Lýðskrum Helga Hjörvar vegna skuldamála

Helgi Hjörvar, þingmaður Samfylkingarinnar, afhjúpaði sig sem lýðskrumara af stærri gerðinni á Alþingi í dag þegar hann í fyrirspurn til Frosta Sigurjónssonar, þingmanns Framsóknarflokksins, lét að því liggja að eðlilegt væri að sumir húsnæðislánaskuldarar væru í öngum sínum vegna þess að útlit væri fyrir að þeir fengju ekki nema eina leiðréttingu á lánum sínum, þegar og ef kosningaloforð Framsóknar kemur til framkvæmda.

Helgi segir að þeir sem hafi  fengið niðurfellingu skulda eftir svokallaðri 110% leið hafi miklar áhyggjur af því að fá ekki leiðréttingu aftur, þegar fyrirhuguð lækkun lána vegna verðbólguskotsins á árunum 2007-2010 verður að veruleika, þegar og ef fyrirhugaðar ráðstafanir þar um verða framkvæmdar.

Auðvitað getur ekki verið að nokkrum manni detti í hug að hann fái skuldaniðurfellingu oftar en einu sinni vegna sömu skuldanna og því er lýðskrum af því tagi sem Helgi Hjörvar og fleiri stunda afar ámælisvert.

 

Fái ekki leiðrétt tvisvar sinnum

Að þegja til að "líta betur út"

Margt afar athyglisvert kemur fram í viðhangandi frétt af málefnum ESB, fjármála- og bókhaldsóreiðu þess og þeirri staðreynd að aldrei hafa endurskoðendur báknsins getað áritað ársreikningana sem rétta.

Fram kemur að Daly Telegraph segi í umfjöllun um málið "að endurskoðendur ESB hafi, frá því að þeim var gert skylt að senda frá sér árlega skýrslu um fjármál sambandsins árið 1994, ekki getað staðfest reikninga þess vegna víðtækrar óreglu í bókhaldinu og þar á meðal fjársvika."

Þessum staðreyndum vill Herman van Rompuy, forseti leiðtogaráðs ESB, leyna fyrir almenningi vegna þess að almenn vitneskja um þetta hneyksli í rekstri ESB skapaði neikvæða umfjöllun um stórríkið væntanlega og tiltrú fólks til þess færi síminnkandi.

Leiðtogaráðsforsetinn gaf jafnvel í skyn að endurskoðendurnir ættu, þrátt fyrir eiðsvarna skyldu sína, að gefa jákvæða umsögn um bókhaldið þrátt fyrir alla óregluna og svindlið sem það sýnir glögglega.

Ekki kæmi  á óvart þó ESB samþykkti fljótlega að bókhald og fjárreiður báknsins skuli vera "einkamál ESB" og opinber birting og umfjöllun um það verði þá algerlega óheimil.

Allt til að efla tiltrú almennings á þessu gríðarlega skriffinnskubákni, sem virðist leynt og ljóst stefna að því að líkjast Sovétríkjunum sálugu meira og meira. 

Gefi betri mynd af Evrópusambandinu

Skynsamleg samþykkt ESB gegn heimskulegri framleiðslu

Þó hagsmunum Íslands í heild sé betur borgið utan ESB en innan þess er full ástæða til að halda uppi góðu sambandi og viðskiptum við Evrópulöndin, enda er það gert með samningnum um evrópska efnahagssvæðið.

Reglugerðafargan ESB, sem Íslendingar þurfa að taka upp, er gífurlegt og oft hefur Alþingi verið kaþólskara en páfinn, þ.e. þegar reglugerðir hafa verið teknar upp algerlega óbreyttar þrátt fyrir heimildir til þess að laga þær að aðstæðum einstakra landa og nægir þar að benda á reglugerð um raforkudreifingu sem dæmi.

Í viðhangandi frétt er rætt um samþykkt ESB um að takmarka notkun lífræns eldneytis þannig að það fari aldrei yfir 10% af heildarnotkun og að aldrei meira en 6% komi frá landi sem sérstaklega er ræktað til eldneytisframleiðslu úr plöntum.

Það verður að teljast algerlega geggjað að leggja ræktunarland undir eldsneytisframleiðslu á meðan hungur ríkir víða í heiminum og svo langt hefur þessi vitleysa gengið að byrjuð er ræktun lands á Íslandi, því harðbýla landi, til framleiðslu á lífdísel.  

Það hlýtur að teljast toppurinn á þessari vitleysu að ætla að "rækta" eldsneyti, jafnvel á norðurhjara veraldar, á meðan milljónir barna deyja úr hungri á hverju ári. 

Takmarka notkun lífræns eldneytis

Hundurinn er orðinn "þarfasti þjónninn"

Þegar eldur kviknaði í íbúð í fjölbýlishúsi s.l. nótt var það heimilishundurinn sem líklega bjargaði lífi íbúanna í íbúðinni með gelti sínu.  Enginn reykskynjari var uppsettur á staðnum, sem auðvitað ætti að vera sjálfsagður hlutur, en það á  við um ótrúlega mörg heimili landsins.

Þessi saga sannar enn og aftur að hundur ætti að vera á hverju heimili, enda ekki hægt að hafa ljúfari og betri vini í daglegu návígi.  Til viðbótar dregur hundur heimilisfólkið út í göngutúra og eru því heilsubætandi í ofanálag við allt annað.

Reykskynjarar, sjúkrakassar og fleiri öryggisatriði eiga auðvitað að vera í lagi á hverju heimili, en hundur ætti einnig að vera gleðigjafi jafnvíða.

Hundurinn hefur tekið við af hestinum sem "þarfasti þjónninn" og er góður og tryggur vinur að auki. 

Hundur bjargaði mannslífum

Þá lét Birgitta eftir sér að spila á sínar lægstu hvatir

Steinunn Valdís Óskarsdóttir guggnaði undan margra vikna ofsóknum ofstopafólks vorið 2010 og sagði af sér þingmennsku til þess að fá frið fyrir sig og fjölskyldu sína á eigin heimili.

Steinunn segir að Birgitta Jónsdóttir, þá þingmaður Hreifingarinnar og nú Sjóræningja, hafi verið einn af forystumönnum ofsóknarliða sem þá hefur látið eftir sér að spila á sínar lægstu hvatir, en eftir því sem hún sjálf segir þá lætur hún slíka háttsemi oft eftir sér.

Í umræðum á Alþingi í dag datt m.a. upp úr henni í þingræðu um störf og stefnu ríkisstjórnarinnar: "En vil ég standa á vígvelli í næstu fjögur ár þar sem spilað er inn á lægstu hvatir mannlegs eðlis?“ sagði hún ennfremur og sagðist ekki vilja láta það eftir sér."

Miðað við þessi ummæli hennar finnst henni meira en ásættanlegt að "spila inn á lægstu hvatir mannlegs eðlis", en lætur það ekki eftir sér nema við ákveðin tækifæri.

Steinunn Valdís virðist hafa lent í tímabili þar sem Birgitta lét þessar lágu hvatir eftir sér. 

Segir Birgittu að baki aðför

Ótrúleg birtingarmistök mbl.is

Viðhangandi viðtal við dóphaus, sem dásamar E-pilluna undir nýju og sakleysislegu nafni, þ.e. Mollý, hljóta að teljast einhver dapurlegustu og vanhugsuðustu birtingarmistök á vefmiðli í langan tíma.  

Viðtalið er einungis hluti  umfjöllunar sem birtist í Monitor, sem borinn er út með Mogganum, en þar er fjallað um alvarlegar hliðar á neyslu efnisins og þar á meðal dauðsföll sem rekja má beint til neyslunnar.

Viðtalið, sem birtist á mbl.is, er því algerlega út úr kortinu, en í því  er neysla dópsins dásömuð og látið eins og það sé algerlega hættulaust og nánast hreinn gleðigjafi á mannamótum.  Slík upphafning eiturlyfja er ófyrirgefanleg á mest lesna vefmiðli landsins. 

Viðkomandi "blaðamaður" hlýtur að biðjast opinberlega afsökunar á þessum mistökum. 

Viðtal við Mollý neytanda

Blekkingar um "óútskýrðan kynbundinn launamun"

Starfsfólki hins opinbera, bæði hjá ríki og sveitafélögum, er raðað í launaflokka samkvæmt starfsmati, sem tekur ekkert tillit til þess einstaklings sem gegnir starfinu heldur miðast eingöngu við umfang og eðli starfsins sjálfs.

Samkvæmt þessu mati skiptir engu máli hvort karl eða kona er ráðin til starfans, launin eru ákveðin fyrir starfið sjálft en ekki einstaklinginn sem gegnir því.  Áratugum saman hefur hins vegar verið rætt um "óútskýrðan kynbundinn launamun" hjá hinu  opinbera og er sú umræða algerlega óskiljanleg í ljósi þess hvernig laun eru ákvörðuð fyrir störf hjá opinberum aðilum.

Það hljóta að vera hæg heimatökin að fara ofan í saumana á því hvað er verið að greiða fyrir hvert einasta starf, sem metið hefur verið til launa í launatöflum ríkisins og sveitarfélagana og skýra út hvers vegna sumir fá viðbótargreiðslur (aðallega karlmennirnir), en aðrir ekki (aðallega konurnar).  Einnig hlýtur að vera einfalt að sjá hvaða viðbótargreiðslur þetta eru og hvort þær eru í raun nauðsynlegar starfsins vegna, t.d. bílastyrkir, símapeningar, dagpeningar eða hvað allar aukasporslurnar eru kallaðar til að komast fram hjá kjarasamningunum.

Lágmarkskrafa er að hætt verði að bjóða upp á þessa endalausu umræðu um "óútskýrðan kynbundinn launamun".  Hann er hvort sem er einungis blekking sem opinberir aðilar og viðkomandi stéttarfélög hafa engan áhuga á að útrýma. 

Karlar með 20% hærri laun í Suðurkjördæmi

Húmorslaus kóngur og borgarstjóri á sama plani

Svíakóngur er annálaður fyrir sinn þurra og einkennilega húmor, sem öðrum en honum sjálfum er lítt skiljanlegur eða þykir a.m.k. alls ekki  fyndinn af flestum.  Svíar hneykslast nú vegna nýjustu "brandara" hans um að kóngur hyggist bara "loka sjoppunni" og stunda bleyjuskipti á barnabarni sínu  í New York næstu árin.  Ekki þótti heldur sniðugt að hann skyldi segja að líklega flytjist dóttirin til Íslands því þar sé betra að búa en í Svíþjóð.

Íslendingar kannast vel við lélegan húmor einstkra framámanna hérlendis og nærtækast er að benda á borgarstjórann í Reykjavík sem enginn veit hvort meinar það sem hann segir, eða hvort það á að vera fyndið enda með afar furðulegan húmor sem fáum hugnast.

Aðalmunurinn á Svíakóngi og Reykjavíkurborgarstjóranum er þó sá að kóngurinn svarar heimskulegum spurningum með heimskulegri fyndni, en borgarstjórinn svarar skynsamlegum spurningum með aulahætti, enda skilur hann þær sjaldnast. 

Svíakonungur harðlega gagnrýndur

Siglufjörður verður í forystu ferðamannabæja

Mikil uppbygging ferðaþjónustu hefur verið á Siglufirði undanfarin ár og er henni alls ekki lokið, en þegar allt verður orðið eins og fyrirhugað er verður kaupstaðurinn án nokkurs vafa einn eftirsóttasti ferðamannabær landsins.

Unnið er við nýjan og glæsilegan golfvöll, stækkun skíðasvæðisins er fyrirrhuguð og hafin er bygging nýs hótels í hjarta bæjarins gegnt glæsilegum veitingastöðum sem opnaðir hafa verið í endurnýjuðum fiskvinnsluhúsum við höfnina.

Sá, sem á heiðurinn af þessari uppbyggingu allri, er framkvæmdamaðurinn og fjárfestirinn Róbert Guðfinnsson sem með þessum framkvæmdum er að breyta svip fæðingarbæjar síns úr því að hafa áður fyrr verið einn fremsti fiskvinnslubær landsins í að verða glæsilegasti ferðamannabær landsins.

Við þetta er síðan að bætast bygging Orra Vigfússonar og Chad R. Pike á glæsihóteli í Fljótum og þyrluþjónusta við skíðafólk, sem kýs að skíða á óhefðbundnum skíðasvæðum og verður sú lúxusferðamennska til að ýta enn undir að Tröllaskaginn og Siglufjörður munu laða til sín ferðafólk úr allri tegund ferðaþjónustunnar í nánustu framtíð og raunar til  langrar framtíðar.

Ef til vill verða þetta glæsilega framtak öðrum fjársterkum aðilum til fyrirmyndar við uppbyggingu í heimabæjum sínum hringinn í kringum landið.  Þangað til a.m.k. verður Siglufjörður fremstur ferðamannastaða landsins. 

 

Yfirmaður hjá Blackstone leggur til fé

Hvenær er æra uppreist og skuld greidd?

Mikil umræða hefur skapast vegna þess klaufagangs sem upp kom vegna beiðni Baldurs Þórhallssonar til Jóns Baldvins Hannibalssonar um að vera gestafyrirlesari á námskeiði Baldurs í Háskólanum í vetur og síðan afturköllun þeirrar beiðni vegna klámbréfa Jóns Baldvins til ungrar stúlku í fjölskyldu eiginkonu sinnar fyrir allmörgum árum í sendiherratíð sinni.

Bréfaskriftirnar voru kærðar til saksóknara en fóru aldrei fyrir dómstóla þar sem sök var orðin fyrnd vegna þess hve lengi hafði dregist að leggja kæruna fram.  Jón Baldvin baðst síðar afsökunar á "dómgreindarbresti" sínum, en sú afsökunarbeiðni var aldrei tekin til greina af þolandanum og engin fyrirgefning veitt.

Rútubílstjóri var rekinn úr vinnu eftir að upp komst að hann hafði  á árum áður verið dæmdur fyrir barnaníð og þann dóm hafði hann setið af sér og ekki komist í kast við lögin eftir það, svo vitað sé.  Þetta leiðir hugann að því hvenær æra manna sé uppreist og skuld sakamanna við þjóðfélagið telst greidd.

Er skuldin uppgerð eftir að sakamaður hefur afplánað dóm sinn og á hann þá að vera laus mála og þurfa ekki að þola viðbótarrefsingar og vinnumissi jafnvel mörgum árum eftir að brot var framið og afplánun var lokið?  Er skuld við fórnarlamb uppgerð með afsökunarbeiðni þess seka, jafnvel þó fórnarlambið taki þeirri beiðni ekki vel og fyrirgefi aldrei það sem misgert var? 

Þetta eru siðferðisspurningar sem vert er að  velta vandlega fyrir sér., 

Álykta ekki um mál Jóns Baldvins