Ríkisstjórnin niðurlægir Kristján Möller

Fyrr í dag var greint frá því, að síðasta verk Kristjáns Möller í Samgönguráðuneytinu hafi verið að skrifa undir heimild til Flugmálastjórnar til að skrá herþotur hér á landi, með það í huga að þær yrðu gerðar út frá Keflavíkurflugvelli í leiguverkefni sem snúa að heræfingum.

Á ÞESSU bloggi í dag var velt upp þeirri spurningu, hvort fyrsta verk Ögmundar Jónassonar í ráðuneytinu yrði að afturkalla þetta síðasta verk Kristjáns og ekki leið á löngu, þar til í ljós kom að þær vangaveltur voru á rökum reistar.  Um leið og út spurðist um þessa leyfisveitingu, varð allt vitlaust innan VG, sem endaði með því að Jóhanna Sigurðardóttir neyddist til að gefa út yfirlýsingu með Steingrími J. um að ekkert samkomulag væri milli flokkanna um þetta mál og Ögmundur myndi "skoða málið" á næstunni.

Þar með má segja að búið sé að afturkalla leyfið og Kristján Möller verið niðurlægður af þessum fyrrum samráðherrum sínum og þar af var annar þeirra formaður þess flokks, sem Kristján hefur starfað fyrir frá því að hann var ungur "eðalkrati".

Í sjónvarpsfréttum kom fram í viðtali við Kristján, að hann hefði skrifað undir leyfið í fullu samráði við forsætis- og fjármálaráðherra og hefði ekki verið um neinn misskilning eða oftúlkun af hans hálfu á samkomulagi ráðherranna.

Ekki byrjar "nýja ríkisstjórnin" gæfulega.

Segja ekkert samkomulag um herþotur

Athugasemdir

[Sigurður I B Guðmundsson, 2.9.2010 kl. 21:09]

Mig minnir að þessi starfsemi ætti að skaffa mörg hundruð störf. En auðvita er það aukaatriði.

[Kristinn Karl Brynjarsson, 2.9.2010 kl. 21:20]

Þetta virðist allt á miskilningi byggt.  Steingrímur og Jóhanna sögðu Möllernum, að hann mætti alveg hrinda þessu af stað, en hann ætti samt alls ekki að gera það.  Þeim þykir Suðurnesjamenn eiga alveg nógu bágt, svo að ekki ætti að svipta þá atvinnuleysinu líka. 

[Axel Jóhann Axelsson, 2.9.2010 kl. 21:36]

Kristinn, þetta er auðvitað sérstaklega hugulsamt af ríkisstjórninni, þ.e. að vilja ekki svipta fólk atvinnuleysinu, hvorki Suðurnesjamenn eða aðra.  Í því efni hefur stjórnin násast staðið sig aðdáunarvel.