Krónan styrkist þrátt fyrir ríkisstjórnina

Eftir því sem andstaða þjóðarinnar hefur vaxið gegn fjárkúgunartilraunum Breta og Hollendinga, hefur krónan styrkst, þvert ofan í svartnættisáróður ríkisstjórnarinnar, sem í níu mánuði hefur látlaust hamrað á því, að með því að samþykkja ekki kröfurnar möglunarlaust, muni allt leggjast í rúst í landinu og t.d. myndi lánshæfi landsins hrapa í ruslfokk og gengið myndi halda áfram að veikjast.

Hvort lánshæfi landsins fellur um flokk, eða ekki, mun ekki skipta sköpum, hvað lánamöguleika Íslendinga erlendis snertir á næstunni, því lánsfé mun ekki liggja á lausu, nema gegn háum vöxtum, þar sem lánsfjárþörf nánast allra ríkja í Evrópu er gífurleg, eins og sjá má af þessari frétt frá því í gær, en þar segir m.a:  "Matsfyrirtækið Standard & Poor‘s spáir því að lánsfjárþörf ríkja Evrópu á þessu ári nemi um 1.446 milljörðum evra, rúmum 251 þúsund milljörðum króna. Lánsfjárþörfin er þá sex sinnum hærri en hún var árið 2007 og slær út fyrra met frá árinu 2009 með um 390 milljarða aukningu. Samkvæmt S&P er reiknað með að samtals muni um 46 af 50 ríkjum Evrópu þurfa á þessum fjárhæðum að halda til að fjármagna sig."

Af þessu sést að uppgjöf í Icesavedeilunni mun ekki hafa nokkur áhrif til að auðvelda, hvorki íslenska ríkinu, eða einkaaðilum, að nálgast lánsfé erlendis frá, um talsverða framtíð. 

Styrking krónunnar er því athyglisverð, sérstaklega í ljósi þess, að ríkisstjórnin gerir allt til að tala hana niður, ásamt því að aðgerðaleysi stjórnarinnar á öllum sviðum atvinnumála vinnur í raun gegn sterkari krónu.

Fari ríkisstjórnin að taka af sér belgvettlingana, bretta upp ermar og taka til hendinni í baráttunni við atvinnuleysið, eflingu atvinnulífs og heimilanna, þá gæti bjartsýni aukist og hjólin farið að snúast á ný og krónan að styrkjast ennþá meira.

Allt þetta er hægt, þrátt fyrir baráttu Breta, Hollendinga, norðulandanna, AGS og EBS gegn efnahagsbata á Íslandi. 

Það eina sem vantar, er ríkisstjórn sem ekki er ráðvillt, hugmyndasnauð og getulaus.

Evran ekki lægri í 9 mánuði

Athugasemdir

[Hörður Hinrik Arnarson (IP-tala skráð) 12.3.2010 kl. 14:42]

Æ, hvað allir í heiminum eru vondir við okkur. Þetta væri nú allt annað ef við klára og heiðarlega fólkið í Sjálfstæðisflokknum fengu að ráða.

P.S. Það er rétt að mat lánsmatsfyrirtækja er ekki "meik" eða "breik"  fyrir okkur Íslendinga, en það gerir hins vegar, skuldatryggingarálagið sem hækkaði um 200 punkta við ekki undirskrift Ólafs Ragnars. Var það nú fyrir það langversta í Evrópu.

[Axel Jóhann Axelsson, 12.3.2010 kl. 14:56]

Þetta væri allt betra ef þið klára fólkið fengjuð einhverju ráðið, alveg óháð því hvaða stjórnmálaflokki þið tilheyrið, jafnvel þó þið klára fólkið væruð aðdáendur Samfylkingarinnar eða VG.

Skuldatryggingarálagið hefur lækkað talsvert aftur, en eins og fram kom í færslunni hér að ofan, verður þvílík eftirspurn eftir lánsfé í Evrópu, ekki síst frá ríkissjóðum þar, að Ísland mun verða mjög aftarlega á listanum, þegar kemur að baráttunni um lánsféð.  Þá verður þeim lánað fyrst, sem hafa öflugustu ríkissjóðina og það á ekki við um Ísland, frekar en mörg ESB löndin, sérstaklega nokkur evrulönd.

Þess vegna mun lánshæfismat og skuldatryggingarálag ekki hafa úrslitaþýðingu, svo illa leikið er orðspor Íslands eftir frammistöðu banka- og útrásaridjótanna.