Vaxtalaus lán

Kreppan í Svíþjóð er ekki ennþá orðin eins djúp og hún er hér á landi, en sænska stjórnin hefur, í viðleitni sinni til örvunar atvinnulífsins og einkaneyslu, heimilað tímabundið, að kostnaður við endurbætur á húsum verði frádrátttarbær frá skatti.  Hér á landi hefur verið samþykkt að heimila tímabundið, að vinna á byggingarstað verði undanþegin virðisaukaskatti, sem einnig er hugsað til að auka atvinnu í byggingageiranum.

Handelsbanken í Svíþjóð hefur brugðist við þessu útspili sænsku stjórnarinnar með því að bjóða vaxtalaus lán til eins árs í þessu skini og reiknar með svo mikilli eftirspurn eftir lánunum, að opið verður í 400 útibúum bankans á laugardaginn, til að afgreiða lánin.

Á Íslandi er viðhaldið svo svívirðilegum okurvöxtum í kreppunni, að fáir treysta sér til þess að nýta sér virðisaukaskattsafsláttinn, vegna kostnaðarins við lánin.

Seðlabankinn er byrjaður að rumska.  Nú þarf hann að fara að vakna almennilega.

Svíum bjóðast vaxtalaus lán

Athugasemdir

[Óli (IP-tala skráð) 12.5.2009 kl. 09:48]

Þetta er reyndar alveg snilldarhugmynd, þeir ná inn tekjum í gegnum lántökugjöldin. Það er lítið mál fyrir bankann að bjóða vaxtalaus lán þegar stýrivextir eru lágir með því að rukka hærri lántökugjöld en venjulega. Ég myndi giska á að það væru svona 4-5% lántökugjöld (í stað 1-2% venjulega?) á þessu án þess að ég viti það sérstaklega.

[Kári (IP-tala skráð) 12.5.2009 kl. 10:12]

Axel. Einhvern veginn ætlar það ekki að síast inn hjá landsmönnum að kreppan er *langverst* á Íslandi af öllum þeim þjóðum sem við erum vön að miða okkur við. Það er engum til góðs að vera sífellt að "bagatellísera" þann gífurlega vanda sem við stöndum frammi fyrir. Við gerðum lítið úr vandanum fyrir kreppu, og móðguðumst þeim sem sögðu okkur sannleikann.

*** Við ætlum aldrei að læra ***