Skýringalaus ráðherra

Það eru fleiri kjaftstopp í dag, en Steingrímur J, jarðfræðingur og fjármálaráðherra, en af allt annarri ástæðu en hann.  Það sem veldur þessu kjaftstoppi manna er að sennilega í fyrsta skipti í þingsetutíð sinni, hefur Steingrímur J. ekki svör á reiðum höndum.  Hann hefur getað blaðrað út í það óendanlega fram að þessu um hvaðeina sem til umræður hefur verið og talið sig hafa umboð fyrir sannleikann í öllum málum.

Nú hefur fjármálaráðherra þjóðarinnar engar skýringar á veikingu krónunnar og er þó eitt helsta stefnumál ríkisstjórnarinnar að styrkja hana.  Þegar höfuðóvinurinn var flæmdur úr seðlabankanum 27. febrúar s.l. var gengisvísitalan 186,95 stig, en er nú 216,07.  Þetta þýðir gengislækkun um tæp 16% síðan norski förusveinninn og peningastefnunefndin tóku við seðlabankanum.  Þetta þýðir það líka að sá sem skuldaði myntkörfulán, sem var að upphæð kr. 30.000.000 þann 27. febrúar, skuldar nú tæpar 35 milljónir.

Þessari ríkisstjórn, sem þóttist ætla að bjarga heimilunum frá gjaldþroti, hefur tekist að koma miklum fjölda nær hengifluginu en áður.  Svo lætur stjórnin Alþingi masa dögum saman um stjórnarskrárfrumvarp og neitar að ræða "björgunaraðgerðirnar".  Á meðan blæðir heimilunum út.

Það óásættanlegt að ráðherra nokkurrar þjóðar geti ekki svarað grundvallarspurningum um fjármál síns eigin lands.

Kann ekki skýringar á veikingu

Athugasemdir

[Axel Jóhann Axelsson, 8.4.2009 kl. 08:44]

Það getur varla verið dómharka að ætlast til þess að fjármálaráðherra þjóðarinnar hafi einhver svör við því að eitt helsta áherslumál ríkisstjórnarinnar gangi ekki eftir, heldur gerist akkúrat það þveröfuga, að gengið fellur og fellur.  Það getur heldur ekki verið dómharka að benda á að þrjátíumilljóna króna lán hafi hækkað í þrjátíuogfimmmilljónir á fimm vikum, eða um eina milljón á viku síðan "erkióvinurinn" var hrakinn úr seðlabankanum.

Unga formanninum gæti ekki farnast ver en þetta.