Stórkostlegt handboltalið

Íslenska handboltalandsliðið hefur sýnt og sannað á Ólimpíuleikunum að það er eitt allra besta landslið heims um þessar mundir og er meira en líklegt til þess að ná á verðlaunapall núna enda jafnvel enn meiri kraftur í liðinu en í Peking fyrir fjórum árum.

Guðmundur Guðmundsson og hans fólk hefur nánast unnið krafaverk með liðið, þó íslenska landsliðið hafi lengi verið í fremstu röð, hefur það aldrei verið betra en einmitt núna.

Þetta er síðasta stórmótið sem Guðmundur verður með liðið og líklega munu einhverjir af elstu leikmönnunum leggja skóna á hilluna fljótlega og sannarlega mun verða erfitt fyrir arftakana að halda þessu merki á lofti í framtíðinni.

Íslendingar mega vera stoltir af þessu frábæra fólki sem að liðinu stendur og auðvitað leikmönnunum sjálfum, hverjum einasta þeirra.

Unnu Frakka og vinna riðilinn

Björn Valur niðurlægir sjálfan sig - enn og aftur

Björn Valur Gíslason, þingmaður VG og sérstakur skósveinn Steingríms J., hefur alveg sérstakt lag á að gera lítið úr sjálfum sér og opinbera sitt innra eðli, sem lýsir sér í ótrúlegum hortugheitum og skítaustri yfir allt og alla sem honum mislíkar eitthvað við eða eru á annarri skoðun en hann sjálfur.

Nú virðist hann telja sig niðurlægja ÓRG með því að neita að mæta við innsetningu hans í embætti forseta og lætur eins og Alþingi og forsetaembættið eigi að vera algerlega aðskilin hvort frá öðru og að í raun sé um hálfgert valdastríð að ræða á milli embættanna.

Ekki þurfa allir að vera sammála eða sáttir við kjör ÓRG í embættið, né að hann hafi boðið sig fram í fimmta sinn, en niðurstaða kosninganna er lýðræðisleg og í þeim kosningum eins og öðrum er það vilji meirihlutans sem virða ber.

Björn Valur niðurlægir sjálfan sig enn einu sinni með framkomu sinni, sem segir allt sem segja þarf um hann sjálfan, en skiptir engu fyrir Ólaf Ragnar eða lýðræðið í landinu.

„Þar verð ég ekki“

Biðraðir í búðum - úti og inni

Í morgun opnaði enn ein matvöruverslunin á Reykjavíkursvæðinu og eins og við var að búast, þegar ný verslun opnast, myndaðist talsverð biðröð utan við verslunina áður en hún var opnuð.

Það virðist vera orðið nánast undantekningalaust að þegar ný búð opnar á suðvesturhorni landsins grípi einhvers konar kaupæði um sig hjá stórum hópi fólks og er þá alveg sama hvort um leikfanga-, fata-, byggingavöru-, tölvvöru- eða matvöruverslun er að ræða. Kaupæðið virðist ekki fara í neitt vörugreiningarálit.

Á sama tíma kvartar almenningur um hve allt sé dýrt og kaupmáttur lélegur um þessar mundir, en a.m.k. virðist peningaleysi alls ekki hrjá þá kaupóðustu, sem alltaf eru tilbúnir til þess að leggja á sig mislanga bið í mislöngum biðröðum þegar ný kauptækifæri gefast.

Vonandi verður þetta kaupæði til þess að biðraðamenning nái að skjóta rótum á Íslandi, en til skamms tíma þoldu Íslendingar alls ekki að standa í biðröðum eftir einu eða neinu, heldur reyndu að troðast fram fyrir hvern annan til að ljúka sínum erindum á sem allra skemstum tíma.

Ekkert er svo með öllu illt að ekki boði nokkuð gott.

Margmenni við opnun Iceland

Þar sem eru fréttamenn - þar er ÓRG

Ólafur Ragnar Grímsson, forseti vor, er sérfræðingur í að koma sjálfum sér á framfæri við fjölmiðla og má hvergi vita af fjölmiðlamönnum án þess að mæta á staðinn.

Nú eru Ólimpíuleikar að hefjast í London og þó ÓRG hafi ekki náð Ólimpíulágmarki í nokkurri einustu íþróttagrein er Ólafur mættur á svæðið og byrjaður að koma sér á framfæri við fjölmiðlaliðið og þá alveg sérstaklega ljósmyndarana íslensku og fréttamenn sem að venju falla í áróðursgryfjuna og hefja hann á hærri stall en íþróttamennina sem þó eru tilnefndir fulltrúar landsins á leikunum.

Það eina sem kemur í veg fyrir að ÓRG geti baðað sig í sviðsljósinu í London næstu daga er að hann "neyðist" til að eyða tíma í að láta setja sig í forsetaembættið, enn einu sinni, um mánaðamótin en vonir standa þó til að fjölmiðlarnir verði viðstaddir athöfnina, birti af honum myndir þaðan og birti eitt eða tvö viðtöl við hann í tilefni dagsins.

Vonir standa þó til að ÓRG geti brugðið sér til London að innsetningunni lokinni þannig að hann geti áfram baðað sig í sviðsljósinu á kostnað íþróttafólksins, sem unnið hefur sér rétt til keppni á leikunum með mikilli fyrirhöfn og eljusemi.

Einstæð reynsla í Peking

Stórkostleg gleðitíðindi frá Norður Kóreu

Þau hjartnæmu og gríðarlega miklu tíðindi hafa borist frá Norður-Kóreu að hinn ástkæri og stórkostlegi leiðtogi Kim Jong-un hafi kvænst nýlega ungri og glæsilegri söngkonu.

Enginn veit nákvæmlega hve gamall leiðtoginn ástsæli er, en talið er að hann sé á þrítugsaldri og því von til þess að hann geti leitt þjóð sína í a.m.k. fjörutíu til fimmtíu ár á jafn farsælan og glæsilegan hátt og faðir hans gerði og afi þar áður.

Vonandi mun barnalán leika við hjónakornin ungu, þannig að stjórn Norður-Kóreu þurfi ekki að færast út úr þessari ótrúlega vinsælu, ástríku stjórnlistarfjölskyldu næstu árhundruðin.

Ekki er að efa að norðurkóreska þjóðn fagnar þessu hjónabandi heilshugar, hafi hún þá frétt af því. Hafi hún ekki heyrt af þessum stórviðburði ennþá, mun hún a.m.k. fá fréttirnar þegar næsti arftaki tekur við völdum af hinum stórfenglega Kim Jong-un.

Óska norðurkóreska leiðtoganum til hamingju

Kínverjarnir koma, kínverjarnir koma

Fyrir nokkuð margt löngu gekk í bíóhúsunum vinsæl gamanmynd sem hét "Rússarnir koma, rússarnir koma" og lýsti á skemmtilegan hátt samskiptum bandarískra borgara við það sem þeir héldu að væri "innrás" Rússa í samfélag sitt.

Nú geta Íslendingar og aðrir vesturlandabúar snúið þessum frasa upp á annað ríki og farið að segja "Kínverjarnir koma, kínverjarnir koma", enda er kínversk "innrás" í raun hafin á fjárhagslegum, efnahagslegum og pólitískum vettvangi.

Kínverjar leggja mikla áherslu á að efla áhrif sín og völd um allan hinn vestræna heim og er litla Ísland þar ekki undanskilið, sem best sést á ótrúlegum áformum um lúxusuppbyggingu ferðaþjónustu nánast uppi á öræfum landsins, ásamt miklum áhuga Kínverja á hafnaraðstöðu hérlendis vegna væntanlegrar auðlindanýtingar á norðurslóðum og siglinga um "Norðurleiðina".

Svo halda einhverjir að "innrás" fyrrverandi lágt setts embættismanns í kínverska áróðursmálaráðuneytinu, sem skyndilega varð einn auðugasti maður Kína, sé einhver tilviljun og sé alls ekki skipulögð af kínverskum yfirvöldum með framtíðarhagsmuni kínverska heimsveldisins í huga.

Íslendingar hafa oft verið trúgjarnir, sérstaklega þegar útlendingar eiga hlut að máli, en hafa ber í huga að þegar eitthvað lítur út fyrir að vera of gott til að vera satt, þá er það nánast undantekningalaust alls ekki satt.

Skoða hafnir á Íslandi

Munu Íslendingar taka þátt í refsiaðgerðum gegn Færeyjum?

Framkvæmdastjórn ESB virðist telja að lítið mál verði að þvinga Íslendinga til uppgjafar í makríldeilunni, enda Samfylkingunni og nokkrum nytsömum sakleysingjum mikið í mun að koma í veg fyrir að nokkuð geti tafið innlimunina í bandalagið.

Þrátt fyrir að reiknað sé með að Íslendingar verði leiðitamir í málinu er álitið að Færeyingar muni ekki láta kúga sig, enda alls ekki á þeim buxunum að láta ESB stjórna sínum fiskveiðum.

Fréttin hefst á þessari málsgrein, sem segir í raun það sem segja þarf um málið: "Framkvæmdastjórn Evrópusambandsins er ekki bjartsýn á að það takist að semja við Færeyinga vegna makríldeilunnar en er hins vegar aðeins bjartsýnni í tilfelli Íslands vegna umsóknar landsins um inngöngu í sambandið. Þetta kemur fram hjá fréttaveitunni Agence Europe í gær."

Ætli Jóhanna og Steingrímur J. muni í framhaldinu samþykkja að taka þátt í refsi- og efnahagsaðgerðum gegn færeyingunum? 

Bjartsýnni á samninga við Ísland

Kínverjar í Evrópuinnrás

Í kjölfar evrukreppunnar hafa Kínverjar stóraukið sókn sína inn í Evrópu á fjármálasviði og kaupa upp og stofna hvert fyrirtækið á eftir öðru í þeim löndum sem verst hafa orðið úti og nægir þar að nefna Grikkland og Spán. Ekki má heldur gleyma stóraukinni innrás Kínverjanna á íslenskan markað og er Nubo og Grímsstaðir nýjasta dæmið um það.

Á Spáni er innrásin hafin að fullu og í fréttinni kemur vel fram í lokin hver áhrif Kínverjarnir eru að kaupa sér með þessari athafnasemi sinni, en þar segir: "Fram kemur í fréttaskýringunni að vegna aukinna tengsla landanna á viðskiptasviðinu stuggi spænsk stjórnvöld ekki við Kínverjum með inngripum í viðkvæm málefni. Eru innanríkismál í Tíbet líklega á þeim lista."

Á þessu bloggi hefur margoft verið bent á þessa innrás Kínverjanna í hinn vestræna heim, en baráttan er ekki háð með vopnum að þessu sinni, heldur peningum, og sagt bæði í gríni og alvöru að tímabært sé að taka kínversku upp sem skyldufag í grunnskólum landsins til að undirbúa komandi kynslóðir til þess að geta að minnsta kosti gert sig skiljanlegar við þessa væntanlegu herraþjóð.

Í þessu efni, sem öðrum, er ekki ráð nema í tíma sé tekið. 

 

Kínverjar leika á spænsku kreppuna

Ótrúlegt vanþakklæti

Dönskum glæpaforingja, líklega af marókóskum ættum, tókst að flýja úr fangelsi í danmörku með því einfalda ráði að segjast vera að fara í helgarfrí og að sjálfsögðu trúði fangavörður því eins og nýju neti, enda varla þótt ástæða til að rengja slíkan öðlingsmann. Auðvitað datt fangaverðinum ekki í hug að biðja þennan öðlingspilt um staðfestingu á helgarfríinu og hvað þá að athuga pappíra þar að lútandi.

Samkvæmt fréttinni er "Fangelsið sem um ræðir er á Austur-Jótlandi og á að vera það öruggasta og nútímalegasta í Danmörku. Þar starfa 260 manns en fangarnir eru 228."  Eins og sjá má af þessu eru starfsmennirnir fleiri en fangarnir, þannig að líklega hefur hver fangi sinn eigin einkaþjón enda er þetta nútímalegasta fangelsi Danmerkur, eins og áður sagði, og þar að auki það öruggasta.

Það verður að líta á það sem ótrúlegt vanþakklæti af þessum glæpaforingja að afþakka þá þjónustu sem danska ríkið býðst til að veita honum og velja lífsmáta glæpona í Marokkó í staðinn, en þangað halda Danir að gæðapilturinn hafi farið, enda sjálfsagt eins vandalaust fyrir hann að ferðast á milli landa eins og það var auðvelt að labba út úr fangelsinu.

Ef að líkum lætur mun glæponinn snúa fljótlega aftur til Danmerkur og fangelsisins þegar hann sér mismuninn á þeim lúxus sem fangalífið þar býður á móti barningnum sem reikna má með að hann þurfi að glíma við í Marokkó. 

Gekk út úr fangelsi í Danmörku

Hæstiréttur dæmdur af Mannréttindadómstóli Evrópu

Mannréttindadómstóll Evrópu hefur í raun ómerkt tvo dóma Hæstaréttar vegna meiðyrða sem kveðnir höfðu verið upp gegn blaðamönnum sem fjallað höfðu um tvo nektarstaði, vændisstarfsemi og aðra ólöglega iðju sem hugsanlega tengdust starfsemi þeirra.

Þetta verður að teljast mikill áfellisdómur yfir Hæstarétti, ekki síst í því ljósi að dómana kváðu upp nokkrir af elstu og virtustu dómurum réttarins. Í máli Erlu voru það þau Ingibjörg Benediktsdóttir, Garðar Gíslason og Markús Sigurbjörnsson og í máli Bjarkar þau Árni Kolbeinsson, Ingibjörg Benediktsdóttir og Ólafur Börkur Þorvaldsson.

Hæstiréttur á að vera útvörður laga og réttar í landinu og gæta til hins ítrasta að mannréttindum og tjáningarfrelsi borgaranna og í því ljósi hlýtur hann að þurfa að endurskoða vinnubrögð sín og viðhorf vegna meiðyrðamála og jafnvel verður í framhaldi af þessum úrskurði að endurskoða öll lög um mannréttindi og tjáningarfrelsi í landinu.

Mannréttindi og tjáningarfrelsi eru dýrmætustu réttindi fólks í lýðræðisríkjum og um þann rétt á ekki að ríkja nokkur ágreiningur.

Unnu mál gegn ríkinu