Hver er hissa á því að Steingrímur J. sé hissa?

Steingrímur J. er algerlega steinhissa á því að aðilar vinnumarkaðarins hafi reiknað með að eitthvað væri að marka yfirlýsingar sem frá ríkisstjórninni hafa komið á undanförnum mánuðum um aðkomu ríkisstjórnarinnar að kjarasamningum, til þess að hægt væri að ganga endanlega frá þeim, með vissu um þann grundvöll sem stjórnin ætlast til að atvinnulífið búi við á næstu árum.

Frá því í janúar s.l. hafa aðilar vinnumarkaðarins verið í viðræðum við Steingrím J. og félaga í ríkisstjórn um þær aðgerðir sem þarf að grípa til, til þess að koma einhverri hreyfingu á atvinnulífið, en allar aðgerðir ríkisstjórnarinnar á valdatíma hennar hafa snúist um að tefja og þvælast fyrir allri uppbyggingu í atvinnumálum og í raun haldið þeim málaflokki í gíslingu með alls kyns yfirlýsingum um þjóðnýtingu, uppsögn eða breytingu samninga sem í gildi hafa verið við erlenda fjárfesta, að ekki sé talað um hvernig sjávarútveginum hefur verið haldið í helgreipum síðustu tvö ár.

Steingrímur J. var mjög hissa á því að þjóðin skyldi ekki nánast springa af fagnaðarlátum þega hinn "glæsilegi" samningur Icesave I var dreginn með töngum út úr honum, jafn undrandi varð hann þegar þjóðin kolfelldi Icesave II í þjóðaratkvæðagreiðslu og ekki minnkaði undrunin þegar ýmsir létu í ljós óánægju með Icesave III.

Steingrímur J. er steinhissa á því að hans eigin ríkisstjórn skuli hafa samþykkt árásir á Líbíu og enn meira undrandi á því að ríkisstjórnin skuli hafa veitt NATO umboð til að stjórna árásunum. 

Sennilega er enginn maður jafn undrandi í landinu og Steingrímur J.  Nema ef vera skyldu þeir sem eru steinhlessa á því, hvað Steingrímur J. er alltaf hissa á öllu.

Hissa á Samtökum atvinnulífsins

Athugasemdir

[Óskar Guðmundsson, 29.3.2011 kl. 16:08]

Hann er alltaf hissa.

Verður það sjálfsagt líka þegar hann verður stjaksettur í næstu viku.

[Sverrir Stormsker, 29.3.2011 kl. 19:56]

Hann var líka mjög hissa þegar Ólafur Ragnar neitaði að skrifa undir Icesave-snilldina í fyrra skiptið og hann var alveg gapandi "stórundrandi" þegar Ólafur neitaði að skrifa undir núna síðast. Það er ekki ónýtt að hafa fjármálaráðherra sem er svona glúrinn í að reikna út hlutina og sjá þá fyrir. Við eigum að sjálfsögðu að treysta svona manni og segja já takk við Icesave. (Hóst hóst hóst hóst hóst.....)

[Axel Jóhann Axelsson, 29.3.2011 kl. 22:18]

Sverrir, svona hósti getur verið stórvarasamur. Þú þyrftir að fá einhvern til að slá duglega í bakið á þér og drekka svo glas af vatni á eftir.

Annars er maður svo sem ekki undrandi á að þú hafir fengið alvarlegt hóstakast eftir þessa síðustu yfirlýsingu.

[Helgi (IP-tala skráð) 30.3.2011 kl. 06:07]

Sæll.

Ég man ekki betur en sl. sumar eða svo hafi Steingrímur sagt að hagvöxtur væri á ný hér. Örfáum dögum síðar kom í ljós að samdráttur var. Vissi Steingrímur ekki betur eða laug hann? Af hverju er ekki hamast á honum varðandi þetta? Hvað hefði hent fjármálaráðherra í öðrum ríkjum ef þeir hefðu látið svona dellu út úr sér?

Maður sem heldur í fúlustu alvöru að hægt sé að hefja endurreisn efnahagslífsins með því að drekkja því í ólögvörðum Icesve skuldum veit ekkert um efnahagsmál. Hann og hans ráðuneyti reiknuðu líka með söluaukningu á bensíni um síðustu áramót þrátt fyrir gífurlegar hækkanir. Raunin er auðvitað þveröfug. Þegar ráðuneyti og ráðherrar keyra sig áfram á óskhyggju fer illa - eins og venjulegt fólk sér og upplifir. Vg vita ekkert um efnahagsmál.

Hvað höfum við gert til að verðskulda svona valdhafa?