Þetta skilja allir nema ríksisstjórnarnefnan

Því hefur lengi verið haldið fram hér, að ríkisstjórnarnefnan vinni að því dag og nótt, með allri sinni orku og getu- og hugmyndaleysi, að því að lengja og dýpka kreppuna um mörg ár, frá því sem annars hefði orðið.

Það er hún að gera, óháð baráttu sinni fyrir Icesave ánauðinni, sem hún vill steypa þjóðinni í og mun setja hana í þrælahlutvert fyrir Breta og Hollendinga í tuttugu ár, hið minnsta. 

Þessi orð Daniel's Gros, hagfræðings og stjórnarmanns í Seðlabankanum, segja það, sem segja þarf:  „Spurningin er ekki hvort Íslendingar geta staðið við skuldbindingarnar. Ég held að þeir geti það, en þá þurfa Íslendingar að sætta sig við umtalsverða lífskjaraskerðingu. Neysla af öllu tagi þarf að dragast saman og kaupmáttur sömuleiðis. Það eru óhjákvæmilegar afleiðingar þess að takast slíkar skuldbindingar á hendur.“

Þetta sama hefur fjöldi hagfræðinga bent á, en hins vegar þarf enga hagfræðikunnáttu til að sjá þetta fyrir.  Þetta er svo einfalt, að það er skiljanlegt fyrir flesta aðra, en ráðherranefnurnar íslensku og fáeina trygga sporgöngumenn þeirra.

Því miður verður það skilnings- og getuleysið, sem mun verða til þess að Bretar og Hollendingar munu halda íslendingum í þrælaánauð næstu áratugina.

 

Skert lífskjör og kaupmáttur

Grínútnefning ársins

Baugstímaritið Nýtt líf hefur valið Jóhönnu Sigurðardóttur, forsætisráðherralíki, konu ársins og hefði það komið gjörsamlega á óvart, ef ekki væri fyrir eiganda tímaritsins.

Mesti brandarinn við útnefninguna er forsendan fyrir henni, eða eins og þar segir:  "Í umsögn ritstjórnar tímaritsins segir að frá lýðveldisstofnun hafi sennilega enginn stjórnmálamaður staðið frammi fyrir jafnögrandi verkefni og Jóhanna geri nú."

Þetta hlýtur að vera í fyrsta skipti í veraldarsögunni, sem einhver er verðlaunaður fyrir að standa frammi fyrir ögrandi verkefni.

Venjulega er fólk heiðrað fyrir að hafa leyst ögrandi og vandasöm verkefni vel af hendi, en ekki bara fyrir að standa frammi fyrir þeim.

Nýtt líf hlýtur að verða útnefnt tímarit ársins, fyrir að verðlauna aðila, sem stendur ráðalaus frammi fyrir verkefnum sínum, hvort sem þau eru ögrandi eða ekki.

 

 

Jóhanna valin kona ársins

Undarlegt uppgjör

Fyrr í dag bárust fréttir af því, að Bjarni Ármannsson og/eða félög í hans eigu, væru með fjögurra milljarða kröfur í þrotabú gamla Glitnis, án þess að nánar væri útlistað í hverju þessar kröfur væru fólgnar.

Nú kemur frétt um að Bjarni og Glitnir hafi gert samkomulag um endurgreiðslu á yfirverði, sem hann fékk við sölu hlutabréfa sinna í bankanum, þegar hann lét af störfum í bankanum í apríl 2007.  Þetta munu vera um 650 milljónir króna, sem Jón Ásgeir samþykkti sem yfirverð á bréfin og áður hafði Bjarni endurgreitt 370 milljóna króna starfslokagreiðslu. 

Á þessum árum verðlögðu þessir garkar sig hátt og t.d. "keypti" Jón Ásgeir og félagar sér nýjan bankastjóra frá Landsbankanum og greiddu honum 300 milljónir fyrir að mæta í vinnuna.  Sá bankastjóri var einn af upphafsmönnum Icesave, ef rétt er munað, og þar sem Icesave þótti vera "tær snilld", gátu tæru snillingarnir selt sig dýrt, eftir að hafa fundið upp á "snilldarverkunum".

Það skrýtnasta við tilkynningu Glitnis er eftirfarandi setning:  ""Um fullnaðaruppjör milli aðila er að ræða sem felur auk þessa í sér að félög Bjarna, sem eiga u.þ.b. 273 milljóna króna skuldabréfakröfur á bankann, falla frá greiðslukröfum á hendur bankanum. Ekki eru uppi aðrar kröfur Bjarna eða félaga hans á hendur bankanum," segir í tilkynningu frá skilanefndinni."

Eru þá tæpir fjórir milljarðar gufaðir upp frá því í morgun?

Þannig spyrja menn, sem skilja varla svona upphæðir, né uppgjör á þeim.

Bjarni endurgreiðir Glitni

Ekkert gert til að örva atvinnulífið

Atvinnuleysi í nóvember var skráð 8% og hafði fjölgað á atvinnuleysisskrá um 675 manns í mánuðinum, eða um 5,3%. 

Vinnumálastofnun spáir, að atvinnuleysi geti farið upp í allt að 8,6% í desember og yrðu þá um 14.400 manns atvinnulaus í jólamánuðinum, þ.e. rúmlega 1.000 fleiri, en í nóvember.

Þetta kemur m.a. fram í skýrslu Vinnumálastofnunar:  "Yfirleitt versnar atvinnuástandið frá nóvember til desember. Þróun síðustu vikna bendir til að svo verði einnig raunin í ár, en erfitt er að áætla atvinnuleysi um þessar mundir vegna mikillar óvissu í efnahagslífinu. Vinnumálastofnun áætlar að atvinnuleysið í desember 2009 aukist og verði á bilinu 8,1%-8,6%. Í fyrra var atvinnuleysið 4,8% í desember."

Fram að þessu hefur ríkisstjórnarnefnan ekkert lagt af mörkum til að blása nýju lífi í atvinnuvegina, heldur þvert á móti þvælst fyrir, eins og hún hefur getað, þeim fáu iðnaðarkostum, sem í boði hafa verið.  Með áframhaldi þessarar framkomu gagnvart atvinnulífinu, mun atvinnuleysið aukast til muna á næsta ári.

Þá mun ríkisstjórnarnefnan ekki hafa önnur ráð, en þau sem hún tileinkar sér núna.

Það er að skattpína atvinnulífið og almenning ennþá meira og alveg þar til öll mjólk verður úr kúnni og hún dauð.

Atvinnuleysi 8% í nóvember

Baugsfréttir

DV birtir hverja "stórfréttina" af annarri af hinum ýmsu mönnum, sem blaðið ásakar um brask og skiptir þá engu, hvort viðkomandi tóku þátt í braskinu, eða ekki.

Fyrir nokkrum dögum birti blaðið stórfrétt um "peningaþvott" Jóns Geralds Sullenbergs, sem átti að hafa átt sér stað fyrir nokkrum árum síðan.  Um var að ræða, að Jón Gerald, var milligöngumaður um að bjóða banka að kaupa skuldabréf af erlendum aðila, en ekkert varð af viðskiptunum.  Vandséð er hvernig þetta getur flokkast undir "peningaþvott", ekki síst þar sem engin viðskipti áttu sér stað.

Nú slær DV upp "risafrétt" af braski Bjarna Benediktssonar í Macao og lætur blaðið sig litlu skipta, þá Bjarni hafi hvergi nærri viðskiptunum komið.  Tilgangurinn helgar meðalið í þessu máli, sem flestum öðrum hjá því blaði.

Guðmundur Ólason, fyrrv. forstjóri Milstone, sem í raun stóð í þessum Macao viðskiptum, aftekur með öllu, að Bjarni hafi tekið þátt í þessum viðskiptum og segir m.a. í fréttinni:  " „Bjarni er stjórnarformaður BNT, sem á ekki beinan eignarhlut í Földungi, sem gerir ekki beina fjárfestingu í Makaó, heldur leggur Sjóvá það inn til tryggingar á annarri fjármögnun. Það er því orðið býsna langsótt að tengja nafn Bjarna við þetta brask,“ segir Guðmundur. Aðspurður segir hann að Bjarni hafi ekki getað haft nein áhrif á ákvörðunina um kaupin á Makaó-félaginu."

Viðskipti útrásargarkanna voru mörg og flókin á brask- og bruðltímabilinu og ætti að vera af nógu að taka fyrir DV, til að búa til æsifréttir, þó ekki sé róið á þau mið, að vera sífellt að slá upp ekkifréttum af einstaklingum, sem ekki komu nálægt málunum.

Baugsmiðlarnir keppast við, að semja fréttir, sem hugsanlega gætu komið höggi á andstæðinga ríkisstjórnarnefnunnar og ætti fólk að meðtaka þá fjölmiðla með þetta í huga.

Baugsmenn hafa aldrei hikað við að berja andstæðinga sína niður með öllum tiltækum ráðum og síðasta dæmið um það, er auglýsingabann Baugsara á Moggann, í tilraun þeirra til að gera blaðinu allt til miska á erfiðum tímum.

Kveðst ekki hafa braskað neitt

Eins hægt að skora á vindinn

Um 70% svarenda í skoðanakönnun, sem MMR gerði fyrir Viðskiptablaðið vilja að forsetinn neiti staðfestingar á lögum um ríkisábyrgð á Icesave skuldum Landsbankans.  Þetta ætti að sýna bæði ríkisstjórninni og forsetanum, að þjóðin er tilbúin til þess að taka slaginn gegn þeirri ánauð, sem ESB, Bretar og Hollendingar vilja leggja á hana a.m.k. næstu tvo áratugina.

Forsetinn neitaði að staðfesta fjölmiðlalögin árið 2004 með þeim rökum að gjá hefði myndast milli þings og þjóðar og sleppti meira að segja konungsbrúðkaupi, til þess að vera algerlega viss um að vera á landinu við afgreiðslu þess máls á Alþingi.  Eins og allir vita sleppir Ólafur Ragnar ekki góðri veislu í útlöndum, nem mikið liggi við.  Reyndar er ekki vitað til þess að hann hafi hundsað nokkra aðra veislu, hvorki innanlands eða utan.

Við undirritun laganna um ríkisábyrgðina í ágúst s.l. vísaði hann með sérstakri áritun til fyrirvaranna, sem Alþingi gerði við ábyrgðina og lét líta svo út, að hann staðfesti lögin eingöngu þeirra vegna.

Nú, þegar ríkisstjórnarnefnan hefur látið Breta og Hollendinga neyða sig til að falla aftur frá nánast öllum fyrirvörunum, er Ólafur Ragnar kominn í veruleg vandræði með að finna afsökun til að staðfesta nýju þrælalögin og engum skal detta í hug, að hann myndi nokkurn tíma neita að staðfesta lög frá vinum sínum í ríkisstjórnarnefnunni, frekar en honum datt í hug, að svíkja vin sinn Jón Ásgeir vegna fjðlmiðlalaganna.

Nú liggur Ólafur Ragnar væntanlega á bæn og biður þess að honum verði boðið í gott partý í útlöndum á heppilegum tíma.

Meirihluti vill kjósa um Icesave

Undanfari dómaskriðu

Dómur Héraðsdóms Reykjavíkur um markaðsmisnotkun tveggja starfsmanna Kaupþings vegna markaðsmisnotkunar með hlutabréf Existu er aðeins annar dómurinn, sem fellur í slíku máli, en vænta má, að skriða slikra dóma falli seint á næsta ári.

Athyglisvert er, hve langan tíma tók, frá því að málið var kært og þar til dómur var kveðinn upp, en málinu var vísað til rannsóknar í mars 2008, eða hálfu ári fyrir bankahrun.  Annað, sem vekur athygli, er að mönnunum var vikið frá störfum, á meðan á rannsókninni stóð, en aðrir starfsmenn og eigendur bankans héldu þessari iðju áfram, fram að falli bankanna.

Nægir að nefna viðskiptin við Sjeik Al Tani og önnur sýndarviðskipti, sem jukust og urðu gríðarleg í upphæðum áður en yfir lauk.  Eigendagengi bankans og a.m.k. æðstu stjórnendur hljóta því að mega eiga von á löngum fangelsisdómum, þegar þar að kemur.

En þar sem það tók nítján mánuði fyrir þetta "smámál" að fara í gegnum rannsóknarferilinn og dómstólinn, er ekki hægt að reikna með dómum í alvörumálunum, fyrr en í fyrsta lagi um þetta leyti næsta ár.

Þá hlýtur að falla stór skriða slíkra dóma og síðan vonandi vikulega, vegna bæði banka- og útrásarsvindlara.

Dæmdir fyrir markaðsmisnotkun

Áfangasigur hjá Vilhjálmi gegn Hrunadönsurunum.

Vilhjálmur Bjarnason, lektor og framkvæmdastjóri Félags fjárfesta, hefur verið duglegur að skurka í hrunbönkunum og stundum orðið að láta í minni pokann, en sigrað í öðrum málum.

Nú hefur hann unnið enn einn sigur á hrunbankanum Glitni, en Vilhjálmur hafði krafist þess, að fá afhent gögn vegna þeirrar ákvörðunar bankans, að lána Fons hf., félagi í eigu Pálma Haraldssonar útrásarbraskara, 24 milljarða króna, án tilhlýðilegra veða.

Bankinn neitaði að afhenda gögnin og bar við bankaleynd, en samkvæmt fréttinni komst dómstóllinn að þveröfugri niðurstöðu, eða eins og segir í fréttinni:  "Héraðsdómur segir í niðurstöðu sinni, að Fons sé gjaldþrota og erfitt sé að sjá hvaða hagsmuni það félag hafi af því að þessum upplýsingum sé haldið leyndum. Verði ekki séð að tilefni sé til af hálfu skilanefndar Glitnis að neita Vilhjálmi um aðgang að gögnunum, sem hann biður um."

Ekki er ólíklegt að skilanefndin áfrýji þessum dómi til Hæstaréttar, sem vonandi staðfestir hann.  Verði það niðurstaðan, mun það verða ákaflega stefnumarkandi dómur vegna ýmissa annarra svipaðra mála.

Ástæða er til að óska Vilhjálmi til hamingu með áfangasigurinn í þessu máli og hvetja hann til að halda áfram sínu góða starfi í baráttunni við Hrunadansarana.

Glitni gert að afhenda gögn

Að standa í lappirnar

Ríkisstjórnarnefnan er komin að fótum fram og getur núorðið í hvorugan fótinn stigið, án þess að detta á afturendann.

Jóhanna forsætisráðherralíki, hélt eina af sínum varnarræðum fyrir Breta og Hollendinga í þinginu í morgun, við lok annarrarn umræðu um ánauðarskilmála kúgaranna vegna skulda Landsbankans, og reyndi þar að verja þá afstöðu þeirra, að mátulegt væri á Íslendinga, að þurfa að þræla í þeirra þágu a.m.k. næstu tvo áratugi.

Stjórnarandstaðan hefur á hetjulegan hátt reynt að berjast gegn þessari hlekkjun islenskra skattgreiðenda í þágu erlendra ríkja, en stjórnarþingmenn hafa skammast sín svo, fyrir þjónkun sína, að þeir láta ekki sjá sig í þingsölum og sumir hverjir farnir í frí frá þingstörfum, til þess að þurfa ekki að greiða atkvæði um að hneppa sína eigin þjóð í þrældóm.

Orð Bjarna Benediktssonar, formanns Sjálfstæðisflokksins, sem hann lét falla við umræðuna, segja það sem segja þarf, en hann sagði m.a. þetta: 

" Aldrei myndi nokkur önnur Evrópuþjóð láta fara svona með sig eins og ríkisstjórnin er að leggja til að farið verði með okkur."

„Við eigum að standa í lappirnar í þessu máli og ekki sætta okkur við neina pólitíska afarkosti," bætti hann við.

Þessi orð lýsa pólitísku hugrekki og varnarvilja fyrir íslenska hagsmuni.

Ógæfa þjóðarinnar er, að stjórnarmeirihlutinn skuli vera gjörsamlega rúinn hvoru tveggja.

Afar ólík sýn á Icesave

Hýenur í gjaldeyrisbraski

Brasl með gjaldeyri, frá því að gjaldeyrishöftin voru sett á, nema ótrúlegum upphæðum.  Alveg virðist vera sama hvernig lög eru sett í þessu landi um fjármálastarfsemi, því alltaf er nóg til af glæpamönnum til þess að brjóta þau.

Þessir gjaldeyrisbraskarar virðast hafa óþrjótandi peninga til þess að höndla með, enda margir þeirra með mikla og "góða" reynslu úr bönkunum, ef hægt er að kalla þá banka, frá því fyrir hrun.

Þetta brask, sem líklega nemur á annað hundrað milljörðum króna, hefur haft áhrif til veikingar krónunnar og er því glæpur gegn þjóðinni, sem þarf að líða fyrir stöðu krónunar og áhrifanna á gengis- og verðtryggð lán.

Þessum glæpalýð er ekki hægt að líkja við neitt annað en hýenur, en eins og vita er eru þær hræætur.

Vegna þessara gjaldeyrishýena, munu gjaldeyrishöftin vara lengur en annars hefði orðið.

Hýenur eru ekki skepnur, sem nokkur vill hafa í nálægð sinni.

57 milljarða gjaldeyrisviðskipti rannsökuð