Styðjum Pálma í Fons

Pálmi í Fons var og er einn þeirra snillinga sem tóku að sér að "endurskapa" íslenskt efnahagslíf á fyrsta áratug þessarar aldar ásamt Bónusgenginu og fleiri "athafnamönnum" og bankastjórnendum, en bankarnir voru í eigu nokkurra gengja, sem einnig "áttu" nánast öll helstu fyrirtæki landsins, sem þeir "keyptu" fyrir lán frá bönkunum sínum.

Nánast hvert einasta af þessum fyrirtækjum er nú gjaldþrota, en á þeim fáu árum sem gegnin áttu þau var yfirleitt öllu eigin fé þeirra ráðstafað til greiðslu arðs til "eigendanna" og ekki hefur spurst til þeirra peninga síðan. Hugmyndaflug þessara fjármálaspekinga var nánast óþjrjótandi varðandi það, að koma peningum úr landi og inn á reikninga í ýmsum "bankaparadísum" og skattaskjólum.

'I viðhangandi frétt er t.d. sagt frá einni aðferðinni: "Hinn 24. apríl 2007 voru millifærðir þrír milljarðar króna af reikningi Fons á Íslandi á reikning félagsins Pace Associates Corp. hjá Landsbankanum í Lúxemborg, en Pace er skráð í Panama. Sex dögum síðar, hinn 30. apríl var gerður lánasamningur milli Pace og Fons þar sem lánið er fært til bókar og það afskrifað samdægurs í bókhaldi Fons."

Pálmi og félagar hafa litlar skýringar gefið á því, hvernig þrír milljarðar króna gátu tapast og gjörsamlega horfið á sex dögum, en ýmis önnur dæmi af þessum toga munu vera til rannsóknar hjá Sérstökum saksóknara.

Banka- og útrásargengin voru elskuð og dáð af okkur Íslendingum fyrir bankahrunið og sumir hverjir ennþá, enda blómstra þau örfáu fyrirtæki, sem þeim tókst að ná undan gjaldrotum móðurfélganna, sem aldrei fyrr og er t.d. Iceland Express gott dæmi um það, sem og Stöð2 og aðrir fjölmiðlar 365 hf.

Fari svo ólíklega að Pálmi í Fons verði dæmdur til að greiða skaðabætur vegna þessa horna fjár, ríður á að íslenskir ferðalangar haldi áfram að versla við Iceland Express og önnur fyrirtæki Pálma, til að auðvelda honum baráttuna við hinn grimma bústjóra, sem vinnur að uppgjöri á þrotabúi Forns hf. 

Stjórnarmenn Fons krafðir um milljarða

Athugasemdir

[corvus corax, 6.7.2011 kl. 19:58]

Ótíndir þjófar þessi kvikindi öll. Og svo var þessi Pálmi fáráður í Fons að væla yfir því að verst þætti honum að missa mannorðið í fjölmiðlafárinu í kringum stórglæpina. Svona skíthæla hafa aldrei haft neitt mannorð til að missa. En líklega sleppur þessi eins og aðrir stórglæpamenn sem eru aðalsökudólgarnir í hruninu sem þeir bjuggu til með stórkostlegum þjófnaði.

[Erla Magna Alexandersdóttir, 6.7.2011 kl. 20:45]

þjófar stela ekki til að skila aftur- ekki heldur mafían !

[Bergljót Gunnarsdóttir, 6.7.2011 kl. 21:22]

Hverjir eiga Flugleiðir?

[Axel Jóhann Axelsson, 6.7.2011 kl. 23:38]

Ekki man ég nákvæmlega hverjir eiga Icelandair (Flugleiðir) núna, en það munu aðallega vera lífeyrissjóðir. Hitt man ég hinsvegar að Pálmi í Fons og Baugsgengið hirtu allt eigið fé félagsins á sínum tíma, seldi það síðan ofurskuldsett en hélt eftir öllum eignum innan FL-Group (sem síðar var nefnt Stoðir hf.). Út úr því félagi var greiddur gífurlegur arður og að lokum varð það félag gjaldþrota, eins og önnur félög þessarra kappa.

Rétt áður en Fons var lýst gjaldþrota, seldi Pálmi sjálfum sér helstu bitana út úr því félagi á spottprís, þar á meðal Iceland Express, flugfélagið Astereus og Ferðaskrifstofu Íslands (sem rekur Úrval Útsýn, Plúsferðir og Sumarferðir). Ef ég man rétt hefur bústjóri Fons krafist riftunar á þeim sýndarviðskiptum og mun það mál vera fyrir dómstólum, eins og fjöldi annarra mála tengdum þessum "viðskiptasnillingum".