisráðherra Letta, Vladis Dombrovskis, vill ekki gera það."

Forsætisráðherra Letta vill ekki lækka gengi Latins vegna andstöðu ESB og Evrópska seðlabankans og er þessi afstaða gjörsamlega að sigla efnahag landsins í kaf, en samdráttur þjóðarframleiðslu var 18% á fyrsta ársfjórðungi og stefnir hærra eftir því sem líður á árið.  Í "verstu kreppur veraldar" á Íslandi, er áætlað að þjóðarframleiðsla dragist saman um 10% á þessu ári.  Íslands er með sína sjálfstæðu krónu, án tengingar við Evru.

Hvernig ætli standi á því að ESB löndin skuli vera að fara svona miklu verr út úr heimskreppunni heldur en Íslendingar, þar sem varð algert bankahrun?

Enginn áhugi á ríkisbréfum

Menn eða mýs í seðlabanka?

Í gær var sagt að ákvörðun seðlabankans í dag myndi opinbera hvort menn eða mýs stjórnuðu bankanum.  Nú hefur bankinn ákveðið að lækka stýrivexti aðeins um 1%, þannig að nú eru stýrivextir 12%, sem eru 10-12% hærri vextir en í nokkrum öðrum seðlabanka á vesturlöndum.

Spurningunni um menn eða mýs er fullsvarað.

Hins vegar vaknar spurning um hvort þarna séu ekki frekar rottur á ferðinni, sem eru að naga allt efnahagskerfið í sundur, hratt og örugglega, með skelfilegum afleiðingum.

Eitt er víst, að ekki gerir þessi vaxtaákvörðun neitt annað en að framlengja og dýpka kreppuna.

Vextir lækkaðir í 12%

Leikritinu lokið?

Í morgum var fullyrt á þessu bloggi að Kínverjar væru að setja upp smá leikrit, með sendiherrann sinn í aðalhlutverki, til þess eins að skyggja á heimsókn Dalai Lama til Íslands.  Hugsanlega átti leikritið líka að vera áminning til annarra, um að taka ekki of vingjarnlega á móti munknum.

Leikritinu virðist vera lokið í bili, að minnsta kosti, hvort sem annar hluti verður settur á svið síðar.

Það eina óvenjulega við þetta leikrit var það, að aðalleikarinn sást aldrei á sviðinu.

Gagnrýnendur myndu sjálfsagt segja að þessi uppsetning hafi verið óvenjuleg, en þó bráðskemmtileg.

Ekki kallaður heim

Logos og útrásarvíkingarnir

Tvær húsleitir á dag hjá Lögmannsstofunni Logos vegna rannsókna tveggja embætta á brotum tengdum viðskiptavinum stofunnar vekja upp ýmsar spurningar um þetta lögfræðifyrirtæki.  Logos hefur unnið mikið fyrir Baugsliðið í gegnum tíðina, eins og sjá má í þessari frétt frá 17/03 s.l.

Tilvitnaða fréttin hér að ofan, endar svona:  "Einn eigenda LOGOS, Erlendur Gíslason, hefur verið skipaður skiptastjóri þrotabús Baugs, en annar lögmaður tengdur LOGOS, Jakob Möller, er aðstoðarmaður við greiðslustöðvun Stoða."

Það verður að teljast með ólíkindum, að lögfræðingar frá þessari stofu skulu vera skipaðir skiptastjórar og aðstoðarmenn við greiðslustöðvun og þrotabú Baugs, þar sem eigendur og fyrirtæki Baugs sæta rannsóknum fyrir stórkostleg efnahagsbrot.  Logos starfaði fyrir Baug, árum saman, og hefur vafalaust aðstoðað fyrirtækjasamsteypuna við að koma fjármálagerningum sínum í sannfærandi umbúðir, sem alls óvíst er að standist skoðun rannsakenda efnahagsbrota.

Raunar komu margir helstu lögfræðingar landsins að Baugsmáli hinu fyrra, eða fyrsta, og einhverjir þeirra gætu lent í rannsókn sjálfir vegna Baugsmála hinna síðari.

Það er a.m.k. ekki útlit fyrir atvinnuleysi hjá rannsóknaraðilium efnahagsbrota á næstu árum.

Efnahagsbrotadeild með húsleitir