Njóta trausts eftir þúsund milljarða tap

Stjórnendur Arion banka segja að Hagar séu ekki til sölu, því verið sé að leita lausna með núverandi "eigendum" Haga, vegna þess að þeir njóti svo mikils trausts og þá væntanlega meira trausts en nokkur annar.

Þetta kemur fram í frásögn Brynjars Níelssonar, hæstaréttarlögmanns, sem fór á fund stjórenda bankans í dag, fyrir hönd Þjóðarhags og kynnti vilja hans til að kaupa Haga.  Í fréttinni segir:  "Þegar Brynjar spurði hvers vegna hluturinn hefði ekki verið boðinn hæstbjóðanda vísuðu stjórnendur bankans í verklagsreglur, þar sem segir að að áframhaldandi þátttaka eigenda og stjórnenda byggist á því að þeir njóti trausts og þyki mikilvægir fyrir framtíð fyrirtækisins."

Baugsfeðgar eiga í raun ekki nokkurn skapaðan hlut í Högum, því þeir fengu þrjátíumilljarða lánaða frá Kaupþingi/Arion til að "kaupa" fyrirtækið og það án þess að leggja fram eina krónu sjálfir.  Með því aðstoðaði bankinn feðgana við að koma Högum undan gjaldþroti Baugs og þar að auki bjargaði bankinn feðgunum úr snörunni með því að gefa þeim kost á að selja Baugi sjálfum þau hlutabréf, sem þeir áttu í því fyrirtæki.  Þannig kom bankinn þeim hjá því að tapa fimmtán milljörðum persónulega á gjaldþroti Baugs.

Hjá hvejum njóta Baugsfeðgar alls þessa trausts.

Það getur ekki verið annarsstaðar en hjá stjórnendum Arions banka.

Hlutur í Högum ekki til sölu

Ótrúlegur árangur Nígeríusvindlara

Reglulega berast fréttir af svokölluðum Nígeríusvindlurum, þó ekki séu þeir allir frá Nígeríu, sem tekst ótrúlega vel upp í svindli sínu á auðtrúa sakleysingjum.  Oft hafa þeir ótrúlegar upphæðir upp úr svindlstarfsemi sinni og gefa íslenskum útrásarskúrkum lítið eftir, svona hlutfallslega.

Nýjasta fréttin er af guðhræddum svindlara, sem gaf kirkjunni sinni í Lagos tíund af svindlafrakstri sínum, sem nam samtals um tólf milljónum króna.  Í þessu tilfelli virðist trúræknin hafa orðið manninum að falli og verður væntanlega að iðka sína trú, staurblankur, í tugthúsinu á næstunni.

Trúrækni hans varð honum að falli, eins og trúgirni fórnarlamba hans varð þeim að falli.

Alveg er með ólíkindum, hve margir falla fyrir þessum svindlurum á netinu, því nánast í hvert skipti tekst svindlurunum að hafa eitthvað upp úr krafsi sínu og oft þora fórnarlömbin ekki að kæra, því þau skammast sín fyrir heimsku sína og trúgirni.

Nígeríusvindl mun halda áfram, svo lengi sem trúgjarnar sálir finnast í veröldinni, enda fylgir oftast græðgi og gróðavon með trúgirninni, því oftast er lofað gulli og grænum skógum fyrir svör og aðstoð við einhverskonar peningaflutninga frá Nígeríu eða öðrum löndum.

Græðgin verður mörgum að falli, það hefur sannast eftirminnilega hérlendis undanfarin ár.

 

Nígeríusvindlari gaf kirkjunni

Engin iðrun sparisjóðanna

Á aðalfundi Sambands íslenskra sparisjóða virðist ekki koma fram mikil iðrun vegna þátttöku sparisjóðanna í fjármálaruglinu á síðustu árum, en á þeim tíma tókst stjórendum nánast allra sparisjóðanna að leggja fjárhag þeirra í rúst með stórveldisdraumum sínum og sukki.

Í ályktun aðalfundarins kemur m.a. fram þetta:  "Þá skorar fundurinn á stjórnvöld að koma í veg fyrir að viðskiptasiðferði síðustu ára nái aftur fótfestu."

Væri ekki nær, að þessir fjármálarugludallar litu sér nær?

Viðskiptasiðferði verður til í höfði þeirra, sem stunda viðskipti.

Það verður ekki bætt með lagasetningu.

Sparisjóðir vilja bæta fyrir sinn þátt