Jón Gnarr? Hverjum er ekki orðið sama?

Mogginn vitnar í dag í skrif Jóns Gnarrs frá árinu 2005 um kristinfræðslu í skólum, sem honum þótti þá jafn sjálfsögð og að fólk ástundaði heilbrigt mataræði.  Fyrir þessum fimm árum sagðist þessi núverandi óhæfi borgarstjóri ekki skilja hver gæti sett sig upp á móti kristinfræðikennslu í skólum.

Fimm árum síðar er það sá sami Jón Gnarr og fylgifiskar hans, sem leggja fram tillögu um að gera allt sem minnir á kristna trú útlæga úr skólum borgarinnar og er það gert undir yfirskini hlutleysis gagnvart trúarbrögðum, en er ekkert annað en árás á menningararf þjóðarinnar og þau siðferðilegu viðhorf sem sjálft þjóðfélagið er grundvallað á.

Jón Gnarr gaf sig út fyrir að vera kaþólskan í nokkur ár og tók þá meðal annars að sér að reka bókaverslun safnaðarins, en sagði svo í sjónvarpsviðtali eftirá að þetta hefði allt verið í gamni gert og fyrst og fremst verið gagnöflun fyrir handrit að skemmtiefni.  Svipað lét hann út úr sér í þætti á Stöð 2 fyrir skemmstu, þegar hann sagðist nú þegar vera kominn með efni í heilan skemmtiþátt eftir aðeins þriggja mánaða veru í "starfi" borgarstjóra og sagðist vonast til að verða kominn með efni í heila "seríu" að kjörtímabilinu loknu.

Nú hefur hann komið mestu af starfsskyldum borgarstjóraembættisins yfir á "varaborgarstjórann" og hefur því nú nánast allan "vinnudaginn" til þess að semja handrit að gamanseríunni sinni, sem hann ætlar að vinna til sýninga að loknu kjörtímabilinu, enda reiknar hann ekki með endurkjöri, frekar en að nokkrum öðrum detti slík firra í hug.

Er ekki annars öllum orðið sama um Jón Gnarr og vitleysurnar sem einkenna öll hans "störf" síðan hann tók við borgarstjóraembættinu, sem hann lætur svo aðra sinna, enda algerlega óhæfur til þess sjálfur?

 

Jón Gnarr fylgjandi kristinfræðslu

Steingrímur J. er harðasti rukkarinn

Við setningu Alþingis sagði Jóhanna Sigurðardóttir að bankarnir hefðu dregið lappirnar vegna samninga við skuldara og undir það tók Steingrímur J. og bætti um betur með stóryrðum um stjórnendur bankanna og slóðaskap þeirra við að vinna með þau úrræði sem ríkisstjórnin hefði af mannkærleik sínum skammtað skuldugustu heimilum landsins.

Á það var þá strax bent að sá innheimtumaður, sem engin grið gæfi í innheimtum og neitaði algerlega að semja um eftirgjöf, eða niðurfellingu skulda, væri Steingrímur J. sjálfur, eða umboðsmenn hans, sem gegna innheimtustörfum fyrir ríkissjóð.

Þetta staðfestir einstæð móðir, sem var í námi sem hún hrökklaðist úr vegna ósveiganleika innheimtumanna ríkissjóðs í hennar fjárhagserfiðleikum, en skatturinn og LÍN kröfðust uppboðs á íbúð hennar, en allir aðrir lánadrottnar hennar voru tilbúnir til samninga um kröfur sínar.

Í tölvubréfi konunnar til þingmanna segir m.a:  „Ef alþingismönnum er í raun alvara með því að koma til móts við skuldsettar fjölskyldur í stórum vanda þá má kannski byrja á að líta til eigin krafna ríkisstofnanna sem eru að nauðbeygja fólk og krefjast nauðungarsölu. Innheimtuaðgerðir ríkisins sjálfs er þær sem engan grið gefa.“

Þrátt fyrir ítrekaðar ábendingar um þessa innheimtuhörku Steingríms J. og undirmanna hans, hefur hann ekki hreift legg eða lið til að liðka til fyrir þeim sem í vanskilum eru við ríkisstofnanir.  Jafnvel þeir sem leitað hafa eftir sértækri skuldaaðlögun hafa komið að algerlega harðlokuðum dyrum hjá undirmönnum Steingríms J. og á því hefur öll aðstoð strandað.

Ekki er nóg með að Steingrímur J. sé harðsvíraðasti rukkari landsins, heldur er hann einnig sá falskasti, þar sem hann reynir að kenna öllum öðrum en sjálfum sér um að ekkert skuli ganga við úrlausn þeirra skuldsettustu, sem engan veginn geta ráðið við skuldasúpu sína.

Gat ekki samið við LÍN

Glæsilegt afrek

Kvennalið Gerplu í hópfimleikum náði þeim stórkostlega árangri að verða Evrópumeistari í íþrótt sinni og er þetta einhver glæsilegasti árangur, sem íslenskt lið hefur náð í hópíþróttum.  Einnig náði landslið stúlkna í fimleikum þriðja sæti í keppni landsliða og er það einnig glæsileg frammistaða.

Oft hefur verið heilmikið tilstand á Keflavíkurflugvelli við heimkomu íslendinga, sem náð hafa góðum árangri á stórum íþróttamótum og að þessu sinni ætti móttökuathöfnin að vera með glæsilegra móti, vegna þessa einstæða árangurs og þeirra geysilega miklu framfara, sem orðið hafa í fimleikum hér á landi á undanförnum árum.

Slíkur árangur næst ekki, nema með þrotlausum æfingum, miklum áhuga og fórnum í þágu íþróttarinnar.  Það er enginn hægðarleikur að komast í fremstu röð í Evrópu, að ekki sé talað um heiminn allan, og slíkum árangri, sem þessum, verður ekki náð, nema með mikilli vinnu og fyrirhöfn,  stúlknanna sjálfra, þjálfaranna, fjölskyldanna og félaganna, sem þær æfa hjá.

Til hamingju stelpur með þennan frábæra árangur.  Til hamingju Ísland, með að eiga svona frábærar stelpur.

Forsætisráðherra samfagnar fimleikakonum

Átakanlegur veruleiki stríðsátaka

Fréttir, sem nú birtast upp úr skýrslum Bandaríkjahers, sem Wikileaks birti opinberlega fyrir nokkrum dögum og lýsa grimmilegum pyntingum írakska hersins á handteknum hryðjuverkamönnum og hylmingum Bandaríkjamanna með þeim, lýsa enn og aftur þeim viðbjóði, sem fylgir hernaðarátökum hverskonar og virðist vera sama hver á í hlut.  Enginn virðist öðrum betri í þeim efnum að fremja alls kyns glæpi og ofbeldisverk í nafni ættjarðarinnar og meintrar ástar á henni og hagsmunum þeirra þjóða, sem í hlut eiga.

Ekki þarf þó að líta til austurlanda eftir slíkum glæpum, því ekki eru svo mörg ár síðan svipaðir stríðsglæpir voru framdir af öllum hlutaðeigandi í stríði í miðri Evrópu, það sem aðalmarkmiðið var að útrýma öllum þeim, sem voru af öðrum kynþætti eða trú, en þeim sem í meirihluta var á hverju svæði fyrir sig.  Lítið lengra er síðan milljón manns var slátrað á djöfullegan hátt í Rúanda og enn berast fréttir af hryllilegum aðgerðu stríðandi aðila í mörgum Afríkuríkjum.

Mannslíf eru ekki mikils metin í mörgum löndum og víða tíðkast að fólk sé dæmt til húðstrýkinga, handarhöggs, henginga eða lífláts á annan hátt, jafnvel að undangengnum pyntingum.  Þegar slíkar refsingar eru samkvæmt lögum viðkomandi ríkja, er varla við öðru að búast en hinu versta, þegar slíkar þjóðir standa í stríðsaðgerðum gegn öðrum löndum og jafnvel eigin íbúum.

Öll stríð eru af hinu illa og þau leiða, eins og sagan sýnir, til alls kyns illverka og glæpa og því verður að fordæma slíkt athæfi með öllum ráðum, í þeirri veiku von að hálfbrjálaðir stríðsmenn og stjórnendur þeirra láti af slíku athæfi og reyni frekar að leysa málin á friðsamlegan hátt.

Ekki er heldur djúpt á villimanninum í Íslendingum, eins og nýlegar tilraunir til líkamsmeiðinga á þingmönnum og ráðherrum sýna, í tengslum við mótmæli gegn stjórnvöldum hérlendis.  Þó ekki sé beinlínis hægt að líkja slíkum aðgerðum við stríðsglæpi, þá sýna þær þó hve grunnt er í villimanninn og hve lítið þarf til að vekja hann af dvala og til óhæfuverka.

Ótrúlega alvarlegar skýrslur

Feitu karlarnir eru hálfgerðar lesbíur

Í tilefni helgarinnar, þegar fólk hópast á skemmtistaðina í leit að ból- eða ævifélaga, er rétt að minna á fréttina af því, að feitu karlarnir eru miklu betri í bólinu en beinasleggjurnar.  Þetta er nú vísindalega sannað í Tyrklandi, af öllum löndum, en þar hefur sáðlátstími karlpenings af ýmsu holdarfari verið vísindalega mældur og engin ástæða til þess að draga nákvæmnina í efa.

Helsta niðurstaða rannsókna Tyrkjanna er þessi:  "Meðalþrautseigja þeirra grönnu var aðeins rúmlega hálf önnur mínúta. En bumbukarlarnir héldu út í rúmar sjö mínútur."  Með þessu er árhundraða misskilningi eytt í eitt skipti fyrir öll, en í gegnum tíðina hefur kvenfólk frekar laðast að þeim beinaberu, en kyntröllin hafa oftast orðið að láta sér nægja "næst sætustu stelpuna á ballinu" eins og einn þjáningabróðir okkar fituklessanna orðaði þetta vandamál svo snyrtilega um árið.

Það eina sem skyggir á niðurstöðu þessarar merku rannsóknar er skýringin á því hvers vegna við, þessir feitu, erum svona miklir afbragðselskhugar, en hún er þessi:  "Munurinn stafaði ekki af því þeir feitu væri slappir og lengi að koma sér í gang, sögðu vísindamennirnir. En þéttvaxnir hafa í sér meira af kvenhormóninu estradiol sem seinkar fullnægingu."

Niðurstaðan er því eiginlega sú, að við hlunkarnir séum bara kerlingar.  Það sem verra er, bara hálfgerðar kerlingar, sem leiðir til þeirrar hundleiðinlegu niðurstöðu fyrir okkur, að sennilega er langbest fyrir kvenfólkið að vera bara lesbískt.

Bólfimir bumbukarlar

Enn ein árás ríkisstjórnarinnar á velferðarkerfið

Fyrsta "hreina vinstri stjórnin" í landinu, sem kennir sig við "norræna velferð" lýsti því sem sínu helsta stefnumáli að standa vörð um það heilbrigðis- og skólakerfi sem Sjálfstæðisflokkurinn hafði byggt upp á valdatíma sínum og sérstaklega ætlaði "norræna velferðarstjórnin" að standa dyggan vörð um það velferðarkerfi, sem byggt hafði verið upp af miklum metnaði á tíma Sjálfstæðisflokksins í ríksisstjórnum undanfarinna ára.

Núna þegar fjárlög hafa verið lögð fram, sést að uppbyggingu þessara kerfa á að rústa á einu ári, þ.e. strax á árinu 2011, en hins vegar eru fjárlögin svo illa undirbúin, að hver stjórnarþingmaðurinn á fætur öðrum hefur lýst sig andvígan þeim og jafnvel sumir ráðherrarnir einnig og boða víðtækar breytingar við aðra umræðu um lögin í desemberbyrjun.

Enginn hefur þó gagnrýnt ríkisstjórnina eins harðlega og verkalýðsforystan og nægir í því efni að vitna í niðurlag meðfylgjandi fréttar um það sem Gylfi Arnbjörnsson sagði á þingi ASí um hluta af þeim niðurskurði sem verst mun bitna á þeim tekjulægstu í þjóðfélaginu: 

"Í febrúar 2008 samdi ASÍ við stjórnvöld um 45% hækkun húsaleigubóta og að húsaleigubætur fylgdu verðlagi eftir það. „Nú á að fella niður framlögin vegna þeirrar hækkunar. Þetta felur í sér 30% lækkun. Það er alveg ljóst að þetta mun verða reiðarslag fyrir fátækt fólk,“ segir Gylfi.

Lára Björnsdóttir, formaður Velferðarvaktarinnar, varaði við því á ársfundi ASÍ, í gær að framlög til húsaleigubóta yrðu lækkuð."

Varla er hægt að flokka þessi ummæli undir einhvern áróður hægri manna gegn "norrænu velferðarstjórninni".

Framlög til húsaleigubóta lækka um milljarð

Ómennsk framkoma Besta flokksins

Allir geta verið sammála um að hagræðingar og sparnaðar hafi verið þörf í rekstri Orkuveitu Reykjavíkur og jafnvel að þurft hafi að fækka starfsmönnum, fyrst stjórnarmeirihlutinn treysti sér ekki til að dreifa þeim sparnaði á sem flesta starfsmenn með minnkuðu starfshlutfalli hvers og eins, eins og tillaga kom fram um að gera.

Aðferðin við þessa harkalegu sparnaðaraðgerð Besta flokksins og þeirra, sem samábyrgir eru fyrir gjörðum hans, er hins vegar algerlega óviðunandi, enda ómannúðleg í alla staði, eða eins og Júlíana Guðmundsdóttir, trúnaðarmaður hjá OR lýsir aðgerðinni:  "Okkur var smalað saman og sagt að okkur væri öllum sagt upp störfum. Einn starfsmaður lá að vísu á sjúkrahúsi, en honum var líka sagt upp. Öðrum, sem er 62 ára gamall og búinn að vinna hjá OR í 37 ár, var þá sagt upp." 

Þessi mannvonskulega smölun átti sér stað um eittleytið í gær og fólkið fékk þrjá tíma til að kveðja samstarfsfólk sitt og ganga frá sínum málum á vinnustaðnum og klukkan fjögur síðdegis hættu öll aðgangskort þessa fólks að vinnustaðnum að virka og verður engum þessara starfsmanna hleypt inn í húsið framar, nema undir eftirliti, þó á fjórða mánuð sé í að uppsagnarfresti þess ljúki.

Svona stendur enginn að uppsögnum starfsmanna, sem snefil hefur af mannlegum tilfinningum og skilning á því hvílíkt áfall það er fyrir starfsfólk að vera sent út á guð og gaddinn eftir áratugastarf hjá sama vinnuveitanda.

Hafi Besti flokkurinn og aðrir stjórnendur OR skömm fyrir framkomu sína.

„Fólkið auðvitað bara grét“

Valdabarátta innan ASÍ og árás á lífeyrisþega

Vilhjálmur Birgisson, formaður Verkalýðsfélags Akraness, er greinilega í kosningaham og vill verða forseti ASÍ og velta þar með Gylfa Arnbjörnssyni úr embættinu.  Vilhjálmur réðst með miklu offorsi á Gylfa í ræðu sinni á ársfundi ASÍ og fann honum flest til foráttu og þá helst að hafa ekki viljað láta elli- og örorkulífeyrisþega lífeyrissjóðanna niðurgreiða húsnæðislán.

Það verður að teljast með ólíkindum að Vilhjálmur, sem forystumaður í verkalýðsfélagi, skuli láta sér detta í hug að velta vanda húsnæðislánaskuldara yfir á það fólk, sem lokið hefur starfsævi sinni og farið er að fá útborgaðan þann lífeyri, sem það hafði áunnið sér rétt til um ævina og þá sem örkumlast hafa á yngri árum og því notið örorkulifeyris frá þeim lífeyrissjóði, sem þeir höfðu greitt iðgjöld til meðan þeir voru vinnufærir. 

Ekki skulu Gylfi, eða störf hans innan ASÍ, varin hér sérstaklega, en ekki verður orða bundist yfir svo lágkúrulegum brögðum sem Vilhjálmur notar, til þess að koma sjálfum sér til meiri metorða innan sambandsins.  Fyrir utanaðkomandi er algerlega ótrúlegt að fylgjast með verkalýðsleiðtoga leggjast svona lágt í áróðri sínum og framapoti.

Vonandi sjá fulltrúar á ársfundi ASÍ og aðrir félagsmenn verkalýðshreyfingarinnar í gegn um þessa lágkúru og árás á kjör elli- og örorkulífeyrisþega almennu lífeyrissjóðanna, því ekki myndi þessi árás á lífskjör þessa hóps ná til þeirra sem fá greiðslur frá opinberu lífeyrissjóðunum, því þeir njóta ríkisábyrgðar og því myndu kjör frá þeim ekkert skerðast.

Vilhjálmur er því að mæla með hreinum skemmdarverkum á lífeyrissjóðum launþega á almennum vinnumarkaði og varla hefur hann verið kosinn til formennsku í sínu félagi til að stunda slíkt.

Hvatti Gylfa til að íhuga stöðu sína

Atvinnusköpun eða ríkisstjórnina frá

Bæði Jóhanna Sigurðardóttir og Steingrímur J. hafa marg lýst því yfir að kreppunni sé lokið og mikill hagvöxtur sé framundan og það án þess að nokkurt einasta átak verði gert í atvinnumálunum.  Skýringar á því hvernig töfraformúla ríkisstjórnarinna eigi að virka án átaks í atvinnusköpun hefur ekki verið útskýrt, enda skilur enginn hvernig hún á að ganga upp.

Enginn hagfræðingur er sammála ráðherrunum og hvorki hafa verkalýðshreyfingin eða samtök atvinnurekenda trú á henni heldur.  Á þingi ASÍ sagði Ólafu Darri, hagfræðingur ASÍ, að nú hilli undir að botni verstu efnahagskreppu lýðveldistímans verði náð og miðað við óbreytt ástand myndi hagvöxtur verða afar hægur á næstu árum.  Hann hvatti til að framkvæmdum við álver í Helguvík yrði komið af stað strax, enda gætu þær framkvæmdir tvöfaldað hagvaxtaspá ASÍ fyrir árið 2011.

Í fréttinni af ræðu Ólafs kemur þetta fram í fréttinni, m.a:  "Ólafur Darri sagði engan vafa leika á að það myndi skipta mjög miklu máli ef vinna við álverið í Helguvík færi í fullan gang. Reiknað væri með að um 1300 manns fengju vinnu meðan á framkvæmdum stæði."  Þessi eina framkvæmd gæti þannig útvegað 11% þeirra sem nú eru á atvinnuleysisskránni atvinnu á framkvæmdatímanum.

ASÍ spáir því að atvinnuleysi verði 6% á árinu 2013, þannig að þá verði um 10.000 manns á atvinnuleysisskrá og þá mun einnig fjöldi fólks verða dottið út úr kerfinu vegna þess að það hafi verið atvinnulaust í þrjú ár, eða meira og þar með verður neyð þess enn meiri en nú er.

Að lokum skal þessi skoðun Ólafs Darra undirstrikuð:  "Hann sagði ljóst að það væri ekki hægt að „svelta sig út úr vandanum“ eins og hann komst að orði. Við yrðu að auka tekjur okkar með aukinni atvinnusköpun."

Engar líkur eru á því að ríkisstjórnin geri sér ekki grein fyrir þessum staðreyndum.  Hún er því að vinna viljandi og skipulega að því að framlengja kreppuna og eymd þjóðarinnar, með öllum þeim eitruðu meðulum sem hún hefur yfir að ráða.

 

Erum að ná botninum

Forseti ASÍ rassskellir VG

Gylfi Arnbjörnsson, forseti ASÍ, sagði í ræðu sinni á ársfundi ASÍ ríkisstjórnina hafa svikið öll sín loforð, sem hún gaf og undirritaði í stöðugleikasáttmálanum í júní 2008.  Átaldi Gylfi ríkisstjórnina fyrir þann óheiðarleika sem hún hefur sýnt aðilum vinnumarkaðarins, t.d. með því að koma ekki hreint fram og segja sáttmálanum upp formlega, en svíkja hann hinsvegar grímulaust allan tímann frá undirritun.

Gylfi tók vinstri græna hreinlega á hné sér og rassskellti þá vegna skemmdarverka þeirra varðandi atvinnumál þjóðarinnar, en samkvæmt fréttinni sagði hann m.a, eftir að hafa farið yfir óheiðarleika stjórnarinnar í garð launþega:  "Það á við um loforð stjórnvalda um náið samráð í veigamiklum málum sem varða hagsmuni launafólks, en alvarlegast og sárast hefur þó verið ótrúlegt framtaksleysi stjórnvalda í atvinnumálum og nauðsynlegar atvinnu- og tekjuskapandi framkvæmdir. Það er mikið áhyggjuefni að svo virðist sem málaflokkurinn atvinnumál hafi verið tekinn í gíslingu fámenns hóps og ríkisstjórnin í raun misst forræði á málinu."

Þetta eru engar smáásakanir af hálfu forseta  ASí í garð "fyrstu hreinræktuðu vinstri stjórnarinnar", eins og hún kallar sig og segist jafnvel vera "norræn velferðarstjórn".  Stjórn sem ekki skilur að atvinnumálin séu undirstaða velferðar, getur aldrei orðið velferðarstjórn.

Slík stjórn getur eingöngu orðið ríkisstjórn kreppu og örbirgðar til langrar framtíðar.  Þannig er ríkisstjórnin sem Íslendingar sitja uppi með núna.

Tóku atvinnumálin í gíslingu