Verður nokkurn tíma hægt að fá botn í þessi mál?

Geirfinns- og Guðmundarmál hafa verið í umræðunni áratugum saman og sitt sýnist hverjum um sekt eða sakleysi þeirra ungmenna sem sökuð voru um hvarf mannanna og dóm hlutu fyrir, allt að sautján ára fangelsi.

Sakborningar játuðu á sig glæpina á sínum tíma, en drógu þær játningar fljótlega til baka og sögðu þær hafa verið knúðar fram með harðræði í ómanneskjulega löngu gæsluvarðhaldi og með því að "planta fölskum minningum" í hugi sína með lymskulegum yfirheyrsluaðferðum og falskri "góðsemi".

Eitt er alveg víst og það er að rannsókn málanna, meðferð sakborninganna og yfirheyrslur hafa vægt sagt verið harðneskjulegar og myndu ekki standast neinar nútímakröfur til rannsókna sakamála, yfirheyrsluaðferða eða meðferð sakamanna.

Innanríkisráðherra hefur sett á fót nefnd til að rannsaka rannsóknina og nánast víst er að hún mun komast að þeirri niðurstöðu að rannsókn og öll málsmeðferð hafi verið fyrir neðan allar hellur og sé og verði blettur á íslenskri réttarfarssögu og öllum til skammar sem að málunum komu á sínum tíma.

Hvort nokkurn tíma tekst héðan af að sanna eða afsanna sekt þeirra sem dóma hlutu á sínum tíma er svo annað mál og líklegt að þráttað verði um það áfram um ókomna tíð.

Afhenda skjöl um Geirfinnsmálið

Athugasemdir

[DoctorE (IP-tala skráð) 14.11.2011 kl. 10:51]

Menn planta ekki fölskum minninum per se.. heldur halda mönnum í helvíti svo þeir játi hvað sem er til að sleppa úr helvítinu.

Auðvitað á að dæma þau öll saklaus, það er algerlega ljóst að það er ekki hægt að standa á dómum án þess að verða eins og vitleysingur og hillbilli

[Axel Jóhann Axelsson, 14.11.2011 kl. 11:14]

Það hefur komið fram í viðtölum við menn sem sátu í varðhaldi vikum saman, algerlega án nokkurra tengsla við málið, að þeir hefðu jafnvel verið farnir að trúa því á stundum að þeir hefðu verið á ýmsum stöðum sem tengdust málunum, án þess að hafa nokkurn tíma komið á þessa staði.

Þannig virðist vera hægt að "planta fölskum minningum" í huga manna, a.m.k. með því að "halda mönnum í helvíti", eins og þú segir DoctorE.

[Sigurður Þór Guðjónsson, 14.11.2011 kl. 18:29]

Hvernig sem allt veltist endum við Doctore E örugglega í helvíti!

[Jóhanna (IP-tala skráð) 14.11.2011 kl. 23:01]

Nokkrir lögfræðingar komnir á ríkisjötuna..

Las það í blöðum, offramboð af lagatæknum.

Þúsund l...tæknar útskrifist á næstu misserum.

Það hljóta að finnast fleiri Leirfinnsmál handa þeim.