Bloggfærslur mánaðarins, nóvember 2013

Þekkir Jón Gnarr ekki sitt eigið nafn?

Jón Gnarr segist vera að íhuga að flytja úr landi til þess að geta fengið að heita Jón Gnarr, en það fái hann ekki  samkvæmt íslenskum lögum.

Samkvæmt Þjóðskrá eru tveir Íslendingar sem heita þessu nafni, en skráningin er þessi: 

Niðurstaða leitar:

Kennitala         Nafn                           Heimili             Póstfang

020167-3439  Jón Gnarr Kristinsson Marargötu 4   101

310505-2850  Jón Gnarr Jónsson     Marargötu 4    101

 

Illa verður því trúað að maðurinn þekki hvorki sitt eigið nafn né sonar síns. 

Kannski átti þetta að vera sniðugt hjá honum, en fyndið er það ekki. 

 

 


mbl.is Jón Gnarr leitar nýs ríkisfangs
Tilkynna um óviðeigandi tengingu við frétt

Hræsni vegna upplýsingaleka

Trúnaðarupplýsingar um menn og málefni eiga skiljanlega ekki að liggja á glámbekk og vera á almannavitorði, hvorki upplýsingar um hælisleitendur, fórnarlömb mansals né annað sem trúnaður á að ríkja um.

Vegna þeirra upplýsinga sem "lekið" hafa um hælisleitanda sem segist eiga von á barni með konu, sem "lekinn" gefur í skyn að sé fórnarlamb mansals sem hælisleitandinn hafi verið viðriðinn, hafa margir ruðst fram á ritvöllinn og hneykslast á því að slíkar upplýsingar skuli yfirleitt komast fyrir almenningssjónir. 

Stundum er gerð krafa um opið þjóðfélag, þar sem allar upplýingar skuli vera uppi á borðum og öllum aðgengilegar til þess að almenningur geti myndað sér upplýsta skoðun á öllum málum til þess að geta tekið afstöðu til þeirra á málefnalegan og öfgalausan hátt.   Þegar upplýsingar "leka" til almennings verður hins vegar oftar en ekki uppi fótur og fit á samfélagsmiðlunum og skammast ógurlega vegna slíks upplýsingaleka.

Hallærislegast af öllu er að sjá og heyra Birgittu Jónsdóttur, þingmann Sjóræningja og fyrrverandi starfsmann Wikileaks, hneykslast upp úr skónum vegna upplýsingaleka frá opinberum aðilum, en eins og allir vita snýst starfsemi Wikileaks einmitt um að brjótast inn í opinber upplýsingakerfi og leka öllum þeim upplýsingum sem þar er unnt að komast yfir. 

Allar gerðir Birgittu á vegum Wikileaks snerust um að réttlæta upplýsingaleka til almennings og engar upplýsingar væru svo viðkvæmar að réttlætanlegt væri að leyna þeim. 


mbl.is Ekki frá embættismönnum ráðuneytisins
Tilkynna um óviðeigandi tengingu við frétt

Morð sem hafði áhrif á alla heimsbyggðina

John F. Kennedy, Bandaríkjaforseti, er öllum ógleymanlegur sem með honum fylgdist á sínum tíma, enda fylgdu honum nýjir og ferskir vindar í heimspólitíkinni og auðvitað ekki síður í stjórnmálum Bandaríkjanna.

Nánast hver einasti maður, sem kominn var til vits og ára þegar Kennedy var myrtur man nákvæmlega hvar hann var staddur þegar hann heyrði fréttirnar af atburðunum og eru ekki margar fréttirnar sem í þann flokk hafa komist, hvorki fyrr eða síðar.  

Vegna þess hvernig morðið var framið og síðan eftirmálar þess, þ.e. örlög meints morðingja, þeirra gríðarlegu þjóðfélagsbreytinga innanlands sem Kennedy stóð fyrir, Kúbudeilunni og fleiri stórræðna sem þessi ungi forseti stóð fyrir, hafa verið á lofti endalausar samsæriskenningar um aðdragandann og atburðinn sjálfan.

Líklega mun málið aldrei upplýsast á svo afgerandi hátt að samsæriskenningarnar þagni.  Minningin um John F. Kennedy munu hins vegar lifa lengi og hans minnst sem mikils og merks forseta, þrátt fyrir ýmsa breyskleika sem í ljós voru leiddir eftir dauða hans.

John F. Kennedy var stórmenni og einn merkasti forseti Bandaríkjanna, þrátt fyrir skamma forsetatíð. 


mbl.is Margir trúa enn samsæriskenningum
Tilkynna um óviðeigandi tengingu við frétt

Prófkjör í skugga skipulagsslysa

Dræm þátttaka, á mælikvarða Sjálfstæðisflokksins, í prófkjörinu fyrir borgarstjórnarkosningarnar í Reykjavík endurspeglar óænægju kjósenda flokksins með linkulega stjórnarandstöðu síðastliðin fjögur ár og að mörgum finnst hreina þjónkun við skipulagsrugl meirihluta Besta flokksins og Samfylkingarinnar, sem sífellt tekur á sig skelfilegri mynd í hugum borgarbúa.

Hvert ruglið hefur rekið annað í skipulagsmálum borgarinnar og nægir að benda á Hofsvallagötu og Borgartún sem dæmi um fáránleikann sem ríkir í hugsun umferðarmálanna, flugvallarmálið, bílastæðalausa þéttingu byggðar í miðborginni og nágrenni og fyirhugað hótel gegnt Alþingishúsinu með tilheyrandi viðbótarumferð og öryggisleysi fyrir þinghúsið og þingmenn sjálfa.

Borgarstjórnarflokki Sjálfstæðismanna tókst ekki að koma sjónarmiðum sínum nægilega vel á framfæri við borgarbúa í þeim málaflokkum sem hann var á öndverðum meiði við meirihlutann, enda hefur fólki fundist að flokkurinn hafi nánast verið teymdur á foraðið af snældurugluðum viðhorfum meirihlutans.

Með kjöri Halldórs Halldórssonar sem leiðtoga borgarstjórnarflokksins í komandi kosningum tekst vonandi að móta skarpa stefnu flokksins í borgarmálunum og sýna fram á sérstöðu hans og yfirburði yfir þann leikara- og kjánaskap sem ríkt hefur í stjórnun Reykjavíkurborgar á yfirstandandi kjörtímabili. 


mbl.is Niðurstaðan ekki bindandi
Tilkynna um óviðeigandi tengingu við frétt

Tíu ára hetja

Mörgum bregður við að horfa upp á útigangsfólk leita að mat í ruslatunnum og oft hugsar fólk sér að gera eitthvað til hjálpar en oftast verður ekkert úr framkvæmdum.

Hafdís Ýr Birkisdóttir, tíu ára gömul stúlka, lét hins vegar hendur standa fram úr ermum þegar hún sá heimilslaust fólk leita sér matar í sorpi vestur á Granda og hóf söfnun til styrktar fólkinu og gaf m.a. út matreiðslubók með uppáhaldsréttunum sínum sem styrktaraðilar fengu afhenta gegn frjálsum framlögum.

Þessi tíu ára gamla hetja afhenti mat, fatnað og hreinlætisvörur fyrir um þrjúhundruðþúsund krónur sem henni  hafði tekist að safna til handa útigangsfólkinu og segist hvergi nærri hætt, því jólin nálgast og fyrir þann tíma ætlar hún sér að ná að safna meira í sama tilgangi.

Hafdís Ýr er sannkölluð hetja og mætti verða öðru og eldra fólki hvatning til að koma góðum áætlunum í verk, en láta ekki duga að hugsa um það. 


mbl.is Sá menn leita að mat í ruslinu
Tilkynna um óviðeigandi tengingu við frétt

Er hátæknisetur gullkista eða skýjaborgir

Í dag tók fjöldi fólks skóflustungu að nýju hátæknisetri Alvogens og mun uppbygging þess taka mörg ár og kosta tugi milljarða króna, sem þegar hafa verið tryggðar samkvæmt fréttinni.  Bygging hússins mun taka tvö ár og kosta átta milljarða króna.

Gjaldeyristekjur hátæknisetursins eru sagðar munu verða 65 milljarðar á ári þegar fullum afköstum í lyfjaframleiðslunni verður náð árið 2020, þó í fréttinni sé sagt að framlög Alvogen til uppbyggingar félagsins verði sautján milljarðar króna til ársins 2023.  Ekki kemur fram hvers vegna Alvogen þarf að leggja fram fjármagn löngu eftir að fyrirtækið á að vera farið að skila fullum afköstum og 65 milljarða árstekjum í beinhörðum gjaldeyri.

Þó dæmið líti óneitanlega meira en lítið út fyrir að vera "heilmikið svona 2007" mun það vonandi ganga upp og verði svo mun þetta fyrirtæki verða eitt það stærsta og mikilvægasta í landinu þar sem þetta eina fyrirtæki myndi þá skila tæplega einum fjórða af þeim gjaldeyristekjum sem allur sjávarútvegur landsins gerir árlega, en á árinu 2012 voru útflutningstekjur sjávarútvegsins tæplega 277 milljarðar króna.

Full ástæða er til þess að senda Alvogen heillaóskir af þessu tilefni og óska verkefninu farsældar og að það verði aðstandendum og þjóðinni allri til heilla og hagsældar. 


mbl.is Búast við 65 milljörðum í gjaldeyri
Tilkynna um óviðeigandi tengingu við frétt

Njósna um allt og alla, bara til að njósna

Njósnastarfsemi bandarískra leyniþjósustustofnana og líklega miklu fleiri landa njósna um allt sem hreyfist og gefur frá sér hljóð og er til þess er beitt allri þeirri hátækni sem fyrirfinnst í heiminum um þessar mundir.

Þjóðir hafa njósnað hver um aðra öldum saman en fram til þessa hefur njósnastarfsemin aðallega snúist um hernaðarmáttinn og til hliðar hafa fyrirtæki stundað iðnaðarnjósnir, en allt bliknar þetta í samanburðinum við þær hátækninjósnir sem nú eru stundaðar með Bandaríkin í broddi fylkingar.

Getan til að njósna um allt og alla er greinilega fyrir hendi og er nýtt út í ystu æsar í nafni baráttunnar við hryðjuverkastarfsemina í heiminum og sagt að mörgu hryðjuverkinu hafi verið afstýrt með njósnastarfseminni.  Allt gott er um það að segja, væri látið nægja að berjast gegn hryðjuverkum, en erfitt er að sjá að símhleranir stjórnmálamanna og annarra ráðamanna vítt um lönd, þar á meðal vinaþjóða, geti á nokkurn hátt tengst hryðjuverkaógninni.  

Ef til vill verða uppljóstranirnar um njósnir Bandaríkjamanna til þess að nýtt "heiðursmannasamkomulag" verði gert um njósnastarfsemina og eingöngu verði í framtíðinni njósnað um óvinina en ekki vinina, enda sagði Merkel, Þýskalandskanslari, að það væri algjör óhæfa að njósna um vini sína og láta ætti duga að njósna um hina.

Kappið hefur greinilega hlaupið með njósnarana í gönur þegar njósnað er um allt og alla, eingöngu vegna þess að það er mögulegt en ekki vegna þess að sérstök þörf sé á því í varnarskyni. 


mbl.is Stundum of langt gengið
Tilkynna um óviðeigandi tengingu við frétt

Innskráning

Ath. Vinsamlegast kveikið á Javascript til að hefja innskráningu.

Hafðu samband