AGS staðfestir að ríkisstjórnin laug að almenningi

Julie Kozack, yfirráðherra AGS yfir Íslandi, staðfesti á blaðamannafundi í dag, að allt sem ríkisstjórnin sagði og hótaði þjóðinni ef hún samþykkti ekki þrælasamninginn um Icesave var eintóm lygi og blekkingar, eins og andstæðingar þrælalaganna héldu fram allan tímann sem umræður um málið fóru fram.

Í fréttinni segir t.d: "Fram kom í máli Kozack, að vinnan við fimmtu endurskoðunina hafi meðal annars snúist um að kanna áhrif á höfnun ríkisábyrgðar á skuldbindingum í tengslum við Icesave-málið á stöðu efnahagsmála. Niðurstaðan hafi verið sú að staðan í málinu mun ekki hafa áhrif á fjárfestingu hér á landi í ár.Fram kemur í skýrslu sjóðsins um fimmtu endurskoðunina, að sérfræðingar AGS gera ráð fyrir að fjárfesting muni aukast um tæp 17% í ár og 18,5% á næsta ári. Kozack sagði það til marks um lítil áhrif Icesave-deilunnar á stöðu mála, að alþjóðlegu lánshæfismatsfyrirtækin hafi ekki lækkað lánshæfismat ríkisins í kjölfar þjóðaratkvæðagreiðslunnar og að stjórnvöld séu að fara ráðast í skuldabréfaútboð erlendis á næstunni."

Ríkisstjórnin hélt því einmitt statt og stöðugt fram, fyrir atkvæðagreiðsluna um Icesave, að allt þetta myndi gerast, þ.e. lánshæfismat myndi lækka, erlendir fjárfestar myndu forðast landið og allir lánsfjármarkaðir myndu lokast.  Þetta myndi svo aftur dýpka og lengja kreppuna, en sú staðhæfing er notuð eftir hendinni af ráðherrunum, því stundum geta þeir ekki lýst ánægju sinni nógsamlega með hvað efnahagslífið sé í mikilli framför og að kreppan sé nú þegar að baki.

Allt, sem ríkisstjórnin segir um efnahags- og atvinnumál eru ósannindi og það hefur nú verið staðfest af Alþjóða gjaldeyrissjóðnum.

Miðað við álit ráðherranna sjálfra á mikilvægi AGS fyrir endurreisnina, þarf varla frekari vitna við. 

Engin áhrif á fjárfestingar í ár

Ráðherrar VG tala tungum tveim

Boðuð fangelsisbygging kemst ekki í gang, frekar en margt annað hjá ríkisstjórninni, vegna þess að ekki næst samkomulag milli tveggja ráðherra VG um hvernig skuli að málinu staðið.Steingrímur J., fjármálaráðherra, er svo ekki einu sinni sammála sjálfum sér varðandi stöðu ríkissjóðs, því stundum heldur hann því fram að kraftaverk hafi verið unnið í ríkisfjármálunum og staða ríkissjóðs góð eftir því, t.d. sagði hann ekkert mál fyrir ríkissjóð að taka á sig tug- eða hundruðmilljarða greiðslu vegna Icesave, en nú segir hann að ríkissjóður sé svo blankur, að tveir milljarðar í fangelsisbyggingu myndi setja fjármál ríkissins algerlega á hvolf.

Sem svar við fyrirspurn í þinginu sagði Steingrímur J. m.a:  "Þetta er framkvæmd upp á um tvo milljarða króna. Og háttvirtur þingmaður [Gunnar Bragi] veit alveg hvað það þýðir ef við förum að taka það inn á fjárlög á þessum erfiðu árum. Þess vegna hefur það verið skoðað hvort hægt væri að fara aðrar leiðir í þeim efnum."

Í Maí sagði Ögmundur Jónasson, Innanríkisráðherra og flokksbróðir Steingríms J  "Frá okkar hálfu er þetta aðeins spurning um að fá grænt ljós á málið [frá fjármálaráðuneytinu]."  Varla er mikil von til þess að mál gangi vel hjá ríkisstjórninni, þegar samflokksmenn í ráðherraembættum geta ekki náð sátt sín í milli um hvernig staðið skuli að framkvæmdum og hvað þá að hægt sé að reikna með samstöðu milli stjórnarflokkanna tveggja eða ráðherranna almennt.

Kjarasamningar eru að komast í uppnám vegna aðgerða og aðgerðaleysis ríkisstjórnarinnar.  Það er sagan endalausa um þessa ríkisstjórn. 

Fangelsismál föst í ríkisstjórn

Íslendingar, til hamingju með daginn

Íslendingum öllum er óskað til hamingju með sjómannadaginn og þá auðvitað sjómönnum og fjölskyldum þeirra alveg sérstaklega.

Fiskveiðar og vinnsla afla a.m.k. þriðjungs þjóðarteknanna og u.þ.b. helmings gjaldeyristeknanna og því mikilvægasti atvinnuvegur þjóðarinnar, en því miður vanmetinn af mörgum sem halda jafnvel að þjóðarauðurinn verði til í tuskubúðum og leikfangaverslunum fyrir börn og fullorðna.

Það eina sem skyggir á ánægju og gleði vegna sjómannadagsins núna, eru illa undirbúin og vanhugsuð frumvörp ríkisstjórnarinnar um fiskveiðistjórnunina, enda ekki einu sinni samstaða um þau innan og milli stjórnarflokkanna og flest, ef ekki öll, hagsmunasamtök útgerðarmanna og sjómanna hafa mótmælt þeim harðlega.

Samkvæmt hugmyndum stjórnarinnar á að færa sjávarútveginn áratugi aftur í tímann með því að gera a.m.k. hluta fiskveiða og vinnslu að félagslegu úrræði fyrir íbúa á landsbyggðinni með þeim falsrökum að kvótakerfið hafi stuðlað að fólksfækkun utan höfuðborgarsvæðisins, þrátt fyrir þá staðreynd að sú fækkun á sér rætur langt aftur fyrir kvótasetningu og á sér miklu dýpri rætur en atvinnumálin á viðkomandi stöðum.

Verði þessi frumvörp að lögum óbreytt munu þau verða til verulegrar tekjuskerðingar fyrir þá sjómenn, sem starfa nú innan kerfisins, en munu hinsvegar líklega fjölga skipum og sjómönnum sem keppast við að veiða þann takmarkaða afla, sem í boði er og valda þannig mikilli óhagræðingu í sjávarútvegi, bæði fyrir fyrirtækin og starfsfólkið.

Sátt mun ekki nást um fiskveiðistjórnunina, fyrr en vankantar verða sniðnir af þessum frumvörpum, framsal aflaheimilda verði að mestu bannað og einhver leið verði til að hleypa nýjum aðilum inn í greinina, án þess að fórna hagkvæminni í leiðinni.

Hverning sem fer um stjórnun fiskveiðanna, verða sjómenn áfram hetjur hafsins og þjóðarinnar.

Látum ekki fiskimiðin af hendi

Pólitísk réttarhöld

Það, að saksóknari Alþingis hyggist reka mál Jóhönnu Sigurðardóttur og Steingríms J. á hendur Geir H. Haarde á vefsíðu embættisins, gengur fram af flestum, enda nýnæmi að reka mál bæði í réttarsal og fyrir dómstóli götunnar.

Að Geir H. Haarde skuli einum vera stefnt fyrir Landsdóm og ákærður fyrir óljósar og matskenndar sakir, er hneyksli út af fyrir sig og líklega ekki við öðru að búast en að málareksturinn verði í samræmi við það.

Landsdómur hefur aldrei verið kallaður saman fyrr til þess að dæma um "glæpi" ráðherra og því alveg með ólíkindum að þegar það er svo gert, skuli það vera vegna pólitísks hefndarþorsta eintakra ofstækismanna, sem reyna þannig að ná sér niðri á pólitískum andstæðingi.

Fordæmið hefur verið gefið og strax við næstu stjórnarskipti hlýtur að mega gera ráð fyrir að a.m.k. Jóhönnu Sigurðardóttur og alveg sérstaklega Steingrími J. verði stefnt fyrir Landsdóm vegna þeirra svika og óhæfuverka, sem þau hafa unnið gegn þjóðinni á þessu kjörtímabili.

Nægir að nefna Icesave og vogunarsjóðavæðingu bankanna á kostnað skuldugra heimila sem ástæðu til stefnu fyrir Landsdóm. 

Saksóknari tapað áttum?

Ómarktækur seðlabanki

Seðlabankinn er sú stofnun sem á að halda utan um ýmsar tölulegar upplýsingar um stöðu þjóðarbúsins og gefur jafnframt út spár um fjárhagslega framtíð þjóðarbúsins og afkomu þess.

Á undanförnum misserum hefur seðlabankinn sagt að erlendar skuldir þjóðarbúsins væru ekki hærri en svo, að jafnvel þó ríkissjóður tæki á sig stórkostlegar skuldbindingar vegna Icesave, þá væri staðan vel viðráðanleg og myndi ekki setja peningalega stöðu þjóðarinnar í neina hættu.

Reiknimeistarar seðlabankans eru þó ekki nákvæmari í útreikningum sínum en það, að þeir hafa vanmetið erlendu skuldastöðuna um tæplega 100%, eða eins og segir í fréttinni: "..að hreinar erlendar skuldir þjóðarbúsins, að gömlu bönkunum undanskildum, voru til að mynda um 827 milljarðar á fjórða ársfjórðungi 2010 í stað þeirra 434 milljarða sem áður hafði verið gert ráð fyrir."

Svona skandall í útreikningum á lykiltölum í þjóðarbúskapnum myndi í öllum siðmenntuðum löndum leiða til afsagnar seðlabankastjórans og annarra lykilmanna bankans sem eiga að bera ábyrgð á trúverðugleika hans.

Héðan í frá verður að taka allt sem frá seðlabankanum kemur með mikilli varúð, enda ekki hægt að treysta neinu sem þaðan kemur, miðað við þetta hneyksli sem upp er komið vegna vitleysunnar um erlendu skuldirnar. 

Skuldir þjóðarbúsins mun hærri

Ótrúleg handarbakavinna í kvótamálunum

Mánuðum og misserum saman hafa frumvörp um fiskveiðistjórnun og veiðiheimildir velkst á milli stjórnarflokkanna, án þess að nokkurt raunverulegt samkomulag hafi náðst um útfærslur þessara mála.

Í algerri örvæntingu vegna komandi þingloka samþykkti stjórnin svo að sjávarútvegsráðherra skyldi leggja frumvörpin fyrir þingið, en með fylgdu yfirlýsingar ýmissa stjórnarþingmanna um að þau væru aðeins lögð fram til umræðu og umfjöllunar í þinginu og nefndum þess og þar yrði þau lagfærð og þeim breytt í viðunandi og nothæft form.

Málin eru lögð fram án þess að nokkur úttekt hafi verið gerð á áhrifum þeirra á sjávarútveginn sjálfan og hvað þá þjóðarhag, en fyrstu viðbrögð bæði samtaka útgerðarmanna og sjómanna sýna svart á hvítu efasemdirnar um hagkvæmnina og greinilega verður engin sátt í þjóðfélaginu um þær útfærslur, sem frumvörpin gera ráð fyrir.

Í fréttinni segir m.a: "Jón mælti fyrir frumvarpinu án þess að hagfræðinganefnd, skipuð af ráðherranum vegna málsins, hafi verið búin að skila af sér áliti nefndarinnar."

Burtséð frá áliti fólks á núverandi fiskveiðistjórnunarkerfi hljóta allir að viðurkenna að svona vinnubrögð séu algerlega forkastanleg og óboðleg. 

Álit nefndar í næstu viku

Bíræfnir hvalaskoðunarmenn

Það verður að teljast ótrúleg ósvífni af samtökum hvalaskoðunarfyrirtækja að taka upp formlegt samband við Alþjóðlega dýraverndunarsjóðinn (IFAW) í því skini að berjast gegn annarri atvinnugrein í landinu.

Í fréttinni segir þetta m.a: "IFAW mun taka höndum saman með Hvalaskoðunarsamtökum Íslands, Icewhale, og hvetja ferðamenn til að fara í hvalaskoðunarferðir en sleppa því að leggja sér hvalkjöt til munns á veitingastöðum."

Að ein atvinnugrein skuli taka höndum saman við erlend samtök um að berjast gegn bæði hvalveiðum og neyslu hvalaafurða á veitingastöðum landsins, er svo yfirgengilegt að íslenskur almenningur verður að berjast gegn slíkum yfirgangi og öfgum.

Hvalveiðar, hvalaskoðun og neysla hvalkjöts getur vel farið saman og hefur það sannast t.d. við Reykjavíkurhöfn, þar sem veitingahús bjóða upp á hvalkjöt við bryggjusporðinn þar sem hvalaskoðunarfyrirtækin stunda sína starfsemi.  Ferðamönnum þykir forvitnilegt að sjá hvalina úti á rúmsjó og smakka síðan afurðirnar þegar í land er komið.

Nóg er um öfgarnar í þessu þjóðfélagi, þó einstakar atvinnugreinar taki ekki upp samstarf við erlenda aðila og lýsi yfir stríði við aðrar greinar atvinnulífsins, þar á meðal þau fyrirtæki sem þjónusta viðskiptavini hvalaskoðunarfyrirtækjanna.

 

Ferðamenn skoði hvali en borði þá ekki

Árás "Velferðarstjórnarinnar" á lífeyrisþega

Nýjasta afurð hugmyndabanka Jóhönnu og Steingríms J. í skattageggjuninni er að leggja aukaskatta á lífeyrisþega, með því að skerða greiðslur til þeirra með aukaskatti á lífeyrissjóðina til að fjármagna "sérstaka niðurgreiðslu vaxta" vegna húsnæðisskulda.

Stjórn Landssambands eldri borgara bendir á það, í ályktun sinni, að lífeyrissjóðirnir "eiga" engar peninga, heldur eru þeir í raun aðeins tæki til að halda utan um réttindi sjóðfélaga, sjá um að ávaxta iðgjöld þeirra og greiða út lífeyri í hlutfalli við áunnin réttindi hvers og eins.

Við útgreiðslu er lífeyrir skattlagður eins og aðrar tekjur og því liggur í augum uppi, allra annarra en ráðherranna skattaóðu, að þessi nýjasta skattaáþján þeirra er ekkert annað en ódulbúinn aukaskattur á elli- og örorkulífeyrisþega og verður ekki til neins annars en að rýra tekjur þeirra í framtíðinni.

"Velferðarstjórnin" stendur sannarlega ekki undir nafni í þessu máli, frekar en öðrum.
Hvers eiga lífeyrisþegar að gjalda, til viðbótar við aðrar árásir þessarar stjórnar á kjör þeirra?

Eldri borgarar mótmæla lífeyrisskatti

Skattahækkanabrjálæðið í hnotskurn

Félag íslenskra bifreiðaeigenda hefur marg bent á skattahækkanabrjálæðið sem yfir bifreiðaeigendur, sem auðvitað eru flestir fullorðnir Íslendingar, hefur dunið undanfarin tvö ár og forsvarsmenn félagsins ítrekað farið fram á að einhverjar þessara hækkana verði dregnar til baka.

Steingrímur J. hefur svarað þeirri beiðni með útúrsnúningum og t.d. sagt að hann ráði ekki heimsmarkaðsverði á olíu og ekkert muni um nokkurra krónu lækkun olíu- og bensínskatta vegna hins háa innkaupsverð. Ríkissjóður hirðir nú um 115-120 krónur í skatta af hverjum bensínlítra, en ekki er langt síðan útsöluverðið á hverjum lítra fór upp fyrir 100 krónur á lítrann. Þá voru skattarnir u.þ.b. 40 krónur á líterinn, þannig að skattahækkunin í krónum talið er langt á annað hundrað prósentið síðan þar var.  Þó skattarnir væru lækkaðir um allt að 50 krónum á hvern líter, væru skatttekjur ríkissjóðs samt sem áður umtalsvert meiri en þær voru fyrir t.d. tveim árum.

Skattabrjálæðið lýsir sér vel í eftirfarandi tölfræði frá Vegagerðinni: "Gífurlegur samdráttur er í umferð á þjóðveginum á Hellisheiði milli ára. Þetta kemur fram í nýjum tölum Vegagerðarinnar en samkvæmt þeim fóru 22% færri bílar um veginn í maí en í sama mánuði í fyrra.Sé litið á þróunina eftir landshlutum kemur í ljós að samdrátturinn milli mánaða er mestur á Suðurlandi eða 19,9%, 15,1% á Vesturlandi, 13,4% á Norðurlandi, 12,7% á Austurlandi og 4,5% á höfuðborgarsvæðinu."  

Samkvæmt spá Vegagerðarinnar verður metsamdráttur í umferðinni á þessu ári og auðvitað er skýringin engin önnur en skattahækkanabrjálæðið og sá minnkandi kaupmáttur sem því fylgir.

Ofan á þetta bætist svo allt annað brjálæði í skattheimtu sem yfir landslýð hefur dunið á undanförnum tveim árum og boðað er áframhaldandi, með tilheyrandi áhrifum á kaupmátt almennings og koðnun atvinnulífsins, sem aftur speglast í litlum sem engum efnahagsbata og framlengingu kreppunnar. 

Gífurlegur samdráttur í umferð

Andrés hefur unnið þrekvirki með Skólahreysti

Þegar Andrés Guðmundsson, fyrrv. kraftakarl, stofnaði til íþróttakeppni með nýstárlegu sniði, undir nafninu Skólahreysti, á milli efstu bekkja grunnskólanna tóku aðeins nokkrir skólar þátt og fáir reiknuðu með að hugmyndin og framkvæmdin yrðu langlíf.

Á þeim tiltölulega fáu árum sem keppnin hefur verið haldin, hefur henni vaxið fiskur um hrygg ár frá ári og nú er svo komið að flestir grunnskólar landsins taka þátt í henni og áhugi krakkanna er gríðarlega mikill, eins og sést hefur í útsendingum sjónvarpsins undanfarna vetur.

Skólahreysti hefur nú vakið athygli erlendis og var haldið kynningarmót í Finnlandi, þar sem sigurvegar síðast liðins vetrar, lið Holtaskóla, tók þátt og vann glæsilegan sigur, þó það sé í raun ekki aðalatriði málsins, heldur sú landkynning sem í þessu framtaki felst.

Andrés Guðmundsson og eiginkona hans hafa unnið algert þrekvirki með uppbyggingu þessarar keppni og greinilega eflt íþróttaáhuga grunnskólanema til mikilla muna.

Þetta er ein af fáum góðum og jákvæðum fréttum á þessum síðustu og verstu tímum.

Holtaskóli sigraði í skólahreysti í Finnlandi