Jóhannes í Bónus er "óháður" stjórnarformaður Haga

Páll Magnússon, útvarpsstjóri, gagnrýndi Arion banka harðlega í viðtali við Viðskiptablaðið, vegna ótrúlegrar þjónkunar bankans við Bónusfeðgana Jóhannes og Jón Ásgeir, sem rökuðu að sér auðæfum bankanna á þeim tíma, sem Jón Ásgeir var skuldakóngur Íslands, en samtals skulduðu félög honum tengd um eittþúsundmilljarða króna á velmektardögum útrásargengisins.

Helga Þóra Eiðsdóttir, forstöðmaður á skrifstofu bankastjóra Arion banka, harðneitar öllum ásökunum um að Arion banki hygli þeim feðgum á nokkurn hátt og segir m.a.  "Við megum ekki samkvæmt Samkeppniseftirlitinu skipta okkur af daglegum rekstri félagsins. Hagar eru sjálfstætt eignarhaldsfélag og í stjórn Haga sitja óháðir aðilar. Við komum ekkert að því hvernig þeir nota sitt auglýsingafé, hvar þeir eru að auglýsa"

Óháða stjórnin í félaginu er svo skipuð samkvæmt heimasíðu Haga:

Stjórn

Jóhannes Jónsson

Steinn Logi Björnsson

Svana Helen Björnsdóttir

Guðbrandur Sigurðsson

Erna Gísladóttir

Varamenn

Kristín jóhannesdóttir

Sigurjón Pálsson

Eignarhlutur

Arion banki á 95,7% í Högum.

Eins og sjá má þá er Jóhannes Jónsson stjórnarformaður og dóttir hans er varamaður í stjórn, ásamt því að Steinn Logi Björnsson er í stjórn, en hann var forstjóri Húsasmiðjunnar á meðan Baugur átti það fyrirtæki, en eins og allir vita, þá var Högum komið undan gjaldþroti Baugs á sínum tíma.  Að kalla þetta óháða stjórn, er annaðhvort mikið grín hjá Helgu, eða hún er hreinlega að hæðast að blaðamanninum, sem við hana talaði og þar með lesendum fjölmiðilsins.

Það er þessi algerlega "óháða" stjórn, sem beinir öllu auglýsingafé Haga til 365 miðla, sem eru í eigu hjónanna Ingibjargar Pálmadóttur og Jóns Ásgeirs, en 365 miðla eignuðust þau hjón fyrir einstakan velvilja bankans, sem lét þau hafa fjölmiðlana á slikk, en afskrifaði um leið milljarða skuldir sem Jón Ásgeir skildi eftir vegna eldra félags um þann rekstur.

Af þessu öllu má ráða, að ekki er nóg með að Bónusgengið sé algerlega óháð öllum lögmálum viðskiptalífsins, heldur er Arion banki það líka.

Vísar ummælum Páls á bug

Athugasemdir

[Guðmundur Júlíusson, 20.8.2010 kl. 18:30]

Sæll, ef þetta væri ekki raunveruleiki mætti hlægja að þessu, en svo er víst ekki, maður skilur alls ekki hvað manneskjan, (Helga Þóra) er að fara með þessu, er hún svona vitlaus að  vita ekki hverjir eru í stjórn, eða veit ekki hver Jóhannes er???

[Kristinn Karl Brynjarsson, 20.8.2010 kl. 20:51]

Svo er Sigurjón Pálsson sem einnig situr í varastjórn Haga, í stjórn 1998, móðurfyrirtækis Haga.  Sigurjón Pálsson er mágur Ara Edwald, forstjóra 365 miðla. 

Skilaboðin úr bönkunum hafa ekkert breyst, síðan fyrir hrun.  Þau eru enn á þann veg, að öll gagnrýni er rakalaust þvaður, frá fávísu fólki.

[Axel Jóhann Axelsson, 20.8.2010 kl. 21:00]

Þetta Hagamál er auðvitað alger skandall, eins og margt annað sem viðgengst í nýju bönkunum.

Það er alveg bráðnauðsynlegt að setja á fót rannsóknarnefnd, sem hefði það hlutverk að rannsaka störf skilanefnda gömlu bankanna og fara ofan í saumana á hvernig nýju bankarnir hafa hagða sér á ýmsum sviðum.

Ýmislegt bendir til að sóðaskapurinn í kringum bankana sé lítið minni núna, en hann var fyrir hrun.

[Kristinn Karl Brynjarsson, 20.8.2010 kl. 21:10]

Stjórnvöld eru nú ekki með slíka nefnd á dagskránni.  Stjórnvöld með Jóhönnu í fararbroddi, bíða í ofvæni, eftir niðurstöðu þingmannanefndarinnar, sem á að taka ákvarðanir, vegna ráðherraábyrgðar og vanrækslu í tengslum við hrunið.

 Verði það niðurstaðan, að DO eigi ekki vænan rassskell í vændum þar, þá verður stofnuð nefnd til að rannsaka  fyrri einkavæðingu bankana. 

 Rannsókn á skilanefndum  bankana er gersamlega útaf borðinu, því að þá koma upp ýmis atrið varðandi færslu lánasafnana yfir í nýju bankana og þar mun aðgerðaleysi vegna ákveðinna lögfræðiálita, verða skjalfest.