Byltingin í VR étur börnin sín

Hallarbylting var gerð í VR síðast liðinn vetur og öllum fyrrum stjórnendum félagsins vikið til hliðar vegna setu þáverandi formanns í stjórn Kaupþings á mesta rugltíma íslenskrar fjármálasögu.

Nú rúmu hálfu ári síðar er byltingin farin að éta börnin sín innan nýrrar stjórnar VR og virðist það helst stafa af því, að fólk, reynslulítið af félagsstörfum, virðist hafa komist til valda í félaginu og sumt algerlega vanhæft til félagslegra starfa.

Varaformaður félagsis hefur látið í ljós ótrúlega ofstækisfullar og einstenginslegar skoðanir sínar, bæði í ræðu og riti, frá því hann var kjörinn í stjórn félagsins og ávallt látið eins og hann talaði í nafni stjórnar félagsins, sem oftast hafði enga hugmynd, fyrirfram, hvar og hvenær varaformanninum þóknaðist að tjá skoðanir sínar opinberlega.

Þannig vinnubrögð eru ekki sæmandi fyrir stærsta verkalýðsfélag landsins og aflar því hvorki virðingar né trausts.

Lýsa yfir vantrausti á varaformann VR

Athugasemdir

[Jón Óskarsson, 16.12.2009 kl. 15:13]

Byltingar og almenn mótmæli eru ný fyrirbæri hér á landi og nokkuð ljóst að menn kunna ekki að vinna úr slíku.  Annað dæmi um algjörlega misheppnaða byltingu er Búsáhaldabyltingin sem virtist til þess eins að koma Vinstri Grænum í ríkisstjórn.  Eftir að það tókst heyrist ekki hósti né stuna frá forsvarsmönnum þeirrar byltingar, þrátt fyrir að ekkert hafi breyst til batnaðar né þeim kröfum verið náð sem hafðar voru upp á Austurvelli.  Heilbrigðisráðherra er líka hætt að standa út við glugga í Alþingishúsinu og hvetja fólk til ofbeldis gegn valdstjórninni.

[Axel Jóhann Axelsson, 16.12.2009 kl. 15:28]

Ég hef einmitt oft bloggað um það, að engar stórkostlegar mótmælaaðgerðir verði hafðar í frammi hér á landi, nema þær séu skipulagðar af VG og með þátttöku þeirra.  Fjarvera þeirra frá t.d. Icesave mótmælunum sýnir þetta svart á hvítu, því þar er vanalega illa mætt, þrátt fyrir að meirihluti þjóðarinnar sé algerlega á móti ríkisábyrgðinni.

Að Álfheiður sé orðin heilbrigðisráðherra er náttúrlega bara hneyksli og ekkert annað.

[Jón Óskarsson, 16.12.2009 kl. 15:41]

Það væri athugandi að taka upp sem eitt af verkefnum væntanlegrar þingmannanefndar að fjalla um hæfi væntanlegra ráðherraefna á hverjum tíma og taka þá í yfirheyrslu eins og tíðkast til að mynda í Bandaríkjunum í stað þess að helsta verkefni nefndarinnar eigi að vera að hvítþvo núverandi og fyrrverandi ráðherra Samfylkingarinnar og skella öllu í lás í 80 ár.