Hefur Össur umboð til stríðsaðgerða

Í tilefni af því að kynnt hefur verið bresk könnun um afstöðu almennings þar í landi til þátttöku Breta í hernaðaraðgerðum í Líbíu vaknar sú spurning hvort ekki væri ástæða til að kanna afstöðu Íslendinga til hvatningar og stuðnings íslensku ríkisstjórnarinnar við hernaðinn.

Össur Skarphéðinsson, utanríkisráðherra, var einn harðasti stuðningsmaður hernaðar á hendur Gaddafi, Líbíuleiðtoga, og var afar óánægður með seinagang og takmarkaðan áhuga annarra verstrænna þjóða á því að blanda sér í átökin.  Þórunn Sveinbjarnardóttir, þingmaður Samfylkingarinnar, sagði í útvarpsviðtali að þetta væru algerlega bráðnauðsynlegar hernaðaraðgerðir og því miður væri mannfall óbreyttra borgara óhjákvæmilegur fórnarkostnaður til þess að koma Gaddafi frá völdum.

Í átta ár hafa ýmsir, þá ekki síst þingmenn núverandi stjórnarflokka, býsnast mikið yfir stuðningi þáverandi ríkisstjórnar við innrásina í Írak, sem hafði það að meginmarkmiði að koma Saddam Hussein frá völdum og einnig hefur þeirri gagnrýni verið haldið mjög á lofti, að þá hafi Utanríkismálanefnd Alþingis ekki verið með í ráðum, áður en ákvörðun var tekin.

Hverjir komu að ákvörðun um hvatningu og stuðning við árásirnar á Líbíu?  Var ríkisstjórnarsamþykkt á bak við athafnir og orð Össurar vegna málsins?  Var Utanríkismálanefnd Alþingis með í ráðum, eða var gerð formleg samþykkt um málið á Alþingi?

Þessu öllu hljóta Össur, ríkisstjórnin og Alþingismenn að svara.

Bretar styðja ekki aðgerðir

Athugasemdir

[Bjarki (IP-tala skráð) 22.3.2011 kl. 14:04]

Ef meginástæðan fyrir árásinni í Írak var að koma Saddam Hussein frá völdum (sem er lygi), af hverju héldu USA, Davið og Halldór þá ekki áfram og losuðu okkur við alla aðra illa einræðisherra (t.d. Gaddafi) strax? Hefði það ekki verið rökrétt framhald? Af nógu er að taka.

[Brynja S. (IP-tala skráð) 22.3.2011 kl. 18:12]

Er það eitthvað atriði hjá Hr.Össuri?

[Axel Jóhann Axelsson, 22.3.2011 kl. 18:34]

Bjarki, hafi Davíð og Halldór ekki haft umboð Alþingis, eða Utanríkisnefndar Alþingis, hvaðan kemur þá Össuri umboð núna til stríðsæsinga, en hann hefur sjálfur sagt að hann hafi viljað ganga lengra en NATO gagnvart Gaddafi og miklu fyrr.

[Bjarki (IP-tala skráð) 24.3.2011 kl. 10:48]

Sem betur fer er ég enginn stuðningsmaður Össurar Skarphéðinssonar og þarf því ekki að hvorki að réttlæta vitleysuna í honum né neinum öðrum stjórnmálamanni. Hann hlýtur að þurfa að svara þessu sjálfur, þar er ég fullkomnlega sammála. Eftir stendur að stríðið í Írak var ekki háð til að koma Saddam frá völdum, heldur voru Bandaríkjamenn að tryggja sér yfirráð yfir olíu á svæðinu, flestir sáu í gegnum það á augabragði. Meðal annars hefur repúblikaninn Alan Greenspan lýst yfir að í Írak hafi fyrst og fremst verið barist um olíu. Þess má geta að í því tiltekna stríði (sem stendur enn 8 árum síðar) var farið framhjá Öryggisráði Sameinuðu þjóðanna, hvers vegna ættu Íslendingar að styðja slíkt (burtséð frá vitleysunni í Össuri)? 

Til ítrekunar: Ég hef aldrei stutt neinn stjórnmálaflokk. Ég tel Össur ekkert betri en Davíð, Halldór, Jóhönnu eða Steingrrím.

[Axel Jóhann Axelsson, 24.3.2011 kl. 10:54]

Bjarki, það er olía í Líbíu og þar eru stríðsaðgerðir í gangi, en lítið um olíu í Jemen enda engin hernaðaríhlutun þar.  Getur verið að olíuhagsmunir ráði ferðinni núna, eins og stundum áður?

[Bjarki (IP-tala skráð) 24.3.2011 kl. 11:04]

Það er vafalítið rétt hjá þér.