Stóra sólbekkjamálið kláraðist fyrir þinglok - mikill léttir

Þrátt fyrir gífurlegar annir á Alþingi síðustu dagana fyrir þinglok, tóks stjórnarflokkunum að ljúka einu af sínum stærstu málum í morgun, en það er bann við notkun ungmenna á ljósabekkjum á sólbaðsstofum.

Þrátt fyrir ótrúlega lélegt skipulag meirihlutans á þingstörfunum og þó búið sé að lengja þingið fram á sumarið, virðist það vera ófrávíkjanleg regla stjórnarinnar, að leggja alvörumálin ekki fyrir þingið fyrr en á síðustu stundu, til þess að gulltryggja að alger ringulreið ríki á þinginu, síðusta hálfa mánuðinn fyrir þinglok.

Með samþykkt stóra sólbekkjamálsins hefur ríkisstjórn Samfylkingar og VG náð að klára tvö þjóðþrifamál á þessum vetri, en til viðbótar við þetta merka mál var áður búið að banna kvenfólki að dansa berrassað innan veggja Goldfingers, nektarstaðarins hans Geira.

Verður þetta að teljast mikil og góð afköst hjá þessari ríkisstjórn og ekki hægt að ætlast til þess að hún afgreiði smámál á meðan, eins og fjárhagsvanda heimilanna, atvinnumál, efnahagsmál, orkumál, stóriðjumál eða önnur smámál, sem orðið hafa að sitja á hakanum vegna nektar á strippbúllum og í ljósabekkjum.

Ríkisstjórnir annarra landa hljóta að líta í forundran til þeirrar íslensku og eiga örugglega erfitt með að skilja forgangsmálin hér á landi.

Lái þeim það, hver sem vill.

Ljósabekkjabann orðið að lögum

Athugasemdir

[Finnur Bárðarson, 14.6.2010 kl. 15:15]

Úff, sé fram á góðan svefn í nótt.

[Axel Jóhann Axelsson, 14.6.2010 kl. 15:29]

Já, það er mikill léttir að þetta mál skyldi komast klakklaust í gegnum þingið, en lenda ekki í samningaþvarginu um þinglokin.  Þá hefði orðið stórhætta á því, að þessu brýna máli hefði verið frestað, eða algerlega dagað uppi. 

[Finnur Bárðarson, 14.6.2010 kl. 16:15]

Maður fær bara kvíðakast við tlihugunina um frestun á þessu forgangsmáli

[Sigurbjörn Friðriksson, 14.6.2010 kl. 16:30]

Nú er eftir að afgreiða stóra málið um fatalit ungbarna á fæðingardeildinni - bleikt eða blátt.  Við þurfum að kjósa Kolbrúnu Halldórsdóttur aftur á þing til að bíta hausinn af skömminni - endanlega.

Kveðja, Björn bóndi  

[Axel Jóhann Axelsson, 14.6.2010 kl. 16:34]

Svo er eftir stórmálið um það, hvort konur sem gegna embættum í ríkisstjórn geti kallast ráðherrar.  Var ekki fyrsta þingmál þingkonunnar Steinunnar Valdísar að stinga upp á því að skipuð yrði nefnd til að fjalla um og leiða það erfiða mál til lykta?

Manni líður eins og Finni yfir stóra ljósabekkjamálinu, þ.e kvíðaköstin verð sífellt verri, því lengur sem líður án þess að botn komist í þetta.

[Sigurbjörn Friðriksson, 14.6.2010 kl. 17:04]

Ráðherrar og ráðherfur.

Geta karlmenn orðið hetjur? (Hetja = kvenkynsorð).

Björn bóndi  

[Sigurður I B Guðmundsson, 14.6.2010 kl. 17:12]

Hver á svo að fylgjast með að sólbaðsstofurnar fari eftir settum reglum? Lögreglan hefur jú svo lítið að gera að hún getur væntanlegn bætt þessu á sig eða verður sett á stofn sólbaðseftirlitsnefnd?

[Axel Jóhann Axelsson, 14.6.2010 kl. 17:25]

Sólbaðstofueftirlit ríkisins hljómar nokkuð vel fyrir nýja ríkisstofnun.  Það væri atvinnuskapandi því fjölda starfsmanna þarf til að sinna eftirliti um allt land.  Sennilega þyrfti a.m.k. einn eftirlitsmann inn á hverja sólbaðsstofu, til að fyrirbyggja algerlega að yngri en 18 ára yrði ekki smyglað inn í ljósabekkina.