Erlendir endurskoðendur endurskoða íslenska endurskoðendur

Sérstakur saksóknari sendi sveit manna til leitar og handlagningar skjala og rafrænna upplýsinga varðandi bankahrunið hjá tveimur af stærstu endurskoðunarfyrirtækjum landsins, PricewaterhouseCoopers og KPMG.  Bæði bankar og fyrirtækjakóngulóanet útrásarmógúla höfðu her lögfræðinga og endurskoðenda á sínum snærum, til þess að láta viðskipti sín líta út fyrir að vera samkvæmt öllum lögum og reglugerðum.

Því kemur ekki á óvart að húsleitir séu gerðar hjá lögfræði- og endurskoðunarskrifstofum í leit að gögnum varðandi þessi mál og hugsanlegt verður að telja, að fækkað gæti í stéttum lögmanna og endurskoðenda, að rannsókn lokinni.  Í fréttinni segir:  "Samkvæmt upplýsingum frá embætti sérstaks saksóknara liggur m.a. athugun fransks endurskoðanda á ársreikningum bankanna til grundvallar húsleitunum og til rannsóknar sé m.a. grunur um skjalabrot, auðgunarbrot, brot gegn lögum um bókhald og ársreikninga, brot gegn lögum um fjármálafyrirtæki og verðbréfaviðskipti og loks brot gegn hlutafélagalögum." 

Þarna er greinilega um ákaflega umfangsmikla rannsókn að ræða, sem vafalaust mun taka langan tíma, en fram kemur að:  "Auk starfsmanna embættisins tóku þátt í húsleitunum lögreglumenn frá lögreglustjóranum á höfuðborgarsvæðinu þ.á m. sérfræðingar í haldlagningu og meðferð rafrænna gagna og sex erlendir sérfræðingar á sviði endurskoðunar."

Það verður fróðlegt að fylgjast með þeim ákærum sem lagðar verða fram gegn lögfræðingum og endurskoðendum þessara fyrirtækja.

Ekki síður vörninni, sem háð verður af lögfræðingum og endurskoðendum.

Grunur um fjölda brota

Athugasemdir

[Finnur Bárðarson, 1.10.2009 kl. 15:36]

Ætli umfangið og tíminn verði ekki svipaður og í Baugsmálinu og svo kemur niðurstaðan..... frávísun vegna formgalla

[Axel Jóhann Axelsson, 1.10.2009 kl. 15:44]

Það þarf enginn að verða hissa, þó lögfræðingar og endurskoðendur sem verða verjendur lögfræðinga og endurskoðenda, gætu þvælt málin fyrir dómstólum í mörg, mörg ár.  Það gæti endað með því að dómarar vissu hvorki í þennan heim, né annan, eftir alla þá snúninga.

Sporin hræða úr Baugsmálinu fyrsta.