Þreyttur á kjaftæðinu í Steingrími

Með því að hnika til nokkrum orðum í ræðu Steingríms J. á fundi Samtaka atvinnulífsins, má lýsa afstöððu almennings til aðgerðarleysis ríkisstjórnarinnar.  Þá myndi upphaf ræðunnar hljóða einhvernveginn svona:

Almenningur er orðinn þreyttur á þessu kjaftæði í Steingrími J., að ríkisstjórnin sé eitthvað að gera vegna endurreisnar atvinnulífsins, minnkunar atvinnuleysis og vanda heimilanna og má t.d. gagnrýna framgöngu Svandísar Svavarsdóttur, umhverfisráðherra og VG fyrir ákvarðanir og áherslur í tengslum við skipulag Þjórsársvæðisins og aðrar stórframkvæmdir. 

Segja má að framganga Svandísar og VG hafi verið þeim til skammar. Steingrímur ætti að biðjast afsökunar, fyrir sína hönd, Svandísar og VG.  Ríkisstjórnin hefur algerlega unnið gegn stöðugleikasáttmálanum varðandi stóriðjuframkvæmdir og vegna vandræðagangs ríkisstjórnarinnar er nokkurt vandamál með fjármögnunina, hún er nánast föst.

Við þetta má bæta vandræðagangi og raunar algeru klúðri varðandi Icesave, vaxtamál, sparnað í ríkisrekstrinum, skattahækkanabrjálæði og almennu getuleysi við úrlausn vandamála þjóðfélagsins.

Það er ekki nóg að vera stórorður og láta skammir dynja á atvinnurekendum, til að hefna fyrir þær skammir sem Steingrímur og ríkisstjórnin fær frá verkalýðsfélögunum fyrir aðgerðarleysi og tafir á öllum málum, sem snúa að stöðugleikasáttmálanum, sem ASÍ er reyndar farið að kalla stöðnunarsáttmála.

Það eina, sem var alveg rétt í ræðunni er, að Steingrímur J. er þreyttur og það er farið að bitna alvarlega á almenningi í landinu.

Steingrímur J. og VG ættu að fara að fá sér góða hvíld.

 

Þreyttur á þessu kjaftæði

Athugasemdir

[Hilmar Sigurðsson (IP-tala skráð) 12.3.2010 kl. 16:33]

Blessaður félagi Axel !

Nenni ekki að elta ólar við ummæli Steingríms, nema að því leytinu til að þarna koma fram  tvær vísbendingar um að hann sé að "snappa" eða að bresta andlega.  Önnur er sú að hann er orðinn "þreyttur á þessu kjaftæði" í tilefni af því að kvenskörungur o.fl. segja þinginu til syndanna.   Þetta er náttúrulega rosaleg þreyta.  Hin er sú að fram kemur minnimáttarkennd í því að hann segir að Helgi formaður sé hár og myndarlegur maður !  Steingrímur er hvorugt.  Siggi í Spaugstofunni er eiginlega miklu betri. 

Kveðja,

Hilmar Sig. 

[Jón Óskarsson, 12.3.2010 kl. 17:00]

Steingrímur er greinilega alveg búinn á því andlega og líkamlega.  Hreytir hálfkveðnum vísum í blaðamenn á blaðamannafundum ríkisstjórnarinnar, húðskammar menn á fundi Samtaka atvinnulífsins og nafngreinir menn þar og reynir að gera lítið úr þeim.  Hefur svo í raun engin svör um það sem ríkisstjórnin er að gera.   Ef nú væri mars 2009 þá mætti segja að svörin væru í lagi, en nú er komið árið 2010 og um eitt og hálft ár liðið frá hruni.  Það litla sem búið er að gera hefur tekið allt of langan tíma og til að mynda er ennþá ekkert búið að gera til að koma til móts við skuldavanda heimilanna.

Þó er það svo að Steingrímur er einn af fáum ráðherrum í ríkisstjórninni sem hefur þó verið að vinna alla daga.  Enda eru flestir hinna ráðherranna svo lítið að gera að þegar þeir sjást þá er eins og þeir séu búnir að vera í margra mánaða frí og hafi í leiðinni fengið nudd og andlitsmeðferðir.  Svo vel líta þeir út, enda ekki þjakaðir af vinnuálagi eins og Steingrímur er greinilega orðinn.

Það mætti að skaðlausu fækka ráðherrum niður í 4-5 án þess að það myndi neinu breyta nema spara í launakostnaði ríkisins.   Össur sér um brandarana, Svandís gerir allt til að stöðva atvinnurekstur, Árni Páll vinnur gegn þeim sem hann ætti að sinna sem félagsmálaráðherra, um Jón Bjarnason þarf ekki að hafa mörg orð, sama er að segja um Álfheiði, Gylfi hefur það greinilega of gott í ráðherrastólnum, Katrín menntamálaráðherra hristir bara hausinn, Kristján svíkur allt sem hann lofar og vinnur markvisst að því að setja alla jarðvinnuverktaka á hausinn.  Eftir sitja þá Jóhanna forsætisráðherra, Steingrímur Joð, og síðan þær sem helst hafa verið að vinna að málum í ríkisstjórninni þær Ragna dómsmálaráðherra og Katrín iðnaðarráðherra.

[Jóhannes Laxdal Baldvinsson, 13.3.2010 kl. 12:12]

Allir þeir sem vilja fleiri álbræðslur, rétti upp hönd

[Axel Jóhann Axelsson, 13.3.2010 kl. 18:48]

Jóhannes, þú getur séð mína hönd á lofti, því öll atvinnusköpun í landinu er bráðnauðsynleg og því fyrr, sem hægt er að koma stórframkvæmdum í gang, því betra.

Það er búið að bíða lengi eftir einhverju "öðru", en ekki bólar mikið á því ennþá.  Hvað "annað" sérð þú í pípunum, sem getur grynnkað á atvinnuleysinu, jafn fljótt og jafn mikið og stóriðjuframkvæmdirnar?