Úrslitaleikur á morgun

"Strákarnir okkar" hafa staðið sig eins og hetjur á EM í handbolta og hafa sannarlega glött hjörtu Íslendinga, nú þegar lítið annað er til að gleðjast yfir, eins og ástandið er á flestum sviðum nú um stundir.

Leikirnir á morgun eru hreinir úrslitaleikir fyrir Ísland, Noreg, Danmörku og Króatíu, um sæti í undanúrslitum mótsins og því verður hart barist fram á lokasekúndur leikjanna.  Allt getur gerst í þessari æsispennandi keppni og úrslitin í hörkuspennandi leik Norðmanna og Dana sýna, að ekkert er öruggt, fyrr en búið er að flauta leikinn af og jafnvel ekki fyrr en nokkrum sekúndum síðar.

Vegna útkomunnar í þeim leik, munu Norðmenn koma gjörsamlega brjálaðir til leiks á móti Íslendingum, því þeir eiga möguleika á að komast í milliriðilinn, ef þeir vinna Ísland með fjórum mörkum, eða fleirum, en Íslendingum dugir jafntefli.

Á morgun, á meðan á leiknum stendur, mun varla sjást bíll á götum og atvinnulífið mun verða meira og minna lamað, svo mikil spenna hefur myndast fyrir leiknum.  Eftir því sem heyrist frá Noregi, er áhuginn fyrir leiknum lítið minni en hérlendis, þannig að vel verður fylgst með bardaganum í báðum löndum.

ÁFRAM ÍSLAND.

Enginn meiðsli í herbúðum Íslendinga

Athugasemdir

[Jón Óskarsson, 27.1.2010 kl. 12:03]

Strákarnir okkar eru virkilega búnir að þjappa þjóðinni saman og gleðja okkur með skemmtilegum og spennandi leikjum.  Það að vera ennþá taplausir á þessu móti er alveg frábær árangur og litlu munað að okkur tækist að sigra í þeim öllum og ekki verið hætta á tapi nema í einum leik.  Það var óbærileg spenna síðustu mínútuna í leiknum á mánudaginn og búast má við því að slík spenna verði allan leikinn á móti Norðmönnum.  Það er alveg öruggt að þeir koma alveg brjálaðir til leiks og gef ekkert eftir.  Okkar menn verða að sýna allt sitt besta.

Áfram Ísland.