Ítrekaðar árásir Íslands á varnarlaust Bretland

Bresku dagblöðin bregðast misjafnlega við niðurstöðu þjóðaratkvæðagreiðslunnar um þrælalögin, sum segja að Bretar eigi að skammast sín og önnur eru harðorð í garð Íslendinga fyrir að standa á rétti sínum.

Fyndnast er þó þetta, sem mbl.is tekur upp úr leiðarasíðu Daily Mirror:  "Þar segir, að nærri 40 ár séu liðin frá þorskastríðunum en Ísland hafi ekkert breyst. Þeir hafi þá farið og rænt fiskimiðum Breta á Norður-Atlantshafi, siglt á breska togara og skorið ítrekað á net þeirra.

„Nú eru þeir með sama yfirganginn í garð Breta vegna peninga, sem töpuðust þegar bankakerfið þeirra hrundi og tvívegis neitað í þjóðaratkvæðagreiðslu að endurgreiða féð. Ráðherrarnir okkar verða að sýna samskonar staðfestu og leggja áherslu á, að við viljum fá peningana okkar til baka... með vöxtum."

Það á ekki af smáríkinu Bretlandi að ganga, að þurfa á nokkurra áratuga fresti að verjast árásum og yfirgangi annars eins risaveldis og Ísland er.

Daily Mirror vonast greinilega eftir samúð umheimsins með lítilmagnanum.

Misjöfn viðbrögð breskra blaða

Athugasemdir

[Eva Sól (IP-tala skráð) 11.4.2011 kl. 14:10]

Óborganlegt

[Birgir (IP-tala skráð) 11.4.2011 kl. 14:15]

Við höfum nú ekki miklar áhyggjur af þessu, er það? Daily Mirror er óttalegt ruslblað: að uppistöðu til kjaftasögur og slúður um "fræga fólkið" og lesendur þess mestmegnis bjórþambandi lágstéttarfólk sem hefur engan áhuga á fjármálum eða alþjóðstjórnmálum.

Telegraph - sem tekur upp hanskann fyrir Íslendinga - höfðar meira inn á millistéttina og vandaðri fréttaskýringar.

Ég missi engan svefn þó gula pressan í Bretlandi rövli eitthvað ... þeir verða búnir að missa áhugann á morgun.

[corvus corax, 11.4.2011 kl. 15:03]

Maður er eiginlega farinn að vorkenna aumingja bretunum (með litlu b af ásettu ráði) fyrir að vera alltaf minni máttar í viðureign við stórveldið Ísland.

[Jón Flón (IP-tala skráð) 11.4.2011 kl. 15:50]

Já, nýlenduríkið Bretland sér ekki beint bjálkann í eigin auga..

[Þórður Bragason, 11.4.2011 kl. 17:09]

Ég tek þetta umsvifalaust sem hrós og er upp með mér.

[Ásthildur Cesil Þórðardóttir, 11.4.2011 kl. 17:44]

Eigum við ekki að fara að safna peningum fyrir þessar elskur af því þeir eru slíkum órétti beittir af stórveldinu Ísland.