Kristján Möller gagnrýnir Ögmund harkalega

Eftir afgreiðslu Ögmundar Jónassonar á umsókn Kínverjans Nubo um undanþágu til að fá að kaupa Grímsstaði á Fjöllum, gagnrýnir Nubo íslensk stjórnvöld og segir kínverska fjárfesta mæta miklum fordómum á vesturlöndum á sama tíma og vestrænir aðilar sæki stíft í fjárfestingar í Kína.

Hér verður ekki að sinni fjallað frekar um fjárfestingar aðila utan EES á Íslandsi, en í framhaldi af úrskurði Ögmundar eru brestirnir í ríkisstjórnarsamstarfinu sífellt betur að koma í ljós og stórfróðlegt var að heyra í Kristjáni Möller í þættinum "Sprengisandi" um afgreiðslu Nubomálsins og reiði Samfylkingarinnar vegna málsins og reyndar skattabrjálæðis Steingríms J. vegna stóriðjunnar.

Kristján segir að Ögmundur hafi í raun verið bullandi vanhæfur til að fjalla um málið, ekki haft samráð við einn eða neinn og reyndar troðið á og lítillækkað samráðherra sína, þá Árna Pál og Katrínu Júlíusdóttur og ekki síst forsætisráðherrann sjálfan með því að hundsa algerlega beiðni hennar um nána samvinnu stjórnarflokkanna um úrlausn málsins. Kristján krafðist þess í þættinum að málið yrði umsvifalaust tekið úr höndum Ögmundar og það leyst af ráðherrum Samfylkingarinnar.

Ekki síður var Kristján harðorður vegna stóriðjuskattanna sem nýjasta skattaæði Steingríms J. beinist að þessa dagana og hugsi fleiri stjórnarþingmenn á sömu lund og Kristján Möller, er dagljóst að ríkisstjórnin er orðin algerlega hadónýt til allra verka og mun hrökklast frá völdum innan skamms.

Ríkisstjórn með eins manns meirihluta á þingi getur ekki lifað lengi við aðra eins upplausn og vandræðagang við úrlausn alvarlegra málefna, sem skipta í raun sköpum fyrir atvinnuuppbyggingu í landinu.

Huang gagnrýnir Vesturlönd

ASÍ sakar ríkisstjórnina um svik, meiri svik og síendurtekin svik

Gylfi Arnbjörnsson, forseti ASÍ, er og hefur lengi verið eindreginn stuðningsmaður Samfylkingarinnar og í Miðstjórn ASÍ sitja með honum fleiri sem stutt hafa stjórnarflokkana dyggilega í áranna rás.

Því verða það að teljast mikil tíðindi að Gylfi og stofnanir ASÍ skuli margendurtekið senda frá sér gagnrýni og ásakanir á hendur ríkisstjórninni fyrir svik við launafólk og eftir því sem tímar hafa liðið, hefur orðalagið á skeytasendingunum orðið harðorðari og í samþykkt ASÍ frá í dag er ekki töluð nein tæpitunga um svikaríkisstjórn Jóhönnu og Steingríms J.

Nægir að vitna í nokkrar setningar úr ályktun ASÍ því til staðfestingar:

"Það þýðir að atvinnuleysisbætur hækka aðeins um 3,5% eða 5.500 kr en ekki 11.000 kr. Ríkisstjórnin sem kennir sig við velferð ætlar þannig ekki aðeins að svíkja eigin loforð heldur einnig snupra þá sem lökust hafa kjörin í okkar þjóðfélagi."

"Þrátt fyrir ítrekaðar athugasemdir og mótmæli verkalýðshreyfingarinnar ætlar ríkisstjórnin að halda til streitu svokölluðu þriggja mánaða sveltitímabili langtímaatvinnulausra."

"Þetta er ómanneskjuleg framkoma sem minnir helst á hreppaflutninga fyrr á öldum. Ríkið firrar sig ábyrgð og vísar atvinnuleitendum á framfærslu annarra."

"Það er verið að lækka framfærslu þúsunda Íslendinga. En að sjálfsögðu bara þeirra sem hafa starfað á almennum markaði. Opinberir starfsmenn halda sínu að fullu, sem fyrr."

"Miðstjórn Alþýðusambands Íslands hafnar alfarið síendurteknum árásum ríkisstjórnar Jóhönnu Sigurðardóttur á íslenskt launafólk."

Stuðningsmenn "velferðarstjórnarinnar" hafa ráðist á ýmsa gagnrýnendur hennar og sakað þá um rangfærslur og ósanngirni, þó vægara orðalag væri notað en þarna er gert. 

Ályktun ASÍ lýkur með hótun um harkalegar aðgerðir gegn ríkisstjórninni láti hún ekki af svikum sínum á þeim skriflegu samningum sem hún hefur gert vegna hækkana til þeirra sem enga framfærslu hafa aðra en af bótum frá hinu opinbera.

Ekki er hægt annað en að taka undir með Miðstjórn ASÍ þegar hún segir að hlálegt sé af ríkisstjórninni að kenna sig við velferð. 

ASÍ segir stjórnina ráðast á réttindi launafólks

Kaupæðið heldur áfram

Nýja flugfélagið WOW hóf að selja farmiða á netinu í hádeginu í dag og þó áætlunarflugið eigi ekki að hefjast fyrr en eftir nálægt því hálft ár nánast hrundi bókunarkerfið vegna álags, en allt að fimm hundruð manns reyndu að tengjast því á hverri sekúndu á fyrstu klukkustundunum.

Líklega er WOW þó ekki flugfélag frekar en Iceland Exprss, heldur eingöngu farmiðasali, en eftir sem áður ber að fagna allri samkeppni á flugleiðunum til og frá landinu, enda eina tryggingin fyrir lágu verði á flugmiðum.

Þessi gríðarlega ásókn inn á bókunarkerfi félagsins, strax á fyrstu mínútunum og klukkustundunum minnir mikið á örtröðina sem myndaðist í Smáralind þegar verslunin Lindex opnaði, en þá seldist sex vikna vörulager upp á tæpum þrem dögum.

Án þess að vera með neina svartsýni vegna þessa nýja félags, má benda á að margir létu glepjast til að kaupa farmiða með IE til Bandaríkjanna með margra mánaða fyrirvara, en sitja nú uppi með sárt ennið vegna fyrirvaralausrar stöðvunar á Ameríkuflugi IE.

Íslendingar hafa lengi verið þekktir fyrir kaupæði sitt og bæði opnun Lindex og bókunarvefjar WOW sýna svart á hvítu að þar hefur engin breyting orðið á.

Álag á vefsíðu WOW

Mótmælendur sjálfum sér til háðungar

Eins fáránlegt og það var að leyfa "tjaldbúðir" mótmælenda á Austurvelli, er það jafn skammarlegt hvernig mótmælendurnir ganga um völlinn og subbuskapurinn sem einkennir allra þeirra umgengni á staðnum er þeim til mikillar skammar.

Borgaryfirvöld hljóta að sjá til þess að hreinsa Austurvöll strax á morgun, því þó meirihlutinn hafi sýnt og sannað í sumar að snyrtimennska sé ekki hans sterka hlið, eins og opin svæði borgarinnar sýndu svo ekki varð um villst, þá er of langt gengið að líða þennan sóðaskap í hjarta borgarinnar.

Eins sjálfsagt og það er að mótmæla því sem fólki finnst miður fara, þá er jafn sjálfsagt að umhverfinu sé sýndur sá sómi að umgengni sé eins og siðuðu fólki sæmir.

Slæm umgengni á Austurvelli

Skattabrjálæðið í hnotskurn

Skattabrjálæði ríkisstjórnarinnar ríður ekki við einteyming og allt skal skattlagt í drep, sem nokkur leið er að skattleggja til heljar, hvort sem um er að ræða skattpíningu einstaklinga eða fyrirtækja, stórra og smárra.  Nýjasta æðiskastið beinist að hrikalegri skattlagningu orkufreks iðnaðar og reynt að fegra geggjunina með því að þetta sé gert í þágu náttúru- og loftlagsverndar, enda heldur Steingrímur J. að með slíkum "röksemdum" sé auðveldara að troða áróðrinum ofan í þjóðina.

Eftirfarandi klausa úr fréttinni segir allt sem segja þarf um málið:  „Miðað við framleiðsluáætlanir Elkem Ísland ehf. mun fyrirhuguð álagning kolefnisgjalds sem lögð verður á félagið verða u.þ.b. 430.000.000 kr. árið 2013, 645.000.000 kr. árið 2014 og 860.000.000 kr. árið 2015. Fyrirhugað kolefnisgjald verður því meira en tvöfalt hærri upphæð en meðalhagnaður fyrirtækisins undanfarin tíu ár. Má því vera ljóst að allar forsendur fyrir frekari rekstri Elkem Ísland ehf. í framtíðinni verða gerðar að engu, en fyrirtækið hefur verið ein af meginstoðum atvinnulífs á Vesturlandi í rúmlega 30 ár.“  

Vinstri grænir hafa alltaf verið heiftúðugir hatursmenn allrar atvinnuuppbyggingar í landinu og alveg sérstaklega þeirru gríðarlegu hagsæld sem fylgt hefur orkufrekum iðnaði.  Nægir að benda á Hafnarfjörð, Reyðarfjörð og Akranes til sönnunar um þau gífurlegu áhrif sem stóriðjufyrirtækin hafa á nærumhverfi sitt.

Greinilegt er á öllu að VG ætlar að ná því markmiði að koma í veg fyrir frekari stóriðju í landinu og tortíma þeirri sem fyrir er með skattabrjálæði.  

Þjóðin hlýtur að rísa upp og gera allt sem í hennar valdi stendur til að vernda lifibrauð sitt. 

Loka ef skattur verður lagður á

Pálmi í snú - snú

Krakkar hafa gaman af að leika sér í snú - snú og sá vinnur leikinn sem lengst getur hoppað án þess að bandið flækist í fótum hans. Banka- og útrásargengin iðkuðu einskonar fjármálalegt snú - snú, sem fólst í alls kyns vafasömum lánavafningum, peningafærslum milli tuga eða hundraða leynifélaga um allan heim og milljarða arðgreiðslum til sjálfra sín, án þess að hafa nokkurn tíma lagt fram eigið fé eða ábyrgðir.

Pálmi í Iceland Express er enn að leika alls kyns fjármálalegt hopp og hí og eftir að hafa náð að "bjarga" IE og flugfélaginu Astraeus út úr Fons með laufléttu snú - snú, rétt fyrir gjaldþrot þess félags, hafa bæði félögin ásamt Ferðaskrifstofu Íslands hoppað í snúningsbandinu og tekist að halda sér á lofti þangað til Astreus flækist nú í sveifluspottanum og flýgur beint á hausinn.

Svo "heppilega" vill þó til að sama dag og Astraeus verður þessi fótaskortur hefur tékkneskt flugfélag áætlunarflug fyrir IE, en þar sem það félag hefur ekki leyfi til Ameríkuflugs er sú áætlunarleið "tekin til endurskoðunar" samdægurs og tilkynnt að allt sé óvíst um framhaldið og viðskiptavinir sem ætluðu með félaginu vestur um haf næstu mánuði, verði einfaldlega sendir með Icelandair.

Vonandi mun hrun Astraeus ekki koma illa niður á farþegum IE. Einhvern tíma hefði svona snúningur verið kallaður "handstýrt gjaldþrot", en líklega mun enginn kippa sér umm við svona leikfléttur lengur.

Astraeus komið í slitameðferð

Hver er stefna VG?

Björn Valur Gíslason, þingmaður VG og frægur að endemum vegna ýmissa furðuyfirlýsinga, skrifar á vefsíðu sinni um landsfund Sjálfstæðisflokksins og setur þar, rétt einu sinni, fram fúkyrði og fullyrðingar út í loftið um mál, sem hann hefur enga hugmynd um.

Björn Valur þekkir sjálfsagt vinnubrögð á samkomum VG, en sýnir með færslu sinni að hann hefur enga þekkingu á lýðræðislegri umræðu og afgreiðslu mála á þingum annarra flokka, a.m.k. ekki Sjálfstæðisflokksins.

Fyrir landsfundi Sjálfstæðisflokksins lá uppkast að ályktun um utanríkismál og þar á meðal um að flokkurinn ítrekaði fyrri afstöðu sína um að hagsmunum Íslands væri best borgið utan ESB, en ekki orðað þannig að aðildarviðræðum skyldi hætt nú þegar. Eftir miklar umræður og skoðanaskipti á fundinum komu fram tvær breytingartillögur þar sem orðalagið var á þann veg að aðildarviðræður bæri að stöðva nú þegar.

Þriðja breytingartillagan og sú sem samþykkt var sem stefna Sjálfstæðisflokksins í málinu hljóðaði á þann veg að "hlé" skyldi gert á aðildarviðræðunum við ESB og ÞÆR EKKI TEKNAR UPP AFTUR NEMA SlÍKT YRÐI SAMÞYKKT Í ÞJÓÐARATKVÆÐAGREIÐSLU. Skýrari getur afstaða flokksins varla orðið og ekkert hægt að misskilja eða hártoga í því sambandi.

VG segist vera á móti innlimun landsins í ESB, en samþykkti eftir sem áður að óska eftir innlimuninni í stórríkið væntanlega.

Getur Björn Valur Gíslanson útskýrt þann tvískinnung fyrir fólki sem ekki skilur slíkan þankagang?

Stefnulaus og þverklofinn

Framtíðarleiðtogi þjóðarinnar

Landsfundur Sjálfstæðisflokksins, sem nú stendur yfir, einkennist af samheldni, styrk og baráttuanda, sem mun smitast út í þjóðfélagið og skila flokknum stórauknu fylgi í næstu kosningum. Vonandi verða þær kosningar fljótlega, því ótækt er að leggja þá ánauð á þjóðina að þurfa að sitja uppi með ríkisstjórn Jóhönnu og Steingríms fram á mitt ár 2013.

Í bland við umræður og afgreiðslur stefnumála, héldu fyrrverandi formenn flokksins frábærar ræður, hvor með sínum stíl og síðar fluttu frambjóðendur í formannskjöri mál sitt fyrir troðfullum sal Laugardalshallarinnar.

Bjarni Benediktsson talaði eins og góðum stjórnmálamanni og foringja sæmir, en með ræðu sinni sannaði Hanna Birna Kristjánsdóttir að hún ber höfuð og herðar yfir alla sem að stjórnmálum koma í landinu um þessar mundir. Ræða hennar var afar yfirgripsmikil og tók á öllum helstu málum sem brunnið hafa á almenningi undanfarin ár og ríkisstjórninni hefur algerlega mistekist að greiða úr.

Bæði fór hún vel yfir þjóðmálin í heild, ásamt því að ræða stöðu, stefnu og framtíðarmarkmið Sjálfstæðisflokksins og sannarlega átti hún hvert bein í landsfundarfulltrúum, sem fögnuðu henni heitt og innilega með margendurteknu lófataki og hvað eftir annað risu áheyrendur á fætur til merkis um fögnuð sinn vegna boðskapar hennar.

Ólöf Nordal hélt síðan sköruglega ræðu til að minna á framboð sitt til varaformanns og fékk hún einnig geysigóðar viðtökur funarmanna við boðskap sínum til fundarins.

Eftir ræðu Hönnu Birnu á fundinum, til viðbótar við það sem hún hefur sýnt með störfum sínum fram til þessa, verður öðru varla trúað en að hún muni verða kjörin næsti formaður Sjálfstæðisflokksins og þar með framtíðarleiðtogi þjóðarinnar. Sjálfstæðisflokkurinn gæti litið stoltur til framtíðarinnar með Hönnu Birnu sem formann og Ólöfu í varaformannsembættinu.

Ekki síður mætti þjóðin verða stolt og ánægð með slíka leiðtoga á Alþingi og í ríkisstjórn.

Stjórnin sér háa skatta í hillingum

Skortsala í tuskubúðum

Gríðarlegur skortur hefur verið í landinu á ýmsum tuskum sem nauðsynlegar eru til að hylja nekt og verjast kuldatíðinni sem geysað hefur í landinu undanfarnar vikur, eins og sannaðist eftirminnilega þegar versluninni Lindex tókst að fá heilan skipsfarm af ýmsum tuskuvarningi til landsins nýlega.

Skipsfarmurinn seldist upp á þrem dögum, eftir örvæntingarfulla baráttu viðskiptavina um varninginn, en til allrar hamingju tókst eigendum verslunarinnar með ótrúlegri útsjónarsemi að ná nokkru magni fatnaðar til landsins á ný, þannig að enn hefur skapast örtröð langþurfandi fataleysingja á staðnum, enda óvíst hvort nokkur fatnaður muni fást í landinu næstu mánuði eða misseri.

Heyrst hefur að skortur sé á fleiri nauðsynjavörum og því skyldi fólk ekki taka áhættu á að bíða með að kaupa upp alla hugsanlega vörulagera sem hugsanlega gætu leynst í skúmaskotum verslana í landinu.

Fyrstur kemur, fyrstur fær.  Málið er ekki flóknara en það, að sá sem ekki mætir fyrstur á það á hættu að líða áframhaldandi skort.

Biðröð við mátunarklefana

Ekkert veit ég um.......

Ekkert veit ég um aflandsfélög ríkisbankanna fyrir einkavæðingu.

Ekkert veit ég um störf Gunnars Þ. Andersen í stjórnum aflandsfélaga Landsbanka Íslands á meðan bankinn var í ríkiseigu.

Ekkert veit ég um verksvið eða starfsemi aflandsfélaga ríkisbankanna fyrir einkavæðingu þeirra.

Ekkert veit ég um störf Gunnars Þ. Andersen hjá Fjármálaeftirlitinu.

Ekkert veit ég um rannsóknir FME á bönkunum eftir einkavæðingu þeirra og fram að hruni.

Það sem maður þykist þó vita, er að eftir einkavæðingu bankanna voru framkvæmd bankarán innanfrá og alls kyns starfsemi sem hlýtur að hafa verið algerlega löglaus eða siðlaus, nema hvort tveggja hafi verið.

Það eina sem maður veit nokkurn veginn fyrir víst, er að Eva Joly var búin að spá því að banka- og útrásargengin myndu vinna að því öllum árum að eyðileggja mannorð allra sem að rannsóknum málanna kæmu og ekki síður reyna að drepa orðspor allra stofnana réttarkerfisins á Íslandi sem að málunum myndu vinna.

Það eina sem liggur fyrir akveg kristaltært, er að Sigurður Guðjónsson, hrl., er helsti verjandi banka- og útrásargengjanna og hefur verið handbendi þeirra árum saman og því augljóslega einn þeirra sem beitt verður í baráttunni gegn sakfellingu gengjameðlimanna sem hruninu ollu.

Eðli málsins samkvæmt er rétt að fara varlega í að taka afstöðu til hæfis eða vanhæfis þeirra sem að rannsóknum sakamála vinna um þessar mundir.

„Óheft mannorðsmorð“