Átakanleg saga af kerfi Dags og félaga í Reykjavík.

Félagslega kerfið í Reykjvíkurborg er í molum, eins og allir vita sem vita vilja, en átakanlegri lýsingu á samskiptum við fulltrúa kerfisins en fram kemur í viðtalinu við Aldísi Steindórsdóttur er varla hægt að ímynda sér.

Lýsing hennar á baráttunni við embættismenn Reykjavíkurborgar er svohljóðandi í Mogga dagsins:

„Ég hef ekki tölu á þeim fundum og viðtölum sem ég hef farið í út af húsnæðismálum pabba á þessum tveimur árum,“ segir Aldís. „Ég heyri yfirleitt sömu setningarnar, sömu stöðluðu svörin, en enginn býður upp á neinar lausnir.“

Hún segist hafa þurft að bíða lengi eftir að fá viðtal við umboðsmann borgarbúa, hún hafði samband í janúar og fékk boð um viðtal í byrjun apríl. Þar bað hún hann að hafa milligöngu um að hún fengi að ræða við yfirmenn á velferðarsviði borgarinnar. Því var hafnað, þar sem umboðsmaðurinn átti að vera milliliður á milli hennar og sviðsins. „Ég er semsagt að tala við einn embættismann sem síðan segir öðrum embættismanni allt það sem ég segi. Eru þetta góð vinnubrögð?“ spyr Aldís.

Um miðjan febrúar síðastliðinn óskaði hún eftir að fá að hitta Dag B. Eggertsson borgarstjóra til að ræða málefni föður síns, ekki var orðið við þeirri beiðni en henni boðið í staðinn að ræða við framkvæmdastjóra þjónustumiðstöðvar Vesturbæjar, Miðborgar og Hlíða sem fer með málefni Steindórs. Við tók nokkurra vikna bið eftir því samtali. „Því miður var ekki mikið annað rætt þar en að svona væri staðan bara, því miður.“

Ýmsir aðrir hafa kvartað yfir samskiptum sínum við embættismannakerfi Dags B. Eggertssonar og nægir að benda á að verktakar eru nánast búnir að gefast upp á að reyna að hafa samskipti við kerfið, sem þeir lýsa svo seinvirku og flóknu að jafnvel taki allt upp í þrjú ár að koma byggingaframkvæmdum af stað í borginni.

Lýsingin á þrautagöngunni um félagslega kerfið er hins vegar átakanlegt og svo lygilegt að erfitt er að ímynda sér hvernig í ósköpunum hægt er að koma svona fram við fólk í neyð.

Geðfatlaður og býr í bíl

Athugasemdir

[Guðbjörg Snót Jónsdóttir (IP-tala skráð) 23.4.2018 kl. 13:55]

Samt virðist fólk vilja hafa þetta í valdastólunum sem lengst, ef marka má skoðanakannanir, sem mér finnst annars lítt trúverðugar yfirleitt. Það er alveg óskiljanlegt öllu venjulegu fólki, hvernig stendur á því, að kjósendur skuli vera svona hrifnir af Degi, að þeir skuli ómögulega vilja sjá annan í borgarstjórnarstólnum en hann, á sama tíma og fólk flýr borgina umvörpum vegna þess, hvernig þetta jólasveinalið, sem stjórnar borginni hagar sér. Þó að Dagur og kó sé með allt niðrum sig á öllum sviðum borgarmálefna og eilífar glærusýnigar, þá virðist hann vera eins og Hollywoodstjarna í augum kjósenda. Þetta er alveg með ólíkindum. Ég segi ekki annað. Við skulum samt vona, að augu kjósenda opnist fyrir kosningar, og nýr borgarmeirihluti taki við hérna eftir kosningarnar. Slagurinn stendur greinilega milli Sjálfstæðisflokksins og Samfó. Við skulum sjá, hvernig málin þróast og kannanir líta út, þegar nær dregur. Fólk verður að fara að vakna og gera sér grein fyrir, að það þarf virkilega að koma nýtt fólk í stjórnunarstöðurnar hérna í borginni. Annað gengur ekki.

[Axel Jóhann Axelsson, 23.4.2018 kl. 14:04]

Það er alveg óhætt að taka undir það, að furðulegt er að fáir mæla borgarstjórnarmeirihlutanum bót en í skoðanakönnunum kemur hann samt ótrúlega vel út.

Þetta er rannsóknarefni fyrir félags- eða mannfræðinga.

[Erla Magna Alexandersdóttir, 23.4.2018 kl. 22:31]

ÞEIR TOPPAR sem eru með ofurlaun tala ekki við venjulega borgarbua.

 þeir halda að þeir seu æðri- yfirstett eins og gömlu grónu HERRAGARÐSEIGENDUR  á Englandi hinu forna.