Í fangelsi strax og mál upplýsast

Harkan í fíkniefnaheiminum virðist fara sívaxandi hér á landi og fantaskapurinn við innheimtumál í þeirri veröld slíkur, að með sama áframhaldi getur hann varla endað nema á einn veg, þ.e. með dauða skuldarans.

Glæpaklíkur sýnast einnig vera að hreiðra um sig í landinu í æ meiri mæli og hrottaskapur innan þeirra og ekki síður á milli slíkra hópa eykst með ári hverju og er það þróun sem lögreglan óttast einna mest um þessar mundir, enda klíkufélagar farnir að gagna um vopnaðir og beita þeim hver á annan og ekki síður við innheimtur fíkniefnaskulda.

Við handrukkun er oft beitt mikilli hörku og virðast glæpamennirnir lítið óttast að verða gripnir fyrir slíkt athæfi, enda er þeim alltaf sleppt að yfirheyrslum loknum, enda játa þeir oftast glæpi sína því þá "telst málið vera upplýst". Síðan líða mánuðir og ár þar til dæmt er í slíkum málum og þar á eftir hefst bið eftir afplánun, sem dregist getur mánuðum saman til viðbótar og jafnvel fallið algerlega niður vegna fyrningar.

Brýnt er að koma upp stóru fangelsi, þannig að svona glæpalýð þurfi ekki að sleppa lausum að yfirheyrslum og játningum loknum, heldur verði hægt að færa hann beint fyrir dómara og þaðan í umsvifalausa afplánun fangelsinsdóma.

Svona hrottalegum glæpum fækkar ekki nema úrræði séu fyrir hendi til að taka hrottana umsvifalaust úr umferð.

Börðu mann með járnstöngum

Athugasemdir

[Kristinn (IP-tala skráð) 23.5.2011 kl. 12:29]

Biskupsvígsla á Presthúsabraut endar með því að brot er framið!

[hilmar jónsson, 23.5.2011 kl. 12:45]

Sammála Axel..

[Ingibjörg Guðrún Magnúsdóttir, 23.5.2011 kl. 14:22]

Já mikið er ég sammála þér Axel, það er með ólíkindum að mönnum sé sleppt lausum eftir viðurkenningu á svona verknaði...

[doctore (IP-tala skráð) 23.5.2011 kl. 15:08]

Breyta Hörpu í Hörku Fangelsi; :Það er þjóðráð. ekki óráð eins og harpan er í dag...

[Axel Jóhann Axelsson, 23.5.2011 kl. 16:00]

Ingibjörg, að þeim skuli alltaf vera sleppt eftir játningu er vegna þess að þá telst "málið upplýst" og eins og kerfið er núna, þarf að bíða jafnvel mánuðum saman eftir að málið fari fyrir dóm og þá er oft dæmt vegna margra afbrota í einu, sem safnast hafa upp á viðkomandi glæpamenn á meðan að á biðinni hefur staðið.

Þetta er áreiðanlega ekki svo stór hópur, þ.e. hópur þessara hrotta, sem þyrfti að loka inni strax eftir að mál upplýsast, að líkamsmeiðingunum myndi örugglega snarfækka, ef hægt væri að dæma þá strax eftir að mál upplýsast og afplánun gæti hafist í beinu framhaldi.

[Axel Jóhann Axelsson, 23.5.2011 kl. 16:02]

doctore, það væri mikið óráð að breyta Hörpu í Hörku. Harpa á eftir að vera stolt þjóðarinnar í tónlistar- og byggingarlegu tilliti um langa framtíð.

Harpa er hús sem Íslendingar eiga að vera stoltir af og ekki síður þeirri starfsemi sem þar mun fara fram, öllum til gleði og menningarauka.

[Nafnlaus sorrý (IP-tala skráð) 23.5.2011 kl. 18:51]

Afsakið nafnleysið, er reyndar alveg sammála því að það er ótækt að hafa glæpamenn lausa svo mánuðum skiptir.

Langaði samt bara aðallega að nefna að í þessu máli er um aðeins flóknara mál (tengsl) en skuldir eða rukkanir að ræða, þarna eru auðvitað sekir menn samt sem áður.

[Axel Jóhann Axelsson, 23.5.2011 kl. 19:01]

Að sjálfsögðu skiptir ekki máli hver bakgrunnur ofbeldisins er. Hrotta, sem stórslasa fólk, þarf að taka úr umferð strax, enda er alltof oft um sömu ofbeldismennina að ræða margítrekað.

Margir þeirra eru orðnir svo forhertir að þeir játa afbrot sín umsvifalaust í þeirri vissu að þar með sleppa þeir út aftur og margir mánuðir eða jafnvel ár líða, áður en málin eru tekin til dóms og hvað þá að fangelsisafplánun hefjist.

[Páll (IP-tala skráð) 24.5.2011 kl. 01:27]

Hópurinn er stærri en fangelsisrýmin. Það er ekki pláss til að hýsa alla hrottana.

[Axel Jóhann Axelsson, 24.5.2011 kl. 05:40]

Páll, einmitt vegna skorts á fangelsisrýmum var nú þessi setning sett inn í upphaflega textann:

"Brýnt er að koma upp stóru fangelsi, þannig að svona glæpalýð þurfi ekki að sleppa lausum að yfirheyrslum og játningum loknum, heldur verði hægt að færa hann beint fyrir dómara og þaðan í umsvifalausa afplánun fangelsisdóma."

Það verður að vera til staðar pláss til að hýsa alla hrottana, ef árangur á að nást í baráttunni gegn ofbeldinu.