Ástkærasti leiðtoginn fallinn frá

Ástkærasti þjóðarleiðtogi vorra tíma, Kim Jong-il, er fallinn frá í blóma lífsins, aðeins sjötugur, og var það dugnaður hans, vinnusemi og fórnfýsi sem að lokum varð honum að aldurtila og eins og gefur að skilja er dauði hans gríðarlegur harmur fyrir þjóð hans.

Íbúar Norður Kóreu mega illa við að bæta þessum hörmungum ofan á aðrar sem þeir hafa þurft að þola undanfarna áratugi, enda erfiðara fyrir hungrað fólk að sinna sorginni eins og skyldi og erfitt er að láta ljós loga í minningu hins mikla landsföður þar sem rafmagn er af skornum skammti í landinu og kerti vandfundin.

Íbúarnir skilja vel að dauða hins mikla og ástsæla leiðtoga má rekja beint til þrældóms hans í þágu alþýðunnar og varla er hægt að ímynda sér hvílíkt hörmungarástand væri ríkjandi í landinu, hefði hans ekki notið við.

Ekki er að efa að sá elskaði, virti og dáði Kim Jon-un, sem nú mun taka við stjórnartaumunum, muni fórna sér af minni krafti fyrir þjóðina en faðir hans og afi gerðu.

Dugnaður, kraftur og fórnfýsi hefur alltaf verið aðalsmerki Kim ættarinnar. Þjóðir heims eiga henni mikið að þakka og þá auðvitað ekki síst sú norður-kóreska.

Vonandi leggur hún á sig enn meiri vinnu og matarsparnað í þágu hins nýja, elskaða og dáða þjóðarleiðtoga, sem forsjónin hefur fært henni fyrirhafnarlaust upp í hendurnar.

Kim Jong-il látinn

Athugasemdir

[Bergur Ísleifsson (IP-tala skráð) 19.12.2011 kl. 08:03]

Nei, sko ... bara húmor í kalli í dag. Svartur að vísu og ískaldur, en húmor samt. Vonandi verður fráfall leiðtogans mikla til þess að eitthvað slaknar á krumlunum þarna, en sennilega er það borin von.

[Sigurður Heiðar Elíasson, 19.12.2011 kl. 09:27]

Þetta kann ég að meta!

[Skúli (IP-tala skráð) 19.12.2011 kl. 17:32]

Jah, þó Íslendingar taki þetta kannski ekki svo hrikalega nærri sér virðast Norður-Kóreumenn svo sannarlega gera það: http://www.youtube.com/watch?v=ccsNr9UJeVY

[Axel Jóhann Axelsson, 19.12.2011 kl. 18:17]

Skúli, þetta er 24 milljóna manna þjóð og á videóinu sjást nokkur hundruð þeirra grátandi og organdi. Norður-Kóresk stjórnvöld hafa áður sett um magnaðri hópsýningar en þessa.

[Skúli (IP-tala skráð) 19.12.2011 kl. 19:39]

Jamm alveg örugglega, fólk er auðvitað heilaþvegið í drasl svo það er ekki mikið að marka þetta