Banna þarf búrkur og blæjur

Trúarbrögðin skiptast í alls kyns söfnuði og iðkar hver trúboðið eftir eigin geðþótta og túlka trúarritin á svo mismunandi hátt, að varla er hægt að greina að um söfnuði af sömu trú sé að ræða.

Kóraninn segir ekkert um að konur skuli hylja andlit sín á almannafæri, en vegna karlaveldisins í múslimalöndum, hafa einhverjir á leiðinni frá Múhameð til nútímans, komið á þeirri viðbótarundirokun kvenna, að skylda þær til að ganga með andlitsblæjur eða jafnvel í búrkum sem hylja líkamann frá toppi til táar og aðeins er net í augnhæð, sem konurnar geta skoðað heiminn í gegnum.  Líklega eru þessir öfgar sprottnir af þeirri boðun Múhameðs að konur skyldu hylja hár sitt, en vegna afbrýðissemi karlanna hefur þeim dottið blæjan og búrkan í hug, sem vörn gegn því að aðrir karlmenn gætu dáðst að konum þeirra og dætrum, enda ákveða feðurnir hverjum dæturnar skuli giftar.

Belgar hafa nú bannað blæjur og búrkur á almannafæri og Frakkar eru í þann mund að fylgja því fordæmi.  Ekki er það vegna þess að svo margar múslimakonur séu neyddar til þess að bera þessa ömurlegu búninga, heldur til að hjálpa þeim að aðlagast evrópsku samfélagi, sem karlarnir vilja í mörgum tilfellum meina þeim að gera.

Áður en blæjur og búrkur fara að sjást á götum hérlendis verður Alþingi að setja lög sem banna þennan kúgunarklæðnað, enda á hérlendis að ríkja fullt jafnrétti karla og kvenna, en konur sem neyddar eru í þessa búninga verða alltaf afskiptar.

Alþingi þarf að bregðast við nú þegar og sýna fyrirhyggju, en á það hefur skort í mörgum málum.  Of seint er að byrgja brunninn, þegar barnið er dottið ofan í hann. 

Það er líka allt of vel þekkt, að of seint er að bjarga bönkum, eftir að þeir hafa verið rændir inanfrá.

Ver bann við blæjum

Hagstæðar lántökur?

Dagur B. Eggertsson, varaformaðu Samfylkingarinnar, oddviti hennar í Reykjavík og borgarstjóraefni flokksins, boðar átak í atvinnumálum í borginni, sem á að byggjast á samstarfi við ríkisstjórnina, verkalýðshreyfinguna, samtök atvinnulífsins og aðra velunnara.

Þetta er göfug stefna, sem varaformaðurinn ætti að kynna fyrir formanni Samfylkingarinnar og öðrum í ríkisstjórninni, því eins og allir vita hefur ríkisstjórnin barist með oddi og egg gegn hvers konar uppbyggingu nýtta atvinnutækifæra og beitt til þess öllum tiltækum ráðum, sem ríkisstjórn getur búið yfir.

Fjármögnun þessarar atvinnuuppbyggingar í borginni á að vera mjög auðveld, enda á hún að byggjast á lánum, eða eins og segir í stefnuskrá Samfylkingarinnar fyrir borgarstjórnarkosningarnar:  „Borgarsjóður ræður við þessar lántökur, hægt er að fá hagstæð tilboð og forða þannig algeru hruni í framkvæmda- og byggingariðnaði."

Í samtali sínu við forsætisráðherrann gæti Dagur spurst fyrir um þá margendurteknu yfirlýsingu ríkisstjórnarinnar, að hvergi sé hægt að fá lán á góðum kjörum, vegn þess að ekki sé búið að gangast undir fjárkúgun Breta og Hollendinga vegna Icesave.  Einnig hefur hann margsagt sjálfur að skuldastaða borgarinnar sé allt of mikil og vinda þyrfti ofan af henni.

Það undarlega í þessu öllu er, að sennilega trúa stuðningsmenn Samfylkingarinnar bæði formanninum og varaformanninum, þó þeir tali algerlega í sitt hvora áttina í flestum málum.

Vilja stefna að 3,5% hagvexti

Jarðarbúar varasamastir?

Stephen Hawking, breskur stjarneðlisfræðingur, varar við tilraunum til að hafa samband við lífverur á öðrum hnöttum, vegna þess að hætta gæti verið á að þær myndu nýta jörðina sem nýlendu og ræna hana öllum auðæfum.

Þetta er reyndar hugsunarháttur, sem ríkt hefur á jörðinni í árhudruð og voldug ríki stundað skefjalaust að gera önnur, sem veikari eru fyrir, en þó rík af náttúruauðlindum og vinnuafli, að nýlendum sínum og arðrænt miskunnarlaust.  Þó þetta heyri nú að sumu leyti fortíðinni til, eymir þó ennþá eftir af þessu hjá stórþjóðum og er tilraun Breta og Hollendinga til að gera Ísland að skattanýlendu sinni síðasta dæmið um nýlendukúgun.

Hawking segir m.a:  „Við þurfum ekki að líta lengra en í eigin barm til að sjá hvernig vitsmunalíf gæti þróast í eitthvað sem við viljum ekki eiga samskipti við."

Líklega svara lífverur annarra hnatta engum boðum frá jörðinni einmitt vegna óttans um að jarðarbúar myndu undiroka hnetti þeirra sem nýlendur í sína þágu.

Það væri alveg örugglega ekki ástæðulaus ótti.

Geimverur geta verið varhugaverðar

Ekkirannsókn á rannsóknarskýrslu

Háskólinn í Reykjavík hélt í dag stórmerka ráðstefnu um skýrslu Rannsóknarnefndar Alþingis og varð niðurstaða háskólamannanna að vísbendingar væri að finna í skýrslunni um refsiverða háttsemi í rekstri fjármálastofnana og tengdra aðila.

Sigurður Tómas Magnússon, prófessor við HR, var einn frummælenda á ráðstefnunni og flutti viðstöddum þessa niðurstöðu, ásamt fleiri háskólaborgurum, sem legið hafa yfir skýrslunni undanfarnar vikur.

Niðurstaðan hefði vafalaust markað mikil tímamót, hefði nefndin ekki útskýrt þetta atriði mjög skilmerkilega við kynningu á skýrslunni og gat þess um leið, að nefndin hefði sent fjölda ábendinga til Sérstaks saksóknara, vegna gruns um glæpsamleg atriði, sem nefndin hafði rekist á í rannsóknum sínum.

Sami Sigurður Tómas er einmitt ráðgjafi við embætti Sérstaks saksóknara og hefur því auðvitað vitað allt um skjalabunkann, sem rannsóknarnefndin sendi embættinu strax við birtingu skýrslunnar.

Ólafur, sérstakur saksóknari, og Eva Joly höfðu einnig fyrir löngu komið fram í fjölmiðlum og sagt skýrsluna og ábendingar nefndarinnar styrkja rannsókn þeirra mála, sem embættið hefði til rannsóknar og bætti jafnframt nokkrum í safnið.

Háskólasamfélagið sá aldrei neitt athugavert við banka- og útrásarsukkið, og telur sig nú vera að uppgötva nýjungar í skýrslu rannsóknarnefndarinnar. 

Það er sannkölluð ekkirannsókn.

 

Vísbendingar um refsiverða háttsemi

Hriktir í myntbandalaginu

Þjóðverjar eru farnir að ókyrrast verulega vegna efnahagsástandsins í mörgum löndum evrulöndum, en nú um stundir er ástandið verst í Grikklandi, en þó stefnir í afar erfiða stöðu víðar, svo sem á Spáni, Portúgal, Írlandi, að ekki sé minnst á ástandið í Eystrasaltslöndunum, sem hafa bundið gjaldmiðil sinn við evruna.

Í gær fór fram fjörug umræða hérna á blogginu um hvor yrði langlífari, evran eða krónan og má segja að brestirnir í evrusamstarfinu séu að koma upp á yfirborðið mun fyrr, en ætla hefði mátt, þó ýmsir sérfræðingar hafi alllengi spáð því að evran væri dauðadæmdur gjaldmiðill, nema með einni sameiginlegri efnahagsstjórn á allri Evrópu og að ESB verði gert að einu ríki.

Þýskaland er langsterkasta hagkerfi Evrópu og Þjóðverjar ráða því sem þeir vilja ráða innan ESB og því eru það stórtíðindi, að þeir séu búnir að fá nóg af ýmsum "bræðraþjóðum" sínum og séu á kurteislegan hátt farnir að viðra þá hugmynd að fækka "bræðraþjóðunum" innan myntsamstarfsins.

Niðurlag fréttarinnar sýnir hvern hug Þjóðverjar hafa til þessara mála, en þar segir:  "Þær raddir verða sífellt háværari í Þýskalandi, bæði á meðal stjórnarliða og stjórnarandstöðu, að Grikkir eigi að hugleiða það að segja sig úr evrópska myntsamstarfinu."

Næst má reikna með að slík "beiðni" verði harðorðari af hálfu Þjóðverja.

 

Vilja Grikki af evrusvæðinu

Grátlega sorgleg tíðindi

Þau ótrúlega sorglegu tíðindi berast nú um heimsbyggðina að Magðalena Svíaprinsessa hafi slitið trúlofun sinni og Jonasar Beregström.  

Þrátt fyrir að maður hafi ekki haft hugmynd um að þessi merka prinsessa hafi yfirleitt verið til og hvað þá að hún hafi verið trúlofuð honum Jónasi, sem enginn vissi heldur að væri til, þá snerta svona sorglegar fréttir viðkvæma strengi í meyru hjarta og tárin fara að streyma ósjálfrátt.

Undanfarið hefur maður heyrt utanaðsér að ýmis sambönd hafi slitnað á milli para hér innanlands, en ekki séð neinar fréttir af því í fjölmiðlum og hvort það sé af því að maður þekkir engar raunverulegar prinsessur, skal ósagt látið, en að minnsta kosti hefur það aldrei fangað athygli heimspressunnar. 

Það er þó mikil huggun harmi gegn á þessum erfiðu tímum að Viktoría krónprinsessa og Daníels Westling ætla að gifta sig 19. júní í sumar.

Þau gleðitíðindi gera það að verkum, að mögulegt verður að brosa gegnum tárin.

Sænsk prinsessa slítur trúlofun

Gagnaverið má ekki tefja lengur

Iðnaðarnefnd Alþingis hefur haft samningsdrög við Verne Holding til umfjöllunar síðan í desember, en fram til þessa ekki treyst sér til að afgreiða málið vegna þess að nefndin vildi sjá skýrslu rannsóknarnefndar Alþingis og umsögn hennar um Björgólf Thor Björgólfsson, áður en lengra yrði haldið með málið.

Þetta er fáránlegur dráttur á málinu, þar sem fyrir liggur að eignarhlutur Novators, félags Björgólfs, mun ekki eiga nema 5-7% hlut í gagnaverinu eftir að það verður fullfjármagnað, en 15% atvinnuleysi er nú á Suðurnesjum og verið mun væntanlega skapa um 500 störf og munar um minna á því svæði.

Nú ætlar nefndin að þvæla málinu fyrir sér áfram og veltir upp flóknum leiðum til þess að koma í veg fyrir að Novator nýtist sá hagur, sem fælist í fjármögnunarsamningnum við ríkið, en engan veginn er víst, að slíkt geti gengið upp vegna jafnræðissjónarmiða.

Einfalda leiðin, sem nefndarmenn virðast ekki koma auga á, er að setja það sem skilyrði að Novator selji sinn hlut í fyrirtækinu innan einhvers hæfilegs tíma og hverfi þannig úr hluthafahópnum, ef það skiptir þá yfirleitt nokkru máli, hvort Novator verði áfram með þennan hlut, eða ekki.

Atvinnuhagsmunir á Suðurnesjum eru mikilvægari en svo, að viðunandi sé að þingnefnd ýti málinu á undan sér mánuðum saman.

Hugmynd uppi um að Novator njóti ekki arðgreiðslna af Verne

Sætt og súrt

Frönsku landsliðsmennirnir í knattspyrnu, Franck Ribery (Bayern Munchen), Karim Benzema (Real Madrid) og Sidney Govou (Lyon) berjast væntanlega hart hver gegn öðrum þegar félagslið þeirra mætast í keppni og deila þá því eina áhugamáli að leggja andsæðinginn að velli.

Hins vegar virðast þeir vera mestu mátar utan vallar og þegar þeir taka þátt í æfingum og leikjum franska landsliðsins, en þá leggja þeir annað að velli, en andstæðinga sína.

Þá deila þeir súru og sætu og eru elskaðir heitt fyrir vikið.

„Ég elska þá alla“

Langt rútuferðalag fyrir stutt flug

Útlit er fyrir að millilandaflugið til og frá Íslandi þurfi að grípa til varaflugvallarins á Egilsstöðum, þar sem flugvellirnir í Keflavík, Reykjavík og á Akureyri verði allir lokaðir.

Það verður þreytandi ferðalag fyrir Evrópufarþega, að fara í 12 tíma rútuferðalag til Egilsstaða til þess að komast í þriggja til fjögurra tíma flugferð til meginlandsins.

Eins verður auðvitað með komufarþegana, að þurfa þessa löngu rútuferð eftir flugið, ef áfangastaðurinn er Reykjavík.

Með bið á brottfararstað og flugvelli mun Kaupmannahafnarferð taka hátt í tuttugu klukkutíma og til viðbótar við annað, er þetta líklegt til að mikið verði um afbókanir ferða til landsins á næstunni.

Kreppan náði ekki til ferðaþjónustunnar, en eldgosið gerir það svo sannarlega.

Akureyrarflugvelli líka lokað

Jafnréttisstefnan gleymdist

Vinstri grænir hafa haldið því mjög á lofti, að flokkurinn sé hornsteinn jafnréttis í landinu og hans aðall sé að gæta jafnræðis kynjanna til starfa og ábyrgðar.

Fyrir nokkrum dögum skipaði Steingrímur J., fjármálaráðherra, starfshóp með það hlutverk að endurskoða allt skattkerfið og gera tillögur til þeirra breytinga, sem falla að hugmyndum VG um skattpíningu fólks og fyrirtækja.

Nú hefur nefndin verið sett af, vegna þess að jafnréttisást VG var ekki sterkari en svo, að alveg gleymdist að gera ráð fyrir svipuðum fjölda af báðum kynjum, þegar nefndarmenn voru valdir.  Skipan nefndarmanna uppfyllti sem sagt ekki ákvæði jafnréttislaga um jöfn hlutföll kynja í nefndum, ráðum og stjórnum á vegum hins opinbera.

Jafnréttismál VG hafa gleymst, eins og flest önnur, eftir að flokkurinn komst í ríkisstjórn, t.d. eitt það meikilvægasta, sem er afstaðan til ESB. 

Ef til vill verður þetta áfall, vegna nefndarskipunarinnar, til þess að forystumenn VG fari að rifja upp stefnu eigin flokks og vinna að fleiri málum, en skattabrjálæðinu einu saman.

Skipar starfshóp að nýju