Hálfkák í sparnaði

Ríkisstjórnin hefur kynnt tillögur til sparnaðar og hagræðingar í verkefnum ráðuneyta og stofnana.  Ein breytingin felur í sér að mögulegt verður að reka Jón Bjarnason úr ráðherrastóli, enda maðurinn Samfylkingunni óþægur í ESB málum.  Aðrar tillögur eru magrar aðeins til að sýnast og munu ekki skila miklum raunsparnaði.

Tillögur eru settar fram til endurskipulagningar verkefna og stofnana á sviði vinnu og velferðar í félags- og tryggingamálaráðuneytinu og virðast þær helst snúast um að koma verkefnum, t.d. málefnum fatlaðra, yfir á sveitarfélögin.  Þó það þýði "lækkun" á kostnaði Félags- og tryggingamálaráðuneytinu, eykst kostnaðurinn að sama skapi hjá blönkum sveitarfélögum.  Ekki felst neinn raunsparnaður í opinberri þjónustu með því að færa verkefni á milli ráðuneyta eða frá ráðuneytum til sveitarfélaga.

Um 70-75% rekstrarkostnaðar hins opinbera er launakostnaður, en ekki á að fækka opinberum starfsmönnum við þessar breytingar, eða eins og segir í tilkynningunni:  "Þetta mun hafa í för með sér breytingar á núverandi vinnuaðferðum og fjölda og samsetningu starfsfólks á ákveðnum sviðum ríkisrekstrar. Því er ekki hægt að ganga út frá því sem vísu að allir þeir sem nú vinna hjá ríkinu sinni sömu eða sams konar störfum eftir að endurskipulagning hefur farið fram.“

Í hverju skyldi hinn mikli sparnaður vera fólginn, við allar þessar tilfæringar?

Viðamiklar breytingar

Athugasemdir

[Finnur Bárðarson, 28.9.2009 kl. 16:54]

Ekki hef ég geð í mér að óska einum eða neinum að hann missi vinnuna. En rétt sem þú segir að það er erfitt að sjá hvað sparast.

[joi (IP-tala skráð) 28.9.2009 kl. 17:37]

......"Því er ekki hægt að ganga út frá því sem vísu að allir þeir sem nú vinna hjá ríkinu sinni sömu eða sams konar störfum eftir að endurskipulagning hefur farið fram,“ segir m.a. í tilkynningunni."

Ekki er nú kveðið mjög fast að orðum ef ekki er gert ráð fyrir að segja neinum upp, heldur að menn geti átt von á örlítið breyttum störfum. Ef spara á um 60 milljarða er hætt við að svona lagað dugi skammt.