Vögguvísur ríkisstjórnarinnar

Það er hárrétt hjá SA að Jóhönnu og Steingrími J. væri nær að syngja kraft og von í brjóst þjóðarinnar í stað þess að standa á tröppum stjórnarráðsins og syngja vögguvísur yfir erlendri fjárfestingu og annarri atvinnuuppbyggingu með kór öfgamanna í náttúruverndarmálum.

Listamennirnir sem þennan kór skipa telja sig þess umkomna að geta sagt fólki sem bíður eftir vinnu, að best sé að bíða bara áfram og afla sér tekna með söng, dansi og tónleikahaldi og þá geti allir lifað í sátt við sjálfa sig og náttúruna til eilífðar og án þess að troða á náttúrunni, nema um útihljómleika sé að ræða.

Ríkisstjórnin hefur um sinn sungið vögguvísur yfir lífskjörum þjóðarinnar, afkomu heimilanna og gjaldþrotum fyrirtækjanna og bætir nú við útsetningu tónsmíðarinnar kór og hljóðfæraleik til þess að syngja erlenda fjárfestingu og endurreisn atvinnulífsins inn í svefninn langa í eitt skipti fyrir öll.

Allt mannlíf á landinu mun fylgja með inn í þennan eilífðarsvefn, ef fólk fer ekki að hrista af sér þennan svefndrunga og skipta um ríkisstjórn og fá til verka fólk sem hefur skilning á því hvað þarf til að reisa þjóðarbúið upp af sjúkrabeðinu og leiða það í nauðsynlegri endurhæfingu.

Slíka er ekki að finna innan Samfylkingarinnar og enn síður í VG.

Vögguvísur yfir atvinnulífinu

Athugasemdir

[Aðalsteinn Jónsson. (IP-tala skráð) 21.1.2011 kl. 12:07]

Tek undir nauðsyn þess fyrir land og þjóð að koma þessari ríkisstjórn þegar frá völdum,stjórn sem fórnar heilsugæslu landsmanna og ýmsum velferðarmálum. Leggur í staðinn umtalsvert fjármagn í þjóðfund og stjórnlagaþing, ásamt þeim ómælda kostnaði sem fer í að kíkja í Evrópusambandspakkann .Er ekki nokkuð sérstakt að syngja vögguvísur með mótmælum gegn erlendri íhlutun í auðlindir þjóðarinnar, en vera öllum stundum að vinna að afsali sjálfstæðis og sjálræðis þjóðarinnar til erlendra aðila þ.e. E.S.B. "Er ekki eitthvað rangt við þetta"

[Axel Jóhann Axelsson, 21.1.2011 kl. 12:10]

Það er sannarlega eitthvað mjög rangt við þetta.