Pálmi og Jón Ásgeir pumpuðu loftinu í Icelandair

Það hlýtur að vera nokkuð óvenjulegt að forstjóri eins fyrirtækis skuli halda fyrirlestur á fundum Samtaka um verslun og þjónustu um rekstur helsta keppinautinn á markaðinum og kryfja þar bæði eignir, skuldir, rekstur og eigið fé.  Þetta átti sér þó stað nýlega, þegar Matthías Imsland, forstjóri Iceland Express fjallaði á fundi samtakanna um Icelandair, þó eðlilegra hefði mátt telja að hann fjallaði um sitt eigið félag, tilurð þess og viðskiptafléttur með það fyrir nokkrum árum, misfallegar og -heiðarlegar.

Í fréttinni er þetta sagt m.a:  "Slík bókfærsla rifji að mati Matthíasar upp minningar frá árinu 2007 þegar það hafi tíðkast að „setja loft“ í efnahagsreikninga félaga. Viðskiptavild upp á 16 til 18 milljarða króna og réttur á flugvallarstæðum séu bókfærðar sem óefnislegar eignir í bókum Icelandair. Viðskiptavildin sé metin á himinháa fjárhæð og sé til að mynda mun meiri en hjá British Airways þar sem hún sé 40 milljónir punda eða á áttunda milljarð króna."

Matthías hefði mátt minnast á það, að á þessum tíma átti Pálmi í Iceland Express stóran hlut í Icelandair, ásamt "viðskiptafélaga" sínum Jóni Ásgeiri í Bónus og fleirum og þeir afrekuðu m.a. að kaupa og selja flugfélagið Sterling á milli sín og blása upp efnahagsreikninga félaganna á víxl, með hækkun á mati flugfélagsins úr 5 milljörðum króna í tuttugu milljarða á örfáum mánuðum, þrátt fyrir að Sterling væri rekið með gríðarlegu tapi allan tímann og færi svo á hausinn nokkru síðar.

Einnig afrekuðu þeir félagar að skipta upp félaginu FL Group (síðar Stoðir) og selja frá því eignir, t.d. Icelandair á rugluðu verðmati og létu fylgja því svo miklar skuldir, að vonlaust var að félagið gæti nokkurn tíma ráðið við þær.  Það var einmitt á þessum tíma sem "loftið" kom inn í efnahagsreikning félagsins vegna ævintýramennsku Pálma og félaga.

Pálmi kom síðan Iceland Express og Asterus undan þrotabúi Fons á spottprís og allt bendir til þess að fléttan með Icelandair hafi verið til þess gerð að koma því félagi á hausinn, svo Pálmi sæti einn að markaðinum með sitt félag, þ.e. Iceland Express. 

Svona gerðust nú kaupin á eyrinni á "velmekatarárum" Jóns Ásgeirs, en velmektarár Pálma í Iceland Express virðast alls ekki liðin.

Icelandair fullt af lofti

Athugasemdir

[Jenný Stefanía Jensdóttir, 22.9.2010 kl. 14:27]

Sama datt undirritaðri í hug, þegar þessi frétt var lesin.

Að óefnislegar eignir séu hátt skrifaðar hjá Icelandair er umræðuefni út af fyrir sig.  

En ósjálfrátt vacumpakkar maður allar umræður, vitrænar eður ei af hálfu þeirra sem kýldu loftþrýstinginn upp í hámarksskala með þeim afleiðingum að allt sprakk.

[Axel Jóhann Axelsson, 22.9.2010 kl. 14:39]

Jenný, það er alveg rétt, að óefnislegar eignir voru blásnar upp meðan "loftbóluhagkerfið" var og hét og væri vert umræðu út af fyrir sig.

Þess vegna er hlálegt að sjá þátttakendur og janfvel höfunda "loftbóluhagkerfisins" (a.m.k. hér á landi) tala um þessa froðu og hneykslast á henni hjá öðrum.  Ekki síst í þessu tilfelli, þar sem eigandi Iceland Express er einn aðalgerandinn í ruglinu sem átti sér stað hjá FL Group á sínum tíma.

[Nonni (IP-tala skráð) 22.9.2010 kl. 14:50]

Mér finnst merkilegast hvernig fjárfestar gátu gleypt við loftinu þegar félagið var selt út úr Fl-group (áður Flugleiðir) og sett á markað á genginu 27 ef ég man rétt? Það voru ótrúleg viðskipti og auðséð að vanur flugrekstrarmaður eins og Ómar Benediktsson og fleiri létu plata sig!

[Axel Jóhann Axelsson, 22.9.2010 kl. 15:00]

Nonni, veruleikafirringin í þjóðfélaginu var svo ótrúleg á þessum árum, að engu líkara var að menn héldu að hægt væri að græða á öllu, þegar sannleikurinn var sá, að þeir voru ekkert að græða mjög mikið.  Hagnaðurinn var að mestu leyti froða, sem bráðnaði bara eins og froða gerir, en hins vegar sátu skuldirnar eftir, sem slegnar voru út á upppumpuðu eignirnar.

Það er vandamálið sem þjóðfélagið situr uppi með núna og kemur til með að glíma við næstu áratugina.

Það má þakka Pálma í Iceland Express, Jóni Ásgeiri í Bónus, Bjöggunum og félögum þessara kóna, bæði innan bankanna og fyrirtækjanna sem tilheyrðu þessum gengjum.

[Arinbjörn Kúld, 22.9.2010 kl. 18:17]

Viðskiptablaðið er að gera þessu góð skil þessa daganna. Við lestur þeirra úttekta vekur furðu að endurskoðendur skyldu ekki gera neinar athugasemdir þegar almenningshlutafélag eins og FL-Group átti í hlut. Virðast hafa tekið fullan þátt í þeim blekkingum. Enn meiri furðu vekur að sérstakur saksóknari eða efnahagsbrotadeild ríkislögreglustjóra hafa ekki gefið út ákærur ennþá sökum þessara svika?

Kveðja að norðan.