Stóriðjan notuð sem áróðursbragð

Spunameistarar ríkisstjórnarnefnunnar uppgötvuðu það stórsnjalla áróðursbragð, að lauma inn í fjárlagafrumvarpið fyrir árið 2010 svokölluðum stóriðjusköttum, til þess að leiða umræðuna í þjóðfélaginu frá tekjuskattshækkunum á heimilin yfir í þá umræðu, að stóriðjufyrirtækin væru ekki of góð til að taka þátt í byrðum þjóðféagsins af kreppunni.

Áróðursmeistararnir duttu svo seint niður á þetta bragð, að ekki vannst einu sinni tími til að kynna herbragðið fyrir iðnaðarráðherra, sem kom algerlega af fjöllum og félögum sínum í stjórnarnefnunni til mikillar armæðu, nánast eyðilagði hún málið með háværum mótmælum við þessum fáráðlegu hugmyndum, sem allir sáu reyndar strax, að myndu stöðva alla iðnaðaruppbyggingu í landinu til framtíðar.

Jóhanna Sigurðardóttir, forsætisráðherralíki, heldur þó ennþá áfram að slá ryki í augu almennings, með því að segja, að því miður verði ekki komist hjá því að hækka skatta á almenning, en að sjálfsögðu verði að láta stóriðjuna borga sinn skerf.  Hún reynir enn, að leyna því hvers kyns skattahækkanabrjálæði sé fyrirhugað á almenning og til viðbótar við stóriðjuáróðurinn er jafnan tekið fram, að reynt verði að hlífa hinum tekjulægstu með flóknu þriggja þrepa tekjuskattskerfi.

Með þessu er gefið í skyn, að núverandi tekjuskattskerfi sé ekki þrepaskipt, en það er auðvitað alger vitleysa, þar sem persónuafslátturinn gerir það að verkum að tekjuháir greiða hlutfallslega miklu hærri tekjuskatt, en þeir tekjulágu.  Þar fyrir utan er allt bótakerfið tekjutengt og kemur því þeim tekjulágu til góða, en ekki þeim tekjuháu.

Hér fyrir neðan er þetta sýnt í einfaldri töflu, ásamt því að sýna hvernig hægt er að stórhækka skatta, án þess að umbylta því einfalda skattkerfi, sem nú er í gildi og með því að lækka skatta hinna lægstlaunuðu.  Stjórnvöld þurfa ekki að láta eins og það sé eitthvað flókið, að skattpína þjóðina, það þarf einungis að láta reikna út fleiri svona útfærslur og hvað þær gefa ríkissjóði í hækkun tekna.

Í fremri dálki er núverandi þrepaskipti tekjuskatturinn og í þeim síðari einföld hugmynd um hvernig má breyta honum með einföldum hætti, til að skattleggja þá tekjuháu hlutfallslega ennþá meira en þá tekjulágu:

 

	Staðgreiðsla, 37,2%		Staðgreiðsla, 42,2%		Hækkun	Hækkun
	(Persónuafsláttur	Hlutfall af	(Persónuafsláttur	Hlutfall af	skatta	skatta
Laun á mánuði:	kr. 42.205)	tekjum í %	kr. 52.205)	tekjum í %	í krónum	í %
150.000	13.595	9,06	11.095	7,40	-2.500	-18,39
200.000	32.195	16,10	32.195	16,10	0	0,00
300.000	69.395	23,13	74.395	24,80	5.000	7,21
400.000	106.595	26,65	116.595	29,15	10.000	9,38
500.000	143.795	28,76	158.795	31,76	15.000	10,43
600.000	180.995	30,17	200.995	33,50	20.000	11,05
700.000	218.195	31,17	243.195	34,74	25.000	11,46
800.000	255.395	31,92	285.395	35,67	30.000	11,75
900.000	292.595	32,51	327.595	36,40	35.000	11,96
1.000.000	329.795	32,98	369.795	36,98	40.000	12,13
1.200.000	404.195	33,68	454.195	37,85	50.000	12,37
1.400.000	478.595	34,19	538.595	38,47	60.000	12,54
1.600.000	552.995	34,56	622.995	38,94	70.000	12,66
1.800.000	627.395	34,86	707.395	39,30	80.000	12,75
2.000.000	701.795	35,09	791.795	39,59	90.000	12,82

Stóriðjuskattur óhjákvæmilegur

Athugasemdir

[Gullvagninn (IP-tala skráð) 10.11.2009 kl. 14:36]

Hvers vegna les maður mun vandaðri umfjöllun á blogginu heldur en hjá fréttamannalíkunum?  Ég er ekki viss hvort þeir séu gervi-fréttamenn, eða bara dauðir úr öllum æðum, óhæfir, ónýtir, óvita ofvaxin börn sem aldrei hafa yfirgefið pilsfaldinn, skipt út pilsfaldi mömmu fyrir pilsfald ríkis og stofnana og spunameistara þeirra.

[Benedikta E, 10.11.2009 kl. 14:51]

Takk fyrir skilmerkilega og gagnlega færslu - Takk - !

[Jón Óskarsson (IP-tala skráð) 10.11.2009 kl. 19:50]

Ef Jóhanna Sigurðardóttir er forsætisráðherralíki eru þá Geir og Davíð forsætisráðherralík af því þeir eru ekki lengur í embætti. 

[Axel Jóhann Axelsson, 10.11.2009 kl. 20:03]

Bjórlíki og forsætisráðherralíki eru sama sullið sem enginn vill, ef hann á val á almennilegri vöru.