Árni Páll segir aðeins hálfa söguna - eins og vanalega

Árni Páll, félagsmálaráðherra, sem á það eina markmið í stjórnmálum, að koma Íslandi inn í ESB, með góðu eða illu, hefur á sínum ráðherraferli ekki komið með eina einustu tillögu, hvorki til úrbóta, eða annars, á vandamálum þjóðfélagsins, heldur hefur hann komið með alls kyns yfirlýsingar, sem hann hefur svo dregið til baka og verið að hörfa úr einu víginu í annað, undan kröfum skuldsettra heimila um einhverskonar aðgerðir til aðstoðar.

Nú kemur hann með þessa yfirlýsingu:  "Það kemur ekki til greina að skerða atvinnuleysisbætur og álögur á atvinnurekendur verða ekki auknar, þar sem atvinnulífið ber það ekki sagði Árni Páll Árnason, félagsmálaráðherra í fréttum RÚV í dag en allt útlit er fyrir að Atvinnuleysistryggingasjóður tæmist um mitt næsta ár. Ríkissjóður verði að koma til móts við sjóðinn með framlögum og þá vonast Árni Páll til að hægt verði að draga úr atvinnuleysi á næsta ári."

Árni Páll ætti að vita, þar sem hann er ráðherra, að ríkissjóður er galtómur og væntanlega er Árni Páll, eins og aðrir ráðherrar, á fullri ferð að móta niðurskurðartillögur uppá tugi milljarða króna ásamt því að móta hækkanir á öllum sköttum sem fyrir eru og að finna upp alls kyns nýja skatta, til þess að klóra saman fjárlög fyrir næsta ár.

Það sem er rétt hjá Árna Páli er, að atvinnulífið ber ekki auknar álögur, en hvaðan ætlar Árni Páll að fá fjármagn í ríkissjóð til þess að standa undir framlögum í Atvinnuleysistryggingasjóð?

Auðvitað svarar hann því ekki, en peningar í ríkissjóð koma ekki frá neinum öðrum en skattgreiðendum.  Hann er því að boða aukaskattahækkanir í þessum tilgangi á almenning í landinu.

Árni Páll er ekki betri sögumaður en svo, að hann segir fólki einungis hálfa söguna.

Ríkið komi til móts við sjóðinn

Athugasemdir

[Kolbrún Bára (IP-tala skráð) 20.9.2009 kl. 16:21]

Það er kerfisbundið unnið að því þessa dagana, að gera allan  almenning, sem hefur haldið uppi þessu þjóðfélagi að þurfalingum.

Eftir nokkur ár verða tvær stéttar í þessu landi, flatmagandi yfirstétt og eilífðar öreigar.