Ráðherrar með svima af stöðugum snúningi.

Vafalaust muna allir eftir hamaganginum í þinginu fyrir kosningar, þegar til umræðu var frumvarp minnihlutastjórnarinnar um stjórnlagaþing, sem átti að setja þjóðinni nýja stjórnarskrá og átti áætlaður kostnaður við það að vera tveir milljarðar króna.  Þá lagði Sjálfstæðisflokkurinn fram sáttatillögu um að stjórnlagaþingið yrði ráðgefandi fyrir Alþingi, en þá mátti minnihlutastjórnin ekki heyra á það minnst, því það væri ekki nógu lýðræðislegt.

Vegna þessarar þvermóðsku var Alþingi haldið við efnið fram á nætur, dag eftir dag, þar til vika var til kosninga og ekki vannst nokkur tími til að ræða þau mál, sem skiptu þjóðina einhverju máli, t.d. efnahagsmálin og ráðstafanir í atvinnumálum. 

Sjálfstæðismenn voru úthrópaðir af stjórnarliðum og þjóðinni fyrir málþóf og töpuðu vafalaust miklu fylgi í kosningunum vegna afstöðu sinnar í málinu og hvað þeir voru berskjaldaðir fyrir ósvífnum áróðri vegna þessa.

Nú leggur ríkisstjórnin fram nýtt frumvarp um stjórnlagaþing til samræmis við 100 daga áætlun sína og nú á stjórnlagaþingið að vera ráðgefandi fyrir Alþingi.

Ráherrana hlýtur að vera farið að svima af öllum þessum snúningum.

Stjórnlagaþing 17. júní 2010

Álfheiður alltaf rökföst

Álfheiður Ingadóttir, þingmaður vinstri grænna, segir að þjóðin hafi kosið um Icesave málið í apríl s.l., en ekki er nú víst að margir taki undir það, a.m.k. var afar lítið talað um það mál, frekar en önnur brýn mál, í kosningabaráttunni.  Þeir sem minntust eitthvað á Icesave voru vinstri grænir og þá eingöngu til að lýsa andstöðu sinni við alla samninga um málið.  Hafi einhver kosið í kosningunum á grundvelli Icesave, hefur sá hinn sami væntanlega kosið VG vegna eindreginnar andstöðu þeirra við alla nauðasamninga við Breta og Hollendinga.

Þegar Álfheiður taldi upp þau erfiðu mál, sem nú er við að eiga, sagði hún m.a:  "Þar á meðal er Icesave, þar á meðal er núna 9% atvinnuleysi, þar á meðal eru skuldaklafar heimila og fyrirtækja, 500 milljarðar í nýtt bankakerfi. Ég verð að segja að Icesave er ekki stærsta málið af þessum málum í mínum huga."

Icesave er ekki erfiðasta málið í huga stjórnarliða, enda hafa þeir ekki klárað að leysa eitt einasta af öðrum málum sem Álfheiður telur upp.  Stjórnin hefur hins vegar aukið á vanda heimilanna með skattahækkunum sem hækkað hafa neysluverðsvísitölu og þar með húsnæðislánin, krónan veikist stöðugt, þannig að erlendu lánin hækka og verðbólga lækkar ekkert.  Bankakerfið er ekki enn orðið starfhæft og Fjármálaeftirlitið hefur nú gefið stjórnvöldum lokafrest til 17. júlí til að ganga frá því máli.

Það er undarlegt hvað VG misskildi Icesave gjörsamlega fyrir kosningar, fyrst málið er svona smátt og einfalt í þeirra huga.

Þjóðin kaus um Icesave í apríl

Tinna eða Kolla

Ekki er vitað annað en Tinna Gunnlaugsdóttir hafi staðið sig vel í starfi Þjóðleikhússtjóra og verið tiltölulega óumdeild í starfi, þó reikna megi með því að einhverjir hefðu viljað að hún stjórnaði eitthvað öðruvísi en hún hefur gert.  Aldrei eru allir ánægðir með nokkurn stjórnanda og yfirleitt finnst alltaf einhver, sem telur sig vita betur en viðkomandi, eða telur að framhjá sér hafi verið gengið með eitthvað, sem hann hefur talið sig eiga rétt á.

Tinna ætti því, samkvæmt öllum sanngirnisreglum, að vera örugg um endurráðningu, en þar sem hún liggur undir grun um að vera jafnvel stuðningsmaður Sjálfstæðisflokksins, þá er mjög líklegt að núverandi menntamálaráðherra sniðgangi hana og ráði sína Kollu í starfið.

Þrjá eða fjóra mánuði tók að ráða Má Guðmundsson í starf seðlabankastjóra, til að sýna hvað ráðningarferlið væri hlutlaust og faglegt, þó allir vissu frá því að nöfn umsækjenda voru birt, að Már yrði ráðinn í embættið.

Ekki er ósennilegt að það sama verði uppi á teningnum með Kollu.

 

Tíu sóttu um starf Þjóðleikhússtjóra

Forsetinn til séstaks saksóknara

Það verður að teljast vera auðugt ímyndunarafl að láta sér detta í hug að forsetinn verði ráðinn til sérstaks saksóknara til að hafa milligöngu um yfirheyrslur yfir erlendum samstarfsmönnum íslenskra fjárglæframanna.  Margur myndi láta sér detta í hug, að forsetinn hefði sjálfur stöðu grunaðs manns í máli sjeiks Mohamed Bin Khalifa Al-Thani, eða yrði a.m.k. kallaður fyrir sérstakan saksóknara sem vitni, enda nátengdur báðum málsaðilum.

 Á þessari mynd er annar vinur sjeiksins, sem væri líklegri til að geta sett sig í samband við fjölskylduna vegna yfirheyrslnanna, enda gegnir hann, þó ótrúlegt sé, embætti utanríkisráðherra Íslands, en það er sjálfur Össur, grínari.

Hann og flokkur hans hafa haft mikil og góð samskipti við allnokkra af svokölluðum útrásarvíkingum og voru milils metin af þeim, fyrir mikla og góða hjálp, þegar vondir menn reyndu að fá þá dæmda fyrir fjárglæfra fyrir nokkrum árum.

Annars er ekki að vita, nema hann þurfi sjálfur að mæta hjá saksóknaranum, til að vitna um þessa vini sína og forsetans.

Forsetinn útilokar ekki aðstoð

Lánasöfnun

Þegar Alþjóða gjaldeyrissjóðurinn var fenginn til aðstoðar við endurreisn efnahagslífsins, var einn aðalkosturinn við það sagður, að lán þeirra og önnur tengd lán væru til þess að styrkja gjaldeyrisvarasjóðinn og þar með myndi krónan styrkjast á ný.  Styrking krónunnar átti að lækka innflutningsverð, lækka erlend lán í krónum talið og nánast eyða verðbólgu. 

Ekkert af þessum markmiðum hefur náðst, enda liggur fyrsti hluti láns AGS óhreyft í Seðlabanka Bandaríkjanna, krónan hefur haldið áfram að falla, lánin hækka, verðlag hækkar og verðbólga helst há.  Ofan á allt þetta knýr AGS seðlabankann til að halda uppi okurstýrivöxtum og af hálfu ríkisins er ekkert gert til að koma atvinnulífinu aftur á færurna, heldur þvert á móti skorið niður í öllum framkvæmdum á vegum ríkissins, en lítið sparað í rekstrinum.

Á morgun mun eiga að skrifa undir lánasamninga við norðulöndin, en þau lán eiga ekki að koma til útborgunar fyrr en við fjórðu endurskoðun AGS á framkvæmd samstarfssamningsins, en fyrsta endurskoðun hans er nú fyrirhuguð í ágúst, en átti að fara fram í febrúar s.l., samkvæmt upphaflegri áætlun.  Með sama áframhaldi mun fjórða endurskoðunin ekki fara fram fyrr en á árinu 2011, þannig að "vores nordiske venner" eru lausir allra mála þangað til, en geta hins vegar gortað af gæsku sinni við sinn minnsta bróður.

Hins vegar má velta fyrir sér, hvaða styrkur er í því að taka lán með háum vöxtum til að láta það liggja inni í banka á lágum vöxtum. 

Það virðist a.m.k. ekki slá neitt á kreppuna svona sjálfkrafa.

 

Greiðsla frá IMF í ágúst

Geta og skylda er sitthvað

Ríkisábyrgð á Icesave skuldir Landsbankans er ekki spurnig um getu ríkissjóðs til að standa undir hundruðum milljarða skuldbindingum, heldur um skyldu ríkissjóðs til að taka á sig og bera þennan kross.

Margir lögspekingar og aðrir hafa sýnt fram á að í tilskipun ESB um Tryggingasjóð innistæðueigenda er skýrt tekið fram, að slíkir tryggingasjóðir skuli fjármagnaðir af bönkunum sjálfum og að á þeim skuli ekki vera ríkisábyrgð.  Bretar og Hollendingar eru að kúga íslensku ríkisstjórnina til þess að ganga miklu lengra en tilskipunin gerir ráð fyrir og slíkar þvinganir og hótanir stærri þjóða, geta Íslendingar ekki látið yfir sig ganga.

Það er svo kapítuli út af fyrir sig, að viðskiptaráðherra þjóðarinnar skuli tala máli kúgaranna og berjast fyrir þeirra málstað, með því að kalla Íslendinga óreiðumenn, sem í engu er treystandi, eingöngu vegna þess að fólk vill réttláta málsmeðferð fyrir dómstólum.  Bretar og Hollendingar fengu það sett í samninginn, að Íslendingar afsöluðu sér öllum rétti til að reka þetta mál fyrir dómstólum og er það auðvitað gert vegna þess, að þeir vita sem er, að þeirra málstaður stæðist ekki fyrir dómi.

Ríkisábyrgðin er ekki spurning um getu, heldur um skyldu.

Getum staðið við Icesave

Falin eða týnd gögn

Steingrímur, fjármálajarðfræðingur, segir að fjölmörg gögn eigi eftir að koma fram, sem sýni að ekki hafi verið önnur leið fær, en að samþykkja ríkisábyrgð á Icesave skuldum Landsbankans.  Enginn hefur predikað meira um gegnsæi og opna stjórnsýslu en Steingrímur, fjármálajarðfræðingur, nema vera skyldi allir hinir ráðherrarnir í þessari leynilegu og lokuðu ríkisstjórn.

Vonandi hafa þessi leyniskjöl legið fyrir í morgun, þegar ríkisstjórnin samþykkti ríkisábyrgðina fyrir sitt leyti, að vísu með öllum fyrirvörum frá sumum ráðherrum Vinstri grænna.  Þetta er í annað sinn á skömmum tíma, sem ríkisstjórnin samþykkir að leggja fram frumvarp, sem engin samstaða er um innan stjórnarflokkanna og sennilega fynnst stjórninni þetta vinnulag ennþá sniðugt.

Steingrímur, fjármálajarðfræðingur, og Jóhanna, ríkisverkstjóri, kvarta mikið yfir því hvað öll mál séu erfið, sem ríkisstjórnin sé að fást við, en þau og aðrir ráðherrar geri þó það sem þeir geti.  Vandamálið er það, að blessaðir ráðherrarnir eru algerlega getulausir til þess að fást við "þessi erfiðu mál".

Það er hámark getuleysisins, að geta ekki einu sinni sýnt þau skjöl, sem menn hafa undir höndum.

Nema þau séu týnd og þess vegna eigi þau eftir að koma í ljós.

 

 

Icesave-ábyrgð úr ríkisstjórn

Skammarkrókur ESB

Slóvenía og Króatía deila um landamæri, þ.e. um smábæinn Piran og aðgang að hafinu, en Slóvenía hefur afar litla strandlengju miðað við Króatíu.  Slóvenía er í ESB og nú þrýstir bandalagið á Króatíu að semja við Slóveníu um málið og hefur hætt aðildarviðræðum við Króatíu, enda stendur ESB með því landinu, sem þegar er orðið aðili að ESB.

Íslendingar hafa haldið, að þeir geti gengið í ESB með þeim skilyrðum sem þeir myndu setja, varðandi sjávarútveg, landbúnað og aðrar auðlindir.  Þetta allt slær Krisztina Nagy, talskona Ollis Rehns, stækkunarstjóra ESB, út af borðinu, aðspurð um hvort þessar deilur breyti eitthvað stöðu Íslendinga, ef til umsóknar þeirra kæmi.

Krisztina segir, samkvæmt fréttinni:  "„Eitt af grundvallaratriðunum í stækkunarstefnu ESB er að sérhver þjóð sem sækir um aðild er metin á eigin forsendum. Sá árangur sem hver þjóð nær fer eftir því hve vel henni gengur að fullnægja skilyrðum fyrir aðild,“ sagði Nagy."

Árangur þjóða við umsókn að ESB ræðst sem sagt af því hve vel þeim gengur að fullnægja skilyrðum ESB fyrir aðild.

Er ekki kominn tími til að hætta mannalátunum, því þetta sama hefur marg oft komið fram áður.

Þetta er ekkert mjög torskilið.

 

Króötum vísað í skammarkrókinn

Aldrei að víkja

Undanfarnar vikur hafa bæjarfulltrúar í Kópavogi, sérstaklega fulltrúar Samfylkingarinnar, með eindregnum stuðningi fjölmiðla og almennings, unnið að því að hrekja Gunnar Birgisson úr starfi bæjarstjóra og nú síðast úr bæjarstjórn, á meðan rannsókn fer fram á viðskiptum Lífeyrissjóðs Kópavogs við Bæjarsjóð Kópavogs.

Nú hefur komið í ljós að Flosi Eiríksson, fulltrúi Samfylkingar, og Ómar Stefánsson, fulltrúi Framsóknarflokksins, bæði í bæjarstjórn og í stjórn lífeyrissjóðsins, höfðu allar upplýsingar um að viðskipti lífeyrissjóðs og bæjarsjóðs væru umfram það, sem löglegt er.  Þetta hafa þeir báðir viðurkennt, en þykjast ekki hafa vitað allt um málið.  Sem stjórnarmönnum bar þeim að vita allt um þessi viðskipti, enda benda tölvupóstar til þess að svo hafi verið.

Það stórmerkilega er, að hvorki fjölmiðlar né almenningur krefst þess að þessir menn víki, á meðan á rannsókn málsins stendur.  Það væri alveg eðlilegt og ekki síst þar sem þeir kröfðust brottfarar Gunnars úr sínum stólum.

Flosi og samfylkingarfélagar hans kyrja núna sönginn:  Fram, fram fylking, aldrei að víkja.

Vilja ekki tjá sig um póstinn

VG að fella ríkisstjórnina?

Nú er greinilegt að það á að draga afgreiðslu ríkisábyrgðar á Icesave skuldum Landsbankans fram á haust, til þess að reyna að halda lífi í ríkisstjórninni sem lengst.  Vitað er að nokkrir þingmenn Vinstri grænna hafa lýst yfir andstöðu við málið og varla dettur nokkrum manni í hug í alvöru, að stjórnarandstaðan á þingi fari að samþykkja þessa nauðungarsamninga.

Steingrímur, fjármálajarðfræðingur, segir að ekki sé hægt að leggja málið fyrir þingið fyrr en í næstu viku, vegna þess að beðið sé frekari álita frá lögfræðingum.  Hefði ekki verið nær að fá álit færustu lögspekinga áður en skrifað var undir nauðungarplaggið og hefði ekki líka verið nær að hafa einhverja lög- og þjóðréttarfræðinga í samninganefndinni?

Einnig segir Steingrímur, að engin lán fáist erlendis frá, nema ríkisábyrgðin verði samþykkt.  Það væri varla til of mikils mælst, í nafni gagsæis og opinnar stjórnsýslu, að hann leggði spilin á borðið og skýrði fyrir þingi og þjóð, hverjir hafi hótað Íslendingum og hverju hafi verið hótað.  Þetta verður að upplýsa.

Steingrímur kórónar ruglið með því að segja að það væri ábyrgðarleysi af Sjálfstæðismönnum að fella ríkisstjórnina, með því að greiða atkvæði gegn hörmungarsamningnum.

Honum væri nær að ræða nánar við "stuðningsmenn" sína í Vinstri grænum um framtíð ríkisstjórnarinnar.

Strandi Icesave, strandar allt