Hvar eru náttúruverndarsamtökin?

Útigangskindurnar á fjallinu Tálkna hafa lagað sig að aðstæðum í fjallinu og virðast hafa spjarað sig þar sæmilega, enda verið þar í yfir fimmtíu ár.  Þær eru leggjalengri en aðrar ær og sérlega fimar í klettaklifri.

Ragnar Jörundsson, bæjarstjóri Vesturbyggðar, segir í fréttinni:  „Samkvæmt heimildum er búið að vera þarna villt fé frá miðri síðustu öld og margir vilja meina að þetta sé orðið að sérstöku kyni meðan aðrir segja að þarna sé úrkynjun á ferð. Féð er nokkuð háfættara en venjan er núna þótt það hafi kannski verið svona almennt á fyrrihluta síðustu aldar. Síðan hefur heimafé verið ræktað mikið,“

Sé féð að úrkynjast vegna skyldleikaræktunar, er auðvelt að bæta úr því, með því að senda ungan hrút á fjallið.  Heimafé hefur verið ræktað mikið, þannig að þarna eru síðustu afkomendur landnámskindanna væntanlega samankomnar og mikið slys, ef stofninum verður algerlega útrýmt.

Hvað er að því, að leyfa þessum stofni að hafast þarna við, villtur og óáreittur fyrir mannfólkinu?  Mætti ekki frekar flytja æranar á Hornstrandir, frekar en að lóga þeim?

Hvar eru nú öll náttúruverndarsamtökin?

Nítján kindur heimtar af Tálkna

Athugasemdir

[Ólafur Þórðarson, 28.10.2009 kl. 16:06]

Það þarf ekki að flytja ærnar neitt, heldur banna að snerta þær. Eins og svo oft áður eru náttúruverndarsamtökin með hendurnar í vösunum.

[Kristin stjórnmálasamtök, 28.10.2009 kl. 16:14]

Ég er sammála þér um þetta, Axel, og vísa til pistils á vefsíðunni sem smella má sig inn á hér fyrir neðan. – Jón Valur Jensson.

[Kjartan Heiðberg (IP-tala skráð) 28.10.2009 kl. 16:32]

Ég leyfi mér að taka undir þau sjónarmið sem hér koma fram.  Ég sé engin skynsamleg rök fyrir því að útrýma þessu fé og tel jafnvel að það mætti flokka sem tilræði við íslenska náttúru.  Er féð illa haldið?  Ógnar það tilveru annarra dýrategunda?  Í þágu hvers skal því fargað?  Ég bið þá, sem fangað hafa villiféð, að fara sér hægt og drepa það ekki fyrr en að vel athuguðu máli.  Útrýming dýrategunda er alvarlegt mál og ekkert einkamál núlifandi manna þar vestra. 

[Loftur Altice Þorsteinsson, 28.10.2009 kl. 20:53]

Þakka þér fyrir þessa orðræðu Axel. Þetta villta fé hefði átt að friða, eins og önnur dýr í útrýmingarhættu. Íslendskt dýralíf er ekki svo fjölskúðugt að svona útrýmingarherferð sé siðleg.