Hanna Birna vinsæl, þvert á flokkslínur

Samkvæmt skoðanakönnun sem gerð var fyrir Viðskiptablaðið treysta 70,3 kjósenda Sjálfstæðisflokksins Hönnu Birnu Kristjánsdóttur betur en Bjarna Benediktssyni til að vera leiðtogi flokksins.

Þetta eru auðvitað stórtíðindi, þar sem landsfundur verður haldinn í næsta mánuði og þar mun fara fram formannskjör, þó enginn hafi ennþá lýst yfir framboði til formanns, annar en Bjarni Benediktsson.

Annað, sem vekur mikla athygli er, að Hanna Birna nýtur trausts yfir 80% kjósenda annarra flokka en Sjálfstæðisflokksins, á meðan aðeins 18% þeirra telja Bjarna betur hæfan til að leiða Sjálfstæðisflokkinn á þeim erfiðu tímum sem nú eru í þjóðfélaginu.

Þessi niðurstaða skoðanakönnunarinnar hlýtur að setja mikla pressu á Hönnu Birnu og gefi hún kost á sér í formannskjörinu á fundinum verður ekki annað séð en að hún muni fá yfirburðakosningu.

Um 70% vilja Hönnu Birnu

Athugasemdir

[Hinni (IP-tala skráð) 13.10.2011 kl. 08:35]

Ekki get ég tekið undir að hér séu "stórtíðindi" á ferð.

Að skipta út einum sem klúðrað hefur öllu sem hann hefur

komið nálægt í einhverja sem klúðrað hefur öllu sem hún

hefur komið nálægt er í besta falli jafnmikil "tíðindi"

og léleg skrítla í Morgunblaðinu.

[Flosi Kristjánsson, 13.10.2011 kl. 09:21]

Alltaf er jafn gaman að sjá strigakjaftana takast á með fullyrðingum sem standa á brauðfótum! Fyrrum borgarstjóri hefur á engum vettvangi fengið á sig orð fyrir að standa sig ekki vel í starfi - nema ef vera skyldi meðal "aðgerðasinna" í Samfylkingunni sem hún dissaði eftirminnilega á róstusömum fundi sem hún stýrði í Ráðhúsinu hér um árið.

[Axel Jóhann Axelsson, 13.10.2011 kl. 09:40]

Þessi Hinni hefur annaðhvort ekkert fylgst með borgarmálefnunum undanfarin ár, eða hann er bara með gullfiskaminni eins og margir aðrir. Líklegra er að hann sé einungis "strigakjaftur" sem setur fram fullyrðingar sem standast ekki neina skoðun, eins og Flosi bendir á.

Ekki er að undra að hann skuli skrifa ruglið undir dulnefni. Enginn myndi hvort sem er setja nafnið sitt við svona þvælu.

[Þórður (IP-tala skráð) 13.10.2011 kl. 10:20]

Mér líst vel á Hönnu Birnu sem næsta formann Sjálfstæðisflokksins, vonandi mun hún bjóða sig fram.

[Axel Jóhann Axelsson, 13.10.2011 kl. 12:00]

Sammála því, að Hanna Birna yrði glæsilegur formaður flokksins enda hefur hún staðið sig afburða vel í öllu sem hún hefur tekið sér fyrir hendur og er vinsæl þvert á allar flokkslínur.

[Skúli (IP-tala skráð) 13.10.2011 kl. 23:19]

Þó svo að ég sé alveg utan flokka þá líst mér nokkuð vel á hana sem formann XD.  Hún hefur sýnt ágætis takta í borginni og ég held að tími Bjarna sé liðinn.