Skattgreiðendur í ábyrgð fyrir erlenda bankaeigendur

Nú hefur verið samþykkt, að erlendir kröfuhafar eignist 95% hlutafjár í Íslandsbanka og líklega munu kröfuhafar Kaupþings eignast 98% hlutafjár þess banka um mánaðamótin næstu.  Það er fagnaðarefni, að bankarnir skuli komast úr ríkiseigu með þessu móti og vonandi verður það til þess, að alvöru samkeppni skapist á bankamarkaði.

Auðvitað munu kröfueigendurnir reyna að reka þessa íslensku banka sína á þann hátt, að þeir skili eigendum sínum sem mestum hagnaði, í því skyni að vinna til baka það tjón, sem gömlu bankarnir ollu þeim, en það nemur þúsundum milljarða.  Það tap munu þeir reyna að endurheimta með hagnaði af nýju bönkunum sínum.

Auðveldasta leiðin til þess er að stofna útibú í ESB löndunum og safna þar innistæðum í svo miklum mæli, að ekki ráðist neitt við neitt og bankarnir hrynji svo að lokum, eins og fyrirrennarar þeirra gerðu síðast liðið haust.  Þá þarf bara að koma peningunum undan og láta ábyrgðina falla á íslenska skattgreiðendur, eins og ríkisstjórnin er að gera núna, vegna fyrirrennara þessara nýju einkabanka.

Með samþykkt á ríkisábyrgð fyrir skuldum einkabanka, í þessu tilfelli Icesave skuldum Landsbankans, er verið að setja fordæmi til framtíðar og íslenskir skattgreiðendur geta aldrei aftur um frjálst höfuð strokið vegna yfirvofandi nýrrar bankakreppu. 

Skyldi ríkisstjórnin ekki gera sér grein fyrir því, hvaða fordæmi hún er að setja? 

Íslandsbanki í erlendar hendur

Hagar er orðið síbrotafélag

Áfrýjunarnefnd samkeppnismála hefur staðfest úrskurð Samkeppniseftirlitsins um að Hagar skuli greiða 15 milljóna króna sekt, vegna brota á samkeppnislögum.  Brotið fólst í því, að Hagar ætluðu að ná undir sig þrotabúi BT verslananna fyrir lítið sem ekkert verð og sameinaði fyrirtækið Högum, án þess að tilkynna það og sækja um leyfi fyrir samrunanum til Samkeppniseftirlitsins.  Skömmu síðar var samruninn dæmdur ólöglegur af samkeppnisástæðum og þá hættu Hagar við kaupin á BT, enda ekki eins gróðavænlegt að halda þeim rekstri aðskildum frá drottnunarfélaginu Högum.

Þetta er ekki í fyrsta skipti, sem Hagar fá dóm fyrir brot á samkeppnislögum og er þess skemmst að minnast að félagið fékk 315 milljóna króna sekt á árinu 2008 fyrir að misnota markaðráðandi stöðu sína í tilraun til að brjóta Krónuna á bak aftur, enda hafa Bónusfeðgar aldrei þolað neina samkeppni og hafa yfirleitt komist upp með að drepa af sér alla samkeppnisaðila með bellibrögðum.

Á máli lögfræðinnar myndi þetta kallast staðfastur brotavilji.

Þegar sýndur er staðfastur brotavilji, ætti það að kalla á hörð varnarviðbrögð.

Uppskipti á Högum er eina leiðin til að koma á eðlilegri samkeppni á smásölumarkaði.

Hagar og Sena brutu samkeppnislög

Töf rannsóknarskýrslu afsakanleg

Töf á skilum skýrslu Rannsóknarnefndar Alþingis er skiljanleg í ljósi þess, sem fram kom á fundi nefndarinnar í dag, en þar fór nefndin yfir starf sitt og þar kom m.a. fram að rætt hefði verið við yfir 300 manns og formlegar skýrslur af meira en 100 einstaklingum og enn á eftir að ræða við fleiri.

Allir geta séð, að það er óhemju mikil vinna, að koma saman skýrslu um þetta yfirgripsmikla mál, þannig að allur sannleikur komi í ljós og unnt verði að meta ábyrgð hvers og eins, þeirra sem tengjast bankahruninu á einhvern hátt.  Treysta verður því, að lagt verði mat á hvaða áhrif hver hafði á atburðarásina, svo sem ríkisstjórn, seðlabanki, bankaráð, bankastjórar og eigendur bankanna, svo einhverjir séu nefndir.

Margir hafa talið, að nefndin ætti að minnsta kosti að skila áfangaskýrslu þann 1. nóvember, en nefndin svarar því á eftirfarandi hátt:  "Meðal þess sem var skoðað var að skila bráðabirgðaskýrslu 1. nóvember en það var blásið af, m.a. vegna þess hversu tengd málin eru og sömu leikendur í þeim flestum."

Þetta er rökrétt afstaða nefndarinnar, í því ljósi, að sumar niðurstöður nefndarinnar fara væntanlega í frekari rannsókn hjá Fjármálaeftirlitinu og/eða Sérstökum saksóknara.

Betra er að sýna örlitla þolinmæði, en að eitthvað verði órannsakað, eða illa skoðað.

Rætt við yfir 300 manns

Rannsóknarskýrslan verði öllum aðgengileg

Störf Rannsóknarsnefndar Alþingis hafa reynst mun umfangsmeiri, en í fyrstu var talið og því þarf að framlengja frest hennar til að skila skýrslu sinni til 1. febrúar 2010.  Þetta hlýtur að benda til þess að enginn asi sé á störfum nefndarinnar og vandað sé til verka og er það auðvitað vel og þess virði að bíða þrem mánuðum lengur en áætlað var.

Samþykkja þarf ný lög um nefndina, til þess að unnt sé að framlengja störf hennar og mun það í undirbúningi hjá Alþingi, en það vekur athygli, að þingið skuli þurfa að skipa sérstaka þingmannanefnd, til þess að komast að niðurstöðu um hvernig Alþingi skuli fjalla um skýrsluna, þegar þar að kemur.

Af því tilefni er haft eftir forseta þingsins:  "Ásta Ragnheiður sagði, að á vettvangi forsætisnefndar og formanna þingflokkanna hefði verið fjallað um hvernig standa á að þinglegri meðferð á skýrslu rannsóknarnefndarinnar. Samstaða sé um mikilvægi þess að sá farvegur verði markaður fyrir fram áður en skýrslan verður gerð opinber."

Ekki þarf síður að marka stefnu um hvernig skýrslan verður birt almenningi, því ekki verður þolað að skýrslan í heild, eða hlutar hennar verði meðhöndluð sem leyniplagg, sem ekki megi gera opinbert.

Skýlaus krafa er að hvert einasta atriði, sem nefndin verður áskynja um, verði opinberað.

Um annað verður enginn friður í þjóðfélaginu.

Rannsóknarskýrslu seinkar

Bónus gefur engum neitt

Það hefur verið vitað í a.m.k. fimmtán ár, að vegna kúgunar Bónuss á birgjum, hefur vöruverð hækkað óeðlilega mikið í landinu.  Stafar þetta af því, að Bónus gerir þá kröfu til birgja að fá vörur til sín á að minnsta kosti 20 - 25% lægra verði en aðrar verslanir og til að mæta því, hækka birgjarnir vöruverð til allra annarra sem því nemur.  Þar sem Bónusveldið hefur 50 - 60% markaðshlutdeild á matvörumarkaði, þarf að hækka vöruverðið til allra hinna, svo hægt sé að standa undir afsláttunum til Bónuss.

Bónus líður engum að selja vörur á lægra verði og því hamlar þetta allri samkeppni, þar sem aðrir kaupmenn þurfa sína álagningu til þess að standa undir rekstri og Bónus getur alltaf verið lægri, án þess að slá af sinni álagningu.  Fólk heldur að Bónus stuðli að lægra vöruverði með lágri álagningu, en það er alger misskilningur, þar sem verslunin gefur ekki eftir eina krónu af sinni álagningu, heldur nær niður verði til sín, með því að pína birgjana til að hækka það til annarra.

Þetta er Jón Gerald Sullenberger að upplifa núna og er að komast að því að Bónusveldið heldur öllu varðandi verslun og viðskipti á smásölumarkaði í heljargreipum.  Margir birgjar hafa farið flatt á því að lenda upp á kant við þá háu herra, sem stjórna Bónusveldinu.

Þessu verður að breyta og það verður ekki gert, nema með því að jafna samkeppnismöguleikana, t.d. með banni á verðmismunun birgja til verslana.

Alvarlegt fyrir nýsköpun

Stórglæparannsókn á útrásarfyrirtæki

Fyrrum stjórnendur eins af þeim fyrirtækjum sem kom við sögu á útrásarglæpaárunum eru nú til rannsóknar hjá öllum helstu glæparannsóknastofnunum Bretlands, þar á meðal hjá Soca, sem venjulega rannsakar alvarlega skipulagða glæpastarfsemi, svo sem fíkniefnasmygl eða peningaþvætti. 

Áður hafði komið fram að breska samkeppniseftirlitið og efnahagsbrotadeild bresku lögreglunnar, Serious Fraud Office, (SFO) væru að rannsaka hvort fyrirtækin JJB og Sports Direct hefðu átt með sér ólöglegt verðsamráð. 

Þetta vekur upp spurningar um, hvort ekki sé verið að rannsaka svipaða hluti hjá fleiri fyrirtækjum og stjórnendum, sem komu við sögu í öðrum raðskuldafyrirtækjum, sem útrásarmógúlar yfirtóku og flæktu í raðskuldavefi sína á liðnum árum.

JJB Sports í rannsókn

Stórtíðindi: Bretar og Hollendingar ráða afgreiðslu AGS

Steingrímur J., fjármálajarðfræðingur, segist vonast eftir svari frá Bretum og Hollendingum í dag vegna síðustu grátbeiðnar sinnar um örlítið minni höggþunga gaddasvipunnar, svo hann geti skriðið með blóðugan afturendann inn á Alþingi, til að þvinga þar í gegn þær kröfur sem húsbændur hans, þrælahaldararnir í London og Amsterdam, gera í Icesave málinu.

Merkustu tíðindin í langan tíma koma fram í efirfarandi yfirlýsingu Steingríms J., en hún hljóðar svona:  „Það verða breytingar sem leiða af efnahagslegu fyrirvörunum sem alþingi setti. Og hvernig gengið verður frá þeim og greiðslutryggingum í samræmi við þá. Það eru lagaleg atriði sem hafa staðið í mönnum. Þættir er eins og hvernig verði háttað samskiptum aðila í framhaldinu, viðræður og annað slíkt. Og svo náttúrulega vita allir að endurskoðun okkar mála hjá Alþjóðagjaldeyrissjóðnum hafa verið þarna uppi á borðum líka.“

Þar með viðurkennir fjármálajarðfræðingurinn, að endurskoðun efnahagsáætlunar Íslands og AGS, sé hluti af Icesave viðræðunum við Breta og Hollendinga.  Þetta hefur aldrei komið fram áður, þ.e. að endurskoðunin skuli beinlínis vera hluti af samningum um Icesave skuldir Landsbankans, sem var einkabanki og á ekki að koma ríkissjóði, eða íslenskum skattgreiðendum neitt við.

Heimspressan hlýtur að taka eftir þessum ummælum fjármálajarðfræðingsins, því þetta er í fyrsta skipti, sem fram kemur hvernir stjórna AGS beint og óbeint, til að kúga þjóðir, sem þrælaherrunum eru ekki þóknanlegar.

 

Málin að komast á lokastig

Landsbankann til almennings

Loksins er farið að sjá fyrir endann á endurskipulagningu nýju bankanna og vonandi munu kröfuhafar yfirtaka Nýja Kaupþing og Íslandsbanka, en ríkið mun koma til með að eiga um 80% hlutafjár í NBI hf.  Uppgjör vegna NBI hf. byggist á fjárframlagi frá ríkinu og síðan gefur NBI hf. út risastórt gengistryggt skuldabréf, til tíu ára, til Landsbankans, sem bankinn getur svo notað til að greiða upp í Icesave skuld sína.

Með þannig reikningskúnstum er hægt að láta líta út fyrir að "aðeins" 75 milljarðar, að viðbættum 250 milljörðum króna í vexti, muni lenda á skattgreiðendum hér á landi.  Þessi viðmiðun verður svo notuð til að knýja nýtt Icesave frumvarp í gegn um Alþingi og vegna tímaskorts mun það verða keyrt í gegn á mettíma, eftir næturfundi.

Þar sem búið er að gefa lánadrottnum Gamla Kaupþings og Glitnis færi á að hirða Kaupþing og Íslandsbanka upp í kröfur sínar, er ekki nema sanngjarnt að Íslendingar fái NBI hf. upp í þær greiðslur, sem þeir verða píndir til að borga í Icesaveruglinu með sköttum sínum á næstu áratugum.

Ríkið á að skipta hlutafé NBI hf. á milli allra íslenskra skattgreiðenda, í hlutfalli við skattgreiðslur þeirra á næstu þrem árum og einkavæða bankann með því móti.

Það gæti sætt skattgreiðendur betur við þrældóminn vegna Icesave.

Gylfi: Ánægja með lausn

Að slátra mjólkurkúnni

Ríkisstjórnin hækkaði skatta á eldsneyti, áfengi og tóbaki í sumar, ásamt því að leggja á nýjan "sykurskatt", sem að vísu leggst á margt annað en sykraðar vörur.  Afleiðingar þessara skattahækkana eru aukin verðbólga, með hækkun húsnæðislána, en að sjálfsögðu verður þessi skattpíning til þess að draga úr sölu á þessum vörum og minnka kaupmátt almennings.

Rannsóknarsetur verslunarinnar hefur birt samantekt á breytingu verðlags, ásamt breytingu á sölu ýmissa vöruflokka og endar skýrslan á þessum orðum:  „Ekki þarf að fjölyrða um ástæður samdráttar í einkaneyslu og um leið veltu verslunar. En samkvæmt upplýsingum Hagstofunnar var kaupmáttur launa 7,8% minni í ágúst síðastliðnum miðað við sama mánuð í fyrra. Þar kemur einnig fram að innlend greiðslukortavelta hafi dregist saman um 17,9% að raunvirði í janúar til ágúst á þessu ári miðað við sama tímabil í fyrra."

Til þess að drepa endanlega niður alla kaupgetu almennings, hefur ríkisstjórnin boðað nýja hækkun á eldsneytis-, áfengis- og tóbakssköttum um næstkomandi áramót, hækkun á virðisaukaskatti, hækkun tekjuskatts ásamt hækkun allra þjónustugjalda hins opinbera, sem nöfnum tjáir að nefna.

Í harðindaárum fyrri alda, hefði enginn búmaður látið sér detta í hug að slátra mjólkurkúnni.

Í þá daga var allt gert til að hlúa að þeirri kú, til þess að halda í henni lífinu og nytinni.

Sala á áfengi minnkar um 14%

Vel tímasettir útreikningar

Nýbúið er að birta skýrslur frá Fjármálaráðuneytinu sem útlista þann ömurleika, sem bíða Íslendinga ef ekki verður gengið að ýtrustu kröfum Breta og Hollendinga.  Þá mun allt nánast leggjast í rúst í landinu, atvinnuleysi rjúka upp úr öllu valdi, matsfyrirtæki munu setja landið í ruslflokk, engin lán fást frá útlöndum og sultur og seyra blasa við hverju heimili landsins.

Nú eru birtar þær stórkostlegu fréttir, að áætlað sé að 90% muni fást upp í forgangskröfur Landsbankans og þar með muni ekki nema 75 milljarðar króna falla á ríkissjóð vegna Icesave, að viðbættum smávægilegum vöxtum.  Ekkert er að vísu minnst á það smáatriði, að fram að þessu hafa allar áætlanir hljóðað upp á 600 ti 1.000 milljarða króna og ekkert útskýrt hvernig mismunurinn gufaði upp.  Það er náttúrlega bara aukaatriði.

Allir eiga að sjá það í hendi sér, að algert óráð væri að mótmæla nokkrum kröfum þrælapískaranna fyrir svona skítterí, eins og 75 milljarðar eru, með örlitlum vöxtum.  Einhvern næstu daga verður samkvæmt þessu einfalt og fljótlegt að renna í gegnum Alþingi nýjum lögum, til að tryggja velmegun þjóðarinnar til frambúðar, með staðfestingu upphaflega Svavarssamningsins.

Spunameistarar ríkisstjórnarinnar hljóta að vera ánægðir með vel unnin störf, eftir þessa fréttafléttu sína.

Þei hljóta að trúa því, að lýðurinn kokgleypi þetta alveg hrátt.

90% upp í forgangskröfur