Ekki er neitt AGS að þakka, að minnsta kosti

Nýlega stormaði heil sendinefnd undir forystu Steingríms J. til New York á fund forstjóra AGS og kom sigri hrósandi til baka, eftir að hafa tekið Landshöfðingjann í bóndabeygju og tilkynnti þjóðinni, að nú væri búið að koma öllum málum vegna samvinnunnar við AGS í lag og önnur endurskoðun efnahagsáætlunar Íslands og AGS færi fram strax eftir Páska, og alveg örugglega í aprílmánuði.

Þessi stórsigur Steingríms J. og félaga í New York vannst, að hanns sögn, þrátt fyrir að ekki væri búið að gangast undir fjárkúgun Breta og Hollendinga vegna Icesave, enda væri það mál nánast frágengið, eftir leynifundi með fulltrúum kúgaranna.

Nú er Gylfi Magnússon, lausráðinn starfsmaður í Viðskiptaráðuneytinu, staddur í New York og mun erindið vera að ræða við Landshöfðingjann um endurskoðun efnahagsáætlunarinnnar, því Steingrímur J. og föruneyti skildi víst ekki tungumál Landshöfðingjans, því ekki mun hann hafa nein áform uppi, um að endurskoða þessa áætlun, eða skoða yfirleitt nokkurn hlut, sem snertir Ísland.

Gylfi "staðfesti" það við fréttamenn í stórborginni, að Icesave deilan væri nánast leyst, enda hefðu menn nánast verið komnir með samning í febrúarlok, en þjóðin eyðilagt málið í atkvæðagreiðslu.  Síðan segir:  "Þá sagðist hann einnig vonast til að efnahagsáætlun Íslands hjá Alþjóðagjaldeyrissjóðnum fari af stað aftur á þessu ári." 

Eins og venjulega hafði Steingrímur J. því sagt þjóðinni ósatt, þegar hann kom úr ferðalaginu fyrir Páskana, því nú er vonast eftir að endurskoðun áætlunarinnar fari af stað á þessu ári.  Það er svolítið annað en strax eftir Páska, eða a.m.k. í aprílmánuði.

Gylfi útskýrði fyrir fréttamönnunum að við kennum vondum útlendingum ekki um neitt, en við höfum heldur ekkert til að þakka þeim fyrir.

Ekki vondum útlendingum að kenna

Hroki og flumbrugangur Álfheiðar

Álfheiður Ingadóttir er vanari að stjórna mótmælaaðgerðum en sjálfri sér og hvað þá að hún skilji opinbera stjórnsýslu, að ekki sé minnst á reiðistjórnun, því hún á vægast sagt erfitt með að hemja skap sitt, enda hrokafull með afbrigðum.

Það hlýtur að teljast óvenjulegt, að ríkisendurskoðandi skuli setja ofan í við ráðherra vegna hroka hans og yfirgangs í garð stjórnenda ríkisstofnana, ekki síst þegar ríkisforstjórinn hefur ekki annað til saka unnið, en leita ráða hjá Ríkisendurskoðun um hvernig beri að gæta þess að fara eftir illa unninni reglugerð ráðherrans, til þess að vera viss um að skilningur eftirlitsaðilans og forstjórans væri örugglega sá sami.

Annað eins stjórnsýsluklúður og Álheiður hefur sýnt í þessu máli er algerlega fáheyrt og toppar jafnvel stjórnun hennar á óeirðaseggjum Vinstri grænna úr Alþingishúninu í búsáhaldabyltingunni, en þá stýrði hún árás þeirra á sjálft þinghúsið.

Þessi ráðherranefna hefur aldrei tekist að skapa sér nokkurt traust, hvað þá virðingu, svo ekki hefur hún úr háum söðli að detta.

Ákvörðun Álfheiðar „ólíðandi“

Endalausar ofsóknir gegn blásaklausum mönnum

Skilanefnd Glitnis hefur nú höfðað skaðabótamál gegn Jóni Ásgeiri í Bónus og Pálma í Iceland Express ásamt fyrrverandi forstjóra þeirra hjá Glitni og þrem lykilstarfsmönnum hans, vegna skitinna sex milljarða króna.  Þetta skaðabótamál mun vera byggt á rannsókn Kroll, sem aðstoðað hefur við að rannsaka bókhald bankans, mánuðum saman.

Þessir sex milljarðar eru náttúrlega smáupphæð, í samanburði við þá heildarupphæð sem tapast hefur vegna viðskipta bankakerfisins við Bónusfeðga, Pálma, Bjögga, S-hópinn o.fl., og verður sjálfsagt útskýrt af þeim félögum sem ofsóknir á hendur sér, eins og öll önnur mál á hendur þeim hafa verið afgreidd af þeirra hálfu.

Jón Ásgeir hefur verið óþreytandi í útskýringum á þeim ofsóknum sem hann hefur sætt af hálfu Davíðs Oddssonar til fjölda ára og nú hafa fleiri ofsækjendur bæst í hópinn, bæði innlendir og erlendir.  Einnig hefur Pálmi í Iceland Express lýst yfir mikilli iðrum vegna gjörða sinna og reiknaði að sjálfsögðu með, að þar með yrði honum fyrirgefið.  Eins er með alla hina, þeir hafa marglýst því fyrir alþjóð, að þeir hafi eingöngu verið að stunda heiðarleg viðskipti, sem að vísu gengu ekki upp, en það var auðvitað ekki þeim að kenna, heldur vondum mönnum sem settu bankana á hausinn.

Þetta einelti gegn þessum stálheiðarlegu og grandvöru mönnum er að verða óþolandi, þ.e.a.s. að þeirra eigin áliti.

Skaðabótamál gegn Glitnis-mönnum

Góð tíðindi, en þó slæm um leið

Það eru mikil gleðitíðindi, að önnur konan sem hefur verið týnd frá því í fyrrakvöld, skuli nú vera komin í leitirnar heil á húfi, en hrakin og köld, enda fannst hún á gangi ofan við Einhyrning.  Ferðafélagar hennar eru ennþá ófundnir, en taldir vera á gangi einhversstaðar á sömu slóðum.

Án þess að allar staðreyndir séu komanar fram, virðist fólkið hafa gert þau mistök að yfirgefa bílinn og halda gangandi af stað til að finna hjálp, en það er einmitt eitt af því sem björgunarsveitirnar brýna fyrir fólki, að ef það lendi í ófæru, sem geri það að verkum að bíllinn sitji fastur, að þá skuli fólk alls ekki yfirgefa bílinn, því miklu meiri líkur séu á að bíllinn finnist, en gangandi fólk í óbyggðum.

Í þessu tilfelli gæti bílinn hafa lent í á og setið þar fastur, jafnvel sokkið, svo ekki hafi verið nokkur leið að láta fyrirberast í honum og fólkið því neyðst til að yfirgefa hann og reyna að komast til byggða gangandi, en hafi svo verið virðist fólkið ekki hafa getað náð að halda hópinn, enda var óveður á svæðinu.

Vonandi endar þessi saga vel og fólkið finnist fljótlega heilt á húfi.

Önnur konan fundin

Vegtollar eru greiddir nú þegar

Hugmynd Samgönguráðuneytisins um vegtolla sem innheimtir yrðu á leiðum inn og út úr höfuðborginni er gjörsamlega galin og bifreiðaeigendur geta ekki látið slíka gjaldheimtu yfir sig ganga og verða að mótmæla henni með öllum ráðum.

Bifreiðaeigendur greiða alls kyns skatta og vegtolla í hvert sinn sem þeir dæla eldsneyti á bíla sína og þegar þau gjöld voru lögð á, áttu þau að renna til vegamála, en nú er svo komið að líklega innan við 20% þessara gjalda renna til upphaflegra verkefna, en 80% eru tekin til annarra útgjalda ríkishítarinnar og ekki verður lengra gengið í skattheimtubrjálæðinu á notendur veganna.

Nýlega er búið að hækka bensínskattana, þannig að nú er svo komið að 105 krónur af hverjum bensínlítra rennur beint í ríkissjóð, en aðeins örlítill hluti til þjónustu við bifreiðaeigendur eins og öll upphæðin ætti að gera, samkvæmt upphaflegum tilgangi.

Þessa geggjuðu hugmynd verður að kveða niður nú þegar og aldrei sætta sig við að hún verði endurvakin.

Alfarið á móti vegtollum

Ekkifrétt um framkvæmdir Vegagerðarinnar

Í öllu deyfðar- og aðgerðarleysinu sem ríkir í þjóðfélaginu vegna getu- og verkleysis ríkisstjórnarinnar við að koma hreyfingu á efnahagslífið, birtist nú frétt frá Vegagerðinni um að minnsta kosti 29 verk, sem frestað var eftir efnahagshrunið, séu nú tilbúin til útboðs.

Reyndar er ef til vill ofsagt að getu- og verkleysi einkenni ríkisstjórnina, því hún hefur sýnt bæði mikla getu og vilja til að stöðva allar framkvæmdir, sem helst var von til að koma í framkvæmd og hefðu getað orðið mikil lyfistöng fyrir fyrirtækin á almenna markaðinum og er þar helst að nefna erlendar fjárfestingar hverskonar, sem fjárfestar væru tilbúnir til að fjármagna, ef ríkisstjórnin sýndi ekki jan einbeittan mótstöðuvilja og raun ber vitni.

Fréttin frá Vegagerðinni, sem leit vel út við fystu sýn, var að vísu með ákaflega stórum fyrirvara, en í þar segir:  "Að sögn upplýsingafulltrúa Vegagerðarinnar hefur þegar verið ráðist í nokkur verkanna en önnur bíða ákvörðunar í nýrri samgönguáætlun, sem nær til ársins 2012."

Þetta breytir málinu auðvitað algerlega, því sum verkin eru búin og önnur bíða samgönguáætlunar, sem ekki verður samþykkt fyrr en í fyrsta lagi undir lok þings í vor og þar með verður ekki ráðist í framkvæmdir vegna þeirra flestra fyrr en á árunum 2011 og 2012.

Svona ekkifréttir um það sem stjórnvöld eru að hugsa um að gera einhvern tímann í framtíðinni, bjarga engu um ástand mála akkúrat núna, en það er einmitt það, sem beðið er eftir.

Um 30 framkvæmdir bíða útboðs

Ótrúlega mikill stuðningur við ráðherrana

Samkvæmt nýrri Gallupkönnun njóta ráðherrar ríkisstjórnarinnar ótrúlega mikils stuðnings kjósenda, en 41% eru ánægðir með Steingrím J., rúmlega 27% sögðust ánægð með störf  Jóhönnu Sigurðardóttur og allt að 14% eru yfir sig ánægðir með Álfheiði Ingadóttur.

Þetta verður að teljast ótrúlega mikill stuðningur við ráðherra, sem alls ekki valda störfum sínum, en Jóhanna er líklega slakasti forsætisráðherra frá lýðveldisstofnun, Steingrímur J., skattaglaðasti lýðveldisráðherrann og sá allélegasti í samskiptum við erlenda ofsækjendur þjóðarinnar og á Álfheiði er ekki eyðandi orðum, en hún er einhvert misheppnaðasta dæmi um ráðherra, sem sögur fara af.

Miðað við getuleysi ríkisstjórnarinnar við að koma efnahagslífinu í gang aftur eftir hrunið og raunar harða baráttu hennar gegn allri atvinnuuppbyggingu í landinu og allrahelst ef hægt væri að fá inn í landið erlenda fjárfestingu, en það er einmitt það sem mest er þörfin fyrir nú um stundir.

Óska verður ráðherrunum til hamingju með þessa útkomu í skoðanakönnunni, að teknu tilliti til aðgerða- getu- og framtaksleysis þeirra við stjórn landsins.

 

 

Flestir ánægðir með störf Rögnu

Ísbirnirnir í góðum málum?

Síðustu ár hefur því verið haldið fram að ísbirnir séu í útrýmingarhættu vegna þess að hafís sé algjörlega að hverfa á norðurslóðum.  Nú berast hins vegar fregnir af því, að hafísinn hafi aukist svo mjög í Noður-Íshafinu, að hann sé orðinn eins mikill og hann var, fyrir árið 2000.

Í fréttinni segir:  "Dr. Mark Serreze, við bandarísku ísrannsóknamiðstöðina, sem tók upplýsingarnar saman segir að þessar nýju niðurstöður þýði ekki að hnattrænni hlýnun sé lokið. Hann segir að vöxt hafíssins megi þakka óvenju miklum kuldum, einkum í Beringshafi." 

Þrátt fyrir þessar kenningar um jarðarhlýnunina hafa verið óvenju miklar vetrarhörkur um alla Evrópu og í Norður Ameríku, og þar við bætast þessar nýju fréttir af aukningu hafíssins á norðurhjaranum.

Vísindamenn verða sjálfsagt ekki í vandræðum með að útskýra hvernig þakka megi hlýnun andrúmsloftsins þessa óvenjulegu kulda.

Ísbirnirnir þurfa að minnsta kosti ekki að kvíða því, að verða heimilislausir á næstunni. 

Hafís eykst á norðurslóðum

Er hægt að ganga lengra í ósvífninni?

Tchenguiz bræður, sem voru meðal stærstu lántankenda Kaupþings banka, ætla sér að fara í mál við bankann, venga þess að hann hafi ekki stðaið nógu vel fjárhagslega, þegar bræðurnir tóku hundurð milljarða króna lán hjá honum.

Nú, þegar þeir geta ekki endurgreitt lánin, á að stenfa bankanum vegna þess að hann hafi komið þeim bræðrunum í klandur, með því að lána þeim allt of mikla peninga, sem þeim hafi ekki tekist að koma undan, vegna þess að bankinn ætlist til að þeir endurgreiði lánin.

Þeir bræður eru greinilega af sama sauðarhúsi og íslensku útrásarfélagar þeirra, Baugsfeðgar, og telja það skapa sér allherjartjón, að ætlast sé til að þeir endurgreiði lán, sem þeir hafa fengið, en eins og allir vita, þá hafa íslenskir útrárarrugludallar aldrei greitt eina krónu til baka af peningum se3m þeir hafa fengið lánaða og telja reyndar ómannúðlega framkomu gagnvart sér, að gera kröfu um slíkt.

Vonandi tapa þessir rugludallar öllum sínum málum gegn bankanum og lenda á sama stað að lokum og félagar þeirra, þ.e. á bak við lás og slá.

Tchenguiz-bræður undirbúa mál gegn Kaupþingi

Hvað varð um peningana?

Deutsce Bank hefur haft á sínum snærum sérstakt rannsóknarlið til að rannsaka hvað varð um alla peningana sem þeir lánuðu til íslensku bankanna og sérstaklega er verið að kanna þátt bankastjóra og eigenda Landsbankans. 

Áður hafa borist fréttir af því að breska efnahagsrannsóknardeildin hafi að eigin frumkvæði hafið rannsókn á starfsemi íslensku bankanna og sé nú komin í samstarf við Sérstakan saksóknara, þannig að því fleiri aðilar sem rannsaka svikamilluna sem viðgekkst í banka- og útrásarsukkinu, því meiri og betri von er til þess að hendur verði hafðar í hári þessara svikara, hvar sem þeir reyna að leita skjóls í heiminum.

Ekki er að undra, að erlendar lánastofnanir skuli ekkert skilja hvert peningarnir þeirra fóru, því heildartap íslensku bankanna nemur einhversstaðar á bilinu 5000 - 8ooo milljarðar króna og varla hafa útrásarsvindlararnir tapað því öllu í fáráðlegum fjárfestingum, heldur hljóta að vera talsverðar líkur til þess að einhver hluti þessarar gífurlegu fjárhæðar hafi ratað í banka- og skattaparadísir veraldarinnar.

Vonandi greiðist úr þessari flækju allri fljótlega, svo biðtími banka- og útrásarsvindlara eftir afplánunarplássum fari að styttast.

Rannsaka Landsbankann