Hvar er ESB stöðugleikinn?

Á Íslandi hrundi nánast allt bankakerfið s.l. haust og eftir stóð efnahagslífið í rúst og öll helstu fyrirtæki landsins ónýt, vegna þess að eigendur bankanna og aðrir fjárglæframenn voru búnir að tæma þau af eigin fé og skuldsetja þau upp fyrir rjáfur með stjarnfræðilega háum lánum, sem erlendar lánastofnanir verða nú að afskrifa.

Í kjölfar þessa hruns, er atvinnuleysi hérlendis um 9%, spáð er að landsframleiðsla dragist saman um tæp 10% á árinu og verðbólga er um 12% og skuldir þjóðarinnar eru miklar.  Þetta er mesta kreppa, sem þjóðin hefur lent í á lýðveldistímanum.  Jóhanna Sigurðardóttir og hirð hennar, lofaði þjóðinni því, að um leið og beiðni um inngöngu í ESB yrði afhent, myndi stöðugleiki nást á ný hérlendis, vegna þess að traust og tiltrú annarra þjóða yrði þá svo mikið, að öll vandamál myndu leysast, nánast af sjálfu sér.

Í ljósi loforða Jóhönnu, er með ólíkindum að lesa um hrakfarir Eystrasaltsríkjanna, en þar hefur ekki orðið neitt bankahrun, en bankastarfsemi í þeim löndum er aðallega á hendi erlendra banka, sem væntanlega hafa nú þegar, eða eiga eftir að tapa gífurlegum fjárhæðum í þessum löndum og þá mun hrikta verulega í mörgum öðrum ESB löndum.

Í fréttinni er vitnað í Seðlabanka Litháen,  en þar segir m.a:  "Spá seðlabankans verður alltaf svartari og svartari. Í maí spáði hann tæplega 16% samdrætti og í janúar hljóðaði spáin upp á 4,9% samdrátt í efnahagslífinu.  Staðan er heldur skárri hjá nágrannaríkinu Lettlandi en þar er spáð 18% samdrætti í ár. Í Eistlandi er spáð 15,3% samdrætti."

Þetta er versta efnahagskreppa, sem þessi lönd hafa fengið yfir sig, síða þau losnuðu úr klóm Sovétríkjanna sálugu.  Íbúar þessara landa trúðu sínum "Jóhönnum", sem héldu því fram að aðild að ESB myndi tryggja þeim velmegun og stöðugleika í framtíðinni, ekki síst vegna tengingar gjaldmiðils landanna við Evruna.

Hver er hjálpin af ESB aðildinni?  Hvar er ESB stöðugleikinn?  Hvernig stendur á því að þessi lönd eru í verri málum en Ísland, sem stengur utan ESB?

Samfylkingarmenn hljóta að svara þessu með haldbærum rökum.

Staða Litháen sú versta innan ESB

Athugasemdir

[Þorsteinn Helgi Steinarsson, 6.8.2009 kl. 16:44]

Þetta er nákvæmlega sá stöðugleiki sem í boði er þegar efnahagsskellir dynja yfir og ekki er unnt að taka við áfallinu með gengisfellingu. Ath. að ef Íslendingar (líka ég!) hefðu ekki tekið erlend lán þá væri staðan hér mun betri en hún er. Og ath. að þrátt fyrir erlendu lánin, algjört hrun bankakerfisins og IceSfave þá er staðan hér að því er virðist betri. Enn þá að minnsta kosti. Samt hafa þessar þjóðir betri lánshæfiseinkunnir og meintan stuðning ESB.

[Jón Lárusson, 6.8.2009 kl. 16:50]

Guði sé lof fyrir betra lánshæfismat Eystrasaltsríkjanna, þeir geta þá enn bætt við sig skuldum. Verður ekki flott hjá þeim framtíðin.

Ef við hættum að hlusta á útlendinga og förum að skoða málin betur, þá er ástandið ekki svo slæmt hjá okkur, ef við miðum við ESB. Auðvitað eru allir bankar kapút, en hverjum er það að kenna öðrum en eigendum þeirra. Sem þjóðfélag hefur "kreppan" skellt atvinnuleysinu upp í heil 9%, en undir því sem þekkist í ESB og verðlagið, með hækkuðu gengi, þá er verðlag hér í raun svipað og í Frakklandi þegar vöruverð og gengi er skoðað, nema meðallaun í frakklandi eru um 1.000 euro og kaupmáttur lítill.

Ég segi það ekki að ástandið sé gott hjá öllum. Það er mjög slæmt hjá mörgum, en ef við ætlum að leita til útlanda eftir svörum, þá finnum við þau ekki.