Orsakast næsta kreppa af okri og græðgi?

Seljendur vöru og þjónustu til ferðamanna fara mikinn þessa dagana vegna styrkingar krónunnar og segja að með áframhaldandi styrkingar hennar verði hér efnahagslegt hrun áður en langt um líður.

Ísland er orðið eitt dýrasta land jarðarinnar fyrir ferðamenn og landsmenn finna sannarlega fyrir því hvernig allt verðlag hækkar í takt við ferðamannafjölgunina undanfarin ár.

Vöru- og þjónustusalarnir afsaka verðlagið sífellt með því að flutningskostnaður innfluttra vara sé mikill, húsnæðisverð sé hátt, vextir háir, launakostnaður mikill o.s.frv.  Í öllum samanburði við stórborgir nágrannalandanna er verðlag hér miklum mun hærra og að sjálfsögðu þarf ekki að reyna að telja fólki trú um að húsnæðisverð sé lægra þar en hér, ekki eru launin lægri þar og ekki er orkukostnaður þar minni en á Íslandi, svo nokkur dæmi séu nefnd.  

Flutningskostnaður innfluttra vara er í flestum tilfellum aðeins örlítið brot endanlegs söluverðs, þannig að ekki skýrir hann þennan verðmun nema að örlitlu leyti og varla er hver króna í viðskiptum á landinu í skuld og á hæstu hugsanlegu vöxtum.

Enginn fulltrúi þeirra sem spá því að stutt sé í næsta hrun nefnir nokkurn tíma álagningu seljendanna sjálfra og að hún gæti verið svo mikil að nálgaðist hreint okur og græðgi.  Undanfarið hefur verið bent á fjölda dæma um ótrúlegan verðmun á ýmsum vörum milli Íslands og annarra landa og hefur ekki verið hægt að skýra hann út með neinu öðru en lygilegri álagningu innlendu söluaðilanna.

Ef vilji er til þess að Ísland haldi áfram að vera ferðamannaland, jafnvel án þess að fjöldinn aukist mikið á næstu árum, verður að hætta öllu okri á vörum og þjónustu og hemja græðgina sem virðist hafa verið að grafa um sig undanfarið sem aldrei fyrr.

Bara dýrara í Genf og Monte Carlo

Sleggjudómur Kastljóss um dómara

Kastljós RÚV hefur farið mikinn að undanförnu, t.d. með aftöku eins stærsta eggjabús landsins og í framhaldinu virðist hafa átt að ganga frá nokkrum hæstaréttardómurum ærulausum og þá ekki síst forseta réttarins.

Einhver sem hlýtur að hafa hagsmuni af því að gera tortryggilega dóma vegna ýmissa mála sem tengjast Glitni og slitabúi þess virðist hafa lekið skjölum um fjármál dómaranna fyrir hrun og láta líta út fyrir að þeir væru vanhæfir til að kveða upp dóma í málum tengdum hrunverjum Glitnis.

Kastljós hefur greinilega farið fram af meira kappi en forsjá í þessu máli, enda hefur forseti Hæstaréttar lagt fram gögn sem sýna fram á að upphlaup Kastljóss vegna málsins hefur verið unnið af óvandvirkni og af hreinni æsifréttamennsku.

Eins og venjulega stendur ekkert á hörðum viðbrögðum frá dómstóli götunnar, sem umsvifalaust tekur undir falska niðurstöðu Kastljóssins og er algerlega tilbúinn til að dæma æruna af Hæstaréttardómurunum og fróðlegt verður að fylgjast með því hvort sönnunargögn um sakleysi sakborniga kemur til með að breyta þeirri niðurstöðu. 

Það er merkilegt að sjá hve auðvelt virðist vera að gera dómstóla landsins tortryggilega af þeim sem dóma hafa fengið á sig vegna ýmissa sakamála, eða einhverra huldumanna sem þeim tengjast.

Markús svarar fyrir verðbréfin

Fimm flokka stjórn væri óstarfhæf og sjö flokka stjórn algert grín

Það verður að teljast furðulegt að Katrín Jakobsdóttir skuli láta sér detta í hug að nefna "þjóðstjórn" núna í blússandi góðæri, en eina dæmið um slíka stjórn er frá því að seinni heimsstyrjöldin var yfirvofandi, sem olli ótta við þá óáran og upplausn sem slíkar hörmungar myndu valda.

Um þá "þjóðstjórn" segir Wikipedia:  "Á Íslandi hefur einu sinni verið mynduð þjóðstjórn, Þjóðstjórnin þann 17. apríl 1939, með þátttöku Framsóknarflokks, Alþýðuflokks og Sjálfstæðisflokks undir forsæti Hermanns Jónassonar. Ástæðan var yfirvofandi styrjöld í Evrópu."  Stjórnin sú var sem sagt þriggja flokka stjórn, en nú eiga sjö flokkar fulltrúa á Alþingi og auðvelt að gera sér í hugarlund að útilokað sé að þeir geti orðið sammála um hvernig eigi að stjórna í góðærinu sem nú ríkir, sem auðvitað eru þveröfugar aðstæður og voru fyrir hendi árið 1939.

Viðræður um fimm flokka stjórn sem átti að verða undir forsæti Katrínar Jakobsdóttur og Vinstri grænna rann út í sandinn vegna þess að ekki náðist samkomulag milli þeirra um grundvallarmál.  Nú vilja Píratar koma viðræðum þessara flokka á aftur undir forystu Birgittu Jónsdóttur, sem hlýtur þá að vera hugsuð sem forsætisráðherra í slíkri ríkisstjórn.

Ekki þarf að velkjast í nokkrum vafa um að slík fimm flokka stjórn gæti aldrei orðið langlíf, hvort sem hún yrði undir fosæti VG eða Pírata, enda engar líkur á að samstaða yrði mikil milli þessa fjölflokka stjórarviðundurs og hvað þá að það myndi endast heilt kjörtímabil.

Eina leiðin til að mynda starfhæfa ríkisstjórn í landinu við núverandi skipan á þingi er að Sjálfstæðisflokkur, VG og Björt framtíð komi sér saman um helstu mál sem brýnt er að afgreiða og komi einhver brestur í samstarfið á kjörtímabilinu, yrði umsvifalaust boðað til kosninga í von um skarpari skilaboð kjósenda um ríkisstjórnarmyndun.

Til þess að svo geti orðið þarf Björt framtíð að ákveða hvort hún er raunverulegur stjórnmálaflokkur eða peð í pólitísku tafli Heiðu Helgadóttur, sem virðist stjórna bæði Bjartri framtíð og Viðreisn bak við tjöldin.

Hugsanlega þörf á þjóðstjórn

"Snjallt útspil" eða örvænting?

Baldur Þórhallsson, prófessor í stjórnmálafræði, er venjulega ekki spar á yfirlýsingar varðandi stjórnmálin og fer aldrei í launkofa með vonir sínar og þrár um velferð vinstri flokkanna á Alþingi.

Nú segir hann að það sé snjallt útspil af forsetanum að veita engum sérstökum formlegt umboð til ríkisstjórnarmyndunar, eftir að tvær tilraunir til stjórnarmyndunar hafa runnið út í sandinn á undanförnum mánuði.

Það er hins vegar spurning hversu snjallt þetta er hjá forsetanum og jafnvel líklegra að örvænting ráði för, enda ekkert sem bendir til þess að samkomulag um ríkisstjórnarmyndun sé innan seilingar alveg á næstunni.

Engin starfshæf ríkisstjórn verður mynduð í landinu án Sjálfstæðisflokksins og án þess að VG sé yfirleitt góður kostur til ríkisstjórnarmyndunar er útlit fyrir að ekki verði hjá því komist að þessir tveir flokkar komi sér saman um samstarf að þessu sinni og þá með aðkomu Bjartrar framtíðar.  Til þess að svo geti orðið verður  BF að slíta sig frá þeim dularfullu fjötrum sem flokkurinn hefur flækt sig í með Viðreisnarklofningnum.

Trúlega mun það dragast í einhverjar vikur að meirihlutastjórn verði mynduð og á meðan mun minnihlutastjórn Framsóknar og Sjálfstæðisflokks væntanlega sitja og mun fljótlega kalla saman þing og leggja fram fjárlög, eins og lög gera ráð fyrir.

Afgreiðsla fjárlagafrumvarpsins gæti leitt til meirihlutamyndunar sem tæki svo í framhaldi við völdunum af minnihlutastjórninni.

„Snjallt útspil hjá forsetanum“

Bjarni og Katrín hljóta að enda saman í ríkisstjórn

Eins og búast mátti við sleit Bjarni Benediktsson stjórnarmyndunarviðræðum Sjálfstæðisflokks, Viðreisnar og Bjartrar framtíðar í dag, enda aldrei grundvöllur fyrir slíka stjórn.  

Augljósasta ástæðan er auðvitað að slík ríkisstjórn hefði aðeins haft eins manns meirihluta á þingi og það er algerlega óásættanleg aðstaða fyrir þriggja flokka stjórn ólíkra flokka með ólíkar stefnuskrár og áherslur í flestum mikilvægum málum.

Líklega felur forsetinn Katrínu Jakobsdóttur næst að reyna stjórnarmyndun, en engum heilvita manni getur dottið í hug að raunhæft sé að mynda ríkisstjórn, sem ætti líf sitt undir fimm smáflokkum með fjöldann allan af "villiköttum" innanborðs.  Ekki má heldur gleyma því að allt sem slíkri ríkisstjórn dytti í hug að leggja fyrir Alþingi þyrfti að fara í gegn um tölvuspjallkerfi Pírata sem bæði er seinvirkt og óútreiknanlegt um niðurstöður.

Eina raunhæfa leiðin til að mynda sæmilega starfhæfa ríkisstjórn í landinu er að Sjálfstæðisflokkur, Vinstri grænir og Björt framtíð brjóti odd af oflæti sínu og komist að viðunandi stjórnarsáttmála sem dygði til að hægt yrði að stjórna með sæmilegum friði í landinu á næstu árum, eða a.m.k. fram á vorið.

Lítill tími er til stefnu til að koma slíkri ríkisstjórn á koppinn því fjárlög verður að leggja fyrir þingið og samþykkja fyrir áramót ásamt fleiri stórum málum eins og samræmingu lífeyrisréttinda, sem ku vera grundvallarmál ef ekki á allt að sjóða upp úr á vinnumarkaði með vorinu.

Vonandi eyðir Katrín ekki löngum tíma í drauminn um fimm flokka vinstri stjórn, enda óraunhæf hugmynd og þjóðarhagur og lífskjör þjóðarinnar eiga ekki að vera lögð undir í pólitískum hráskinnaleik.

Katrín og Bjarni ræddu saman

Góð frétt sem fellur í skuggann af pólitíkinni

Fréttamiðlar eru uppfullir af frásögnum af kosningaúrslitum og ber auðvitað hæst niðurstaða forsetakosninganna í Bandaríkjunum og hvernig í ósköpunum stóð á því að ekki skyldi nógu stór hluti kjósenda taka mark á skoðanakönnunum og greiða atkvæði samkvæmt þeim.

Til viðbótar umfjöllunum um Trump og ótrúlegan kosningasigur hans eru innlendir miðlar uppteknir af tilraunum til stjórnarmyndunar og hvort mögulegt sé að einhver geti unnið með öðrum og hverjir það ættu þá að vera.  Ekki er víst að niðurstaða fáist í þau mál fyrr en að mörgum vikum liðnum, ef marka má þær yfirlýsingar sem stjórnmálamennirnir keppast um að senda frá sér um aðra flokka en sína eigin.

Í öllu þessu stjórnmálafári liggur við að fréttir af miklu merkilegri málum en hver gegnir hvaða embætti næstu árin falli í skuggann og vekji litla sem enga athygli.  Dæmi um slík stórtíðindi er viðhangandi frétt um að tekist hafi að endurvekja hreyfingu í útlimum lamaðra apa með rafrænum boðum frá heila með ígræddum tölvukubbi.

Takist að þróa þessa tækni svo hún verði nothæf í fólki er hér um stórkostleg tíðindi að ræða fyrir alla sem við lömun og taugaskaða hafa þurft að glíma, eða eins og segir í lok fréttarinnar:  "„Núna get ég í fyrsta sinn ímyndað mér að lamaður sjúk­ling­ur geti hreyft fót­legg­ina sína í gegn­um þetta sam­spil heil­ans og mæn­unn­ar,“ sagði Jocelyne Bloch, tauga­sk­urðlækn­ir við há­skól­ann í Laus­anne."

Lamaðir apar gátu hreyft sig á ný

Ótrúlegur kosningasigur Trumps

Sá sem hér skrifar hefði ekki kosið Trump hefði hann haft rétt til að taka þátt í forsetakosningunum í Bandaríkjunum og átti alls ekki von á því að hann myndi standa þar uppi sem sigurvegari, enda bentu skoðanakannanir til þess að hann ætti litla von í þeirri baráttu og tap hans yrði afgerandi.

Framkoma hans og ýmsar yfirlýsingar í kosningabaráttunni gengu gjörsamlega fram af fólki og lýstu þær margar ruddaskap í garð kvenna, ólöglegra innflytjenda, ýmissa trúarhópa og ekki síst "kerfisins", sem hann lagði mikla áherslu á að hefði brugðist verkafólki í iðnaði með auknu atvinnuleysi og fjárhagsvandræðum.  Ekki síður hefði staða millistéttarinnar í landinu versnað undanfarin ár og lofaði Trump nánast byltingu í opinberri stjórnsýslu til að endurreisa landið og gera það sterkt á nýjan leik.

Allir helstu skemmtikraftar Bandaríkjanna tóku stöðu með Hillary Clinton og komu fram á kosningafundum henni til stuðnings, helstu spallþáttastjórnendur í sjónvarpi börðust gegn Trump og spöruðu ekki stóryrðin og virtust þeir keppa um hver gæti verið andstyggilegastur í háðinu og svívirðingunum um persónu hans og allt sem honum viðkom.

Ennfremur sneru flestir framámenn í Rebúblikanaflokknum við honum baki og neituðu að styðja hann og var jafnvel sagt að fyrrverandi forsetar flokksins hefðu kosið Hillary eða skilað auðu.  Trump rak örsmáa kosningamaskínu í samanburði við Hillary, sem hafði yfir að ráða gríðarlegu kosningabatteríi og eyddi tugum milljónum dollara meira í sína baráttu en Trump gerði.

Að teknu tilliti til alls þess sem á gekk í þessari löngu og miskunnarlausu kosningabaráttu verður ekki annað sagt en að Donald Trump hafi unnið ótrúlegan kosningasigur og svo verður fróðlegt að fylgjast með því í framhaldinu hvernig forseti þessi kjafthákur verður á komandi árum.

 

42% kvenna kusu Trump

"Björt viðreisn" segir sjóræningjadrottningin

Birgitta Jónsdóttir, sjóræningjadrottning, lét athyglisverð ummæli falla eftir fund með Bjarna Benediktssyni, en fundurinn átti að snúast um málefni varðandi ríkisstjórnarmyndun en ku einungis hafa verið spjall um daginn og veginn.

Það sem eina sem var athyglisvert við ummæli hennar eftir fundinn var þetta:  "Þetta kem­ur mér alls ekki á óvart, ein­fald­lega vegna þess að Heiða Krist­ín [Helga­dótt­ir], sem var fram­kvæmda­stjóri Bjartr­ar framtíðar, starfar nú fyr­ir Viðreisn og það hef­ur verið tölu­verður sam­gang­ur þarna á milli."

Þessu svaraði hún þegar hún var spurð hvort ekki væri undarlegtr að þessir tveir flokkar hefðu spyrt sig algerlega saman eftir kosningar og kæmu nú fram sem einn flokkur en ekki tveir.

Óljóst er hvort Heiða Kristín (Helgadóttir) hefur einfaldlega verið send út af örkinni til þess að vinna að stofnun útibús fyrir Bjarta framtíð og útibúið sé einungis kallað Viðreisn og sá flokkur sé einfaldlega afsprengi móðurflokksins, en í felulitum.

„Er þetta Björt Viðreisn?“

ESBsinnar hætti blekkingum um "pakkaskoðun"

Áhugasamir stjórnmálamenn úr nokkrum stjórnmálaflokkum hafa lengi haldið því að þjóðinni að hægt sé að sækja um aðild að ESB eingöngu til að fá að "kíkja í pakkann" og athuga hvað í honum sé.  

Jafnvel vinstri grænir eru farnir að taka þátt í leiknum í von um að hann gæti opnað þeim leið inn í ríkisstjórn í annað sinn með með sömu blekkingunum og þeir gerðu við stofnun hinnar fyrstu "tæru vinstri stjórnar" með Samfylkingunni.

Oft hefur verið upplýst að ESB tekur ekki þátt í neinum blekkingarleik með pakka til að skoða ofaní, heldur snúist allt viðræðuferlið um hve hratt og vel innlimunarríkið taki upp lög og regluverk stórríkisins væntanlega.

Vegna áróðurs ESBsinna um "pakkaskoðunina" sendi Sr. Svavar Alferð Jónsson fyrirspurn til ESB um þessi mál og svarið var algerlega skýrt og skorinort, eins og sjá má af þessum hluta þess:  "Regl­ur Evr­ópu­sam­bands­ins sem slík­ar (einnig þekkt­ar sem acquis) eru óumsemj­an­leg­ar; þær verður að lög­leiða og inn­leiða af um­sókn­ar­rík­inu. Inn­göngu­viðræður snú­ast í raun um það að samþykkja hvenær og með hvaða hætti um­sókn­ar­ríkið tek­ur upp og inn­leiðir með ár­ang­urs­rík­um hætti allt reglu­verk ESB og stefn­ur. Inn­göngu­viðræður snú­ast um skil­yrði og tíma­setn­ingu upp­töku, inn­leiðing­ar og fram­kvæmd­ar gild­andi laga og reglna ESB."

Hvenær skyldu innlimunarsinnarnir fara að ræða málið út frá staðreyndum og sleppa blekkingunum?

Reglur ESB „óumsemjanlegar“

Við Austurvöll - eða úti á Austurvelli?

Katrín Jakobsdóttir, formaður VG, segist tilbúin til að leiða fimm flokka ríkisstjórn, sem hún segir að sé sín óskaríkisstjórn, svo furðulega sem það hljómar.

Þriggja flokka ríkisstjórnir hafa yfirleitt ekki gefist vel hér á landi, jafnvel ekki tveggja flokka vinstristjórnir og nægir að benda á hina "einu sönnu og tæru vinstri stjórn" sem sat við völd á síðasta kjörtímabili með hörmulegum árangri.

Ýmsir vinstrisinnar eru byrjaðir að þylja áróðurinn um að allir flokkar sem fara í stjórnarsamstarf með Sjálfstæðisflokki tapi á slíkri samvinnu, en þó hafa engir flokkar beðið annað eins afhroð og Samfylkingin eftir stjórnarsamstarf við VG, sem reyndar stórtapaði líka á því samkrulli.

Ýmislegt sem öfgvavinstrið hvefur látið frá sér fara á samfélagsmiðlunum eftir kosningar benda til þess að annaðhvort verði VG í meirihlutasamstarfi innan Alþingishússins við Austurvöll, eða leyniher vinstriöfgaaflanna verði kallaður út með sína potta, pönnur, lúðra og kröfuspjöld til þess að gera hverri þeirri ríkisstjórn lífið leitt sem VG myndi ekki eiga aðild að.

Samfylkingin er ein rjúkandi rúst eftir kosningarnar og ekki er hennar tap tilkomið vegna samstjórnar með Sjálfstæðisflokknum, enda var hún í stjórnarandstöðu allt kjörtímabilið og í mikilli og góðri samvinnu við VG, Pírata og Bjarta framtíð.  

Velgengni flokka og hrun þeirra ræðst eingöngu af eigin vinnubrögðum þeirra og trúverðugleika, en ekki hvort þeir eru innan eða utan ríkisstjórnar.  Sumir þurfa bara að kenna öðrum en sjálfum sér um útkomu kosninga.

Einmitt vegna þess að ýmsir þola ekki að aðrir flokkar en þeir sjálfir styðja starfi í ríkisstjórn er nánast öruggt að leyniherinn verður ræstur út til að standa fyrir óspektum á Austurvelli verði VG utan ríkisstjórnar, sem allt bendir raunar til að verði.

Fimm flokkar fyrsti kostur