Meiri útgjöld - minni árangur

Útgjöld á Íslandi til menntamála eru hlutfallslega þau mestu innan OECD ríkja, eða eins og fram kemur í fréttinni;  "Á Íslandi fóru 18,1% útgjalda hins opinbera til menntamála árið 2006 en að meðaltali vörðu OECD ríkin 13,3% útgjalda hins opinbera til menntamála."

Á sama tíma og Ísland ver svo stóru hlutfalli af ríkisútgjöldunum til menntamála, kemur landið illa út í öllum samanburði við önnur lönd, þegar árangur skólastarfsins er metinn.  Þessir gífurlegu fjármunir sem í menntamálin fara, umfram önnur OECD ríki, skila sér alls ekki í betri nemendum eða betri námsárangri, reyndar er staðreyndin þveröfug.

Ef hægt væri að ná meðaltalsárangri hinna OECD ríkjanna í menntun námsmanna með sama meðaltali opinberra útgjalda, væri hægt að spara nokkra milljarða á ári í kostnaðinum, án nokkurrar skerðingar í þjónustu.

Þetta hlýtur að verða eitt helsta athugunarefnir í þeim niðurskurði ríkisútgjalda (og skattahækkana) sem framundan er.

Ísland ver hlutfallslega mestu til menntamála

Athugasemdir

[Pétur (IP-tala skráð) 8.9.2009 kl. 10:23]

Vandinn er bara sá að þessi eyðsla fer að mestu fram á grunnskólastiginu, og það er í höndum sveitarfélaganna en ekki ríkisins. Það sem gleymist er nefnilega það að á háskólastigi eyðir engin þjóð Vestur-Evrópu jafn litlu á hvern nemanda og Íslendingar (Norðurlandaþjóðirnar eyða t.a.m. flestar um helmingi meira en Íslendingar). Ísland er þannig eina ríkið í OECD þar sem meðalnemandinn á grunnskólastigi er dýrari en grunnskólaneminn -- yfirleitt er þetta þannig að háskólaneminn er um 2svar til 3svar sinnum dýrari. Ríkið ætlar sér að skera verulega niður í menntamálum, en þar verður því miður ráðist á garðinn þar sem hann er lægstur -- þ.e. á háskólaemenntunina -- enda er það helst hún sem ríkið hefur vald yfir.

[Axel Jóhann Axelsson, 8.9.2009 kl. 10:44]

Það er ekki alveg rétt að um grunnskólastigið sé að ræða, sem er á ábyrgð sveitarfélaganna, heldur er samanburðurinn sem um er að ræða á framhaldsskólastiginu, sem ríkið sér um.  Þetta kemur fram í Pisakönnuninni, sem má lesa um t.d. hérna

Það er sem sagt ríkið, sem ekki stendur sig í menntamálunum og vel má vera að forgangsröðunin sé ekki rétt, en eftir sem áður verður að taka verulega til í þessum málaflokki.

[Pétur (IP-tala skráð) 8.9.2009 kl. 11:48]

a) Pisa-könnunin nær til 15 ára unglinga, þ.e. nemenda í síðasta bekk grunnskólastigsins en ekki til framhaldsskólastigsins eins og fram kemur í fréttinni sem þú sendir tengil á.

b) OECD skýrslan nær til útgjalda á öllum skólastigum. Þú ættir kannski að líta aðeins á hana áður en þú fullyrðir um innihaldið (hún er til ókeypis á rafrænu formi hjá OECD).

[Axel Jóhann Axelsson, 8.9.2009 kl. 13:07]

Það er óþarfi að karpa um það á hvaða skólastigi sóunin er mest, þó það geti auðvitað verið viðkvæmnismál fyrir kennara á hinum ýmsu stigum.  Skattgreiðendur eiga ekki að þurfa að horfa upp á sóun fjármuna á hvaða stjórnsýslustigi sem er.  Árangurinn speglar vinnubrögðin.

Hér er allavega vitlaust gefið, og í þeirri vitlausu gjöf eru allt of mörg spil.