Skiptir mestu máli hvernig tillögur eru lagðar fram

Lilja Mósesdóttir, sem er ein af "villiköttunum" í þingflokki VG, segir að ekki sé tekið mark á tillögum sínum innan meirihlutans á bak við ríkisstjórnina vegna þess að ekki sé sama hvaðan gott komi.  Lilja segir m.a:  "En vandamálið  er að það er ekki hlustað á okkur og stundum hef ég á tilfinningunni að það skipti máli frá hverjum gagnrýnin og ábendingarnar koma. Ef ég tala fyrir sjálfa mig þá hef ég talað fyrir almennri skuldaleiðréttingu, lagt fram frumvarp sem kallað er lyklafrumvarpið og frumvarp um fyrningu krafna en þessi frumvörp hafa ekki fengið framgang, meðal annars held ég vegna þess að það var ég sem lagði þau fram en ekki einhver annar."

Ekki virðist hvarfla að Lilju að tillögur hennar séu ekki þess virði að þær fái sérstakan framgang og má þar nefna tillöguna um flata niðurfellingu skulda, sem bæði er dýr og gagnast alls ekki þeim, sem virkilega eru í mestu skuldakröggunum og þurfa helst aðstoðar við, til að komast aftur í möguleika á að standa undir skuldum sínum.  Lyklafrumvarpið er algerlega galið, þar sem fólk sem alls ekki er í neinum erfiðleikum vegna skulda sinna, en á hinsvegar erfitt með að selja viðkomandi fasteign, gæti einfaldlega hent lyklunum í lánadrottnana og gengið frá fasteigninni án þess að taka nokkra einustu ábyrgð á ákvörðun sinni á kaupum hennar.

Fyrning krafna gjaldþrota fólks hefur verið stytt í tvö ár, þó ennþá sé möguleiki fyrir lánadrottna að viðhalda kröfum sínum, enda algerlega andstætt eignarréttarákvæðum stjórnarskrárinnar að ganga algerlega á rétt lánveitenda, því þeirra eignaréttur er varinn ekki síður en annarra sem eignir eiga í þjóðfélaginu.

Þessi upptalning ætti að sýna að tillögur Lilju eru ekki góðar tillögur og væntanlega hefur þeim verið hafnað á þeim forsendum.  Lilja hefur hins vegar kosið að reyna að gera sjálfa sig að píslarvotti og virðist reyndar vera að takast ágætlega upp við það.

Henni hefur tekist að snúa hjarðhegðun stórs hluta almennings í átt til vorkunnar með sér og stærstur hluti hjarðarinnar fylgir án sérstakrar umhugsunar, enda er það aðaleinkenni hjarðhegðunar.

Skiptir mál hver lagði tillögurnar fram

Athugasemdir

[Jon (IP-tala skráð) 23.12.2010 kl. 10:47]

Það vill svo til að tillögurnar hennar Lilju eru þær bestu sem komið hafa frá þeim er sitja í ríkistjórn svo hún hefur mikið fyrir sér í þessu, enda má benda á að Lilja er sú sem situr í VG og Samfylkingunni sem mest vit hefur á fjármálum.

Gleðileg Jól

[Sævar (IP-tala skráð) 23.12.2010 kl. 10:54]

Ekki hef ég orðið var við neina vitræna tilburði hjá umræddum þingmanni. Ofskrúfuð poppulisti.

[Axel Jóhann Axelsson, 23.12.2010 kl. 11:04]

Jón, ef þessar tillögur eru þær bestu sem frá þingmönnum meirihlutans hafa komið, þá er sannarlega kominn tími til að skipta um meirihluta.

[Axel Jóhann Axelsson, 23.12.2010 kl. 11:06]

Sævar, Lilja er mikill lýðskrumari sem hefur ofmetnast af ofmati þeirra sem skrumið hefur náð til.

[Jon (IP-tala skráð) 23.12.2010 kl. 11:17]

Já það er svo sannarlega kominn tími á nýjan meirihluta, það er sko hárrétt