Varðhald seint og um síðir

Loksins virðist vera að komast verulegur skriður á rannsóknir Sérstaks saksóknara á ýmsum svikafléttum og glæpsamlegum aðgerðum eigenda og stjórnenda gamla Landsbankans og voru starfsmenn embættisins uppteknir við húsleitir og yfirheyrslur í gær, frá morgni og fram yfir miðnætti.

Sigurjón Þ. Árnason, fyrrv. bankastjóri, og Ívar Guðjónsson, fyrrv. forstöðumaður eigin fjárfestinga bankans, gistu í boði skattborgaranna og í umsjón fangavarða í nótt og er nú beðið úrskurðar dómara um hvort þeir verði "upp á vatn og brauð" næstu daga, á meðan starfsmenn saksóknara ræða málin nánar við þá og fá þá til að skýra satt og rétt frá athöfnum sínum innan bankans á valdatímum sínum þar á bæ.

Velta má fyrir sér tilgangi gæsluvarðhalds þegar svo langt er liðið frá meintum glæpum, eins og raunin er í þessu máli, en skýringin hlýtur að vera sú, að félagarnir séu ekki samstíga í málflutningi sínum og því þyki ástæða til að halda þeim í einangrun og aðskildum á meðan samræmi fæst í frásögn þeirra af því, sem raunverulega átti sér stað í bankanum og hvað varð um allt það fé sem talið er að hafi verið rænt úr bankanum innanfrá á árunum fyrir hrun. 

Hvað sem segja má um að setja menn í varðhald svo löngu eftir að brot eru framin  er fagnaðarefni að sjá að rannsóknir bankaglæpanna séu í fullum gangi og nú hlýtur að fara að mega reikna með því að fyrstu ákærurnar fari að sjá dagsins ljós og gerendurnir verði látnir svara fyrir sín mál fyrir dómstólunum.

 

Gæsluvarðhaldskrafa tekin fyrir í dag

Athugasemdir

[Guðlaugur Hermannsson, 14.1.2011 kl. 10:24]

Hvar eru handjárnin?

[Sigurður I B Guðmundsson, 14.1.2011 kl. 11:19]

Hvar eru Björgólfarnir?

[Jón Ágúst (IP-tala skráð) 14.1.2011 kl. 13:58]

Ég tel að gæsluvarðhald sé einungis til að þeir sem eru til yfirheyrslu og teljast kannski aðal gerendur beri ekki saman bækur sínar um yfirheyrslurnar á meðan þær standa.

[Axel Jóhann Axelsson, 14.1.2011 kl. 17:02]

Eftir því sem fram hefur komið í fréttum í dag ætlaði sá "sérstaki" að hafa tal af Björgólfi eldra í dag, en hann var þá staddur erlendis, þannig að ekkert varð af yfirheyrslum yfir honum í dag, en sjálfsagt kemur að því síðar. Ekki veit ég hvort Björgólfur Thor verður yfirheyrður varðandi þennan hluta Landsbankamála, þar sem hann var hvorki í stjórn bankans, né starfaði þar.

Gæsluvarðhaldi er beitt, að því að maður best veit, annaðhvort þegar talið er að viðkomandi sakamaður er talinn hættulegur umhverfi sínu, eða vegna rannsóknarhagsmuna og þá væntanlega aðallega til að sakborningar geti ekki borið saman bækur sínar og samhæft framburð.

Í þessu tilfelli hefði maður nú haldið að sakborningarnir væru fyrir löngu búnir að búa til eina sögu, sem allir myndu svo halda sig við. Nógan tímann hafa þeir haft til þess, en væntanlega hefur sá "sérstaki" séð einhverjar veilur í málflutningi þessara tveggja sem ástæða þótti til að setja í gæsluvarðhald. Væntanlega ætlar hann að nota tímann til að samprófa þá og þá líklega einnig við framburð hins bankastjórans, sem væntanlega kemur frá Kanada um helgina.

Hvað sem öðru líður, þá er ánægjulegt að rannsóknir þessara bankamála skuli vera í fullum gangi.

[Finnur Bárðarson, 14.1.2011 kl. 18:41]

Fullkomlega sammála, Axel

[Þráinn Jökull Elísson, 14.1.2011 kl. 20:48]

Ég hef fulla trú á aðgerðum Sérstaks. Tíminn einn leiðir svo í ljós hver árangurinn verður. Þó ég sé ekki manna þolinmóðastur þá verður mér hugsað til orða Evu Joly, þegar óþreyjan sækir á.

[Sigurður I B Guðmundsson, 14.1.2011 kl. 21:57]

Björgólfur Thor var einn aðaleigandi bankans og hlýtur þar af leiðandi að bera ábyrgð á allri starfsemi bankans og hafa vitneskju um stærstu ákvarðanir innan bankans.

[Axel Jóhann Axelsson, 14.1.2011 kl. 22:53]

Án þess að ég ætli að fara að verja Björgólf Thor, verð ég að segja að ég er ekki viss um að það sé nóg til sakfellingar að vera aðaleigandi bankans, því stjórn, bankastjórar og starfsmenn eru nú einu sinni ráðnir til að fara með ábyrgðina á starfsemi bankans og líklega þarf eigandinn að taka beinan og sannanlegan þátt í ákvarðanatökum, eða hagnast sjálfur persónulega á ólöglegu athæfi til þess að hægt sé að ákæara hann.

Annars hlýtur það að koma í ljós síðar, enda málið sem er til skoðunar í dag og þessir gæsluvarðhaldsúrskurðir tengjast, aðeins hluti þeirra mála sem til rannsóknar eru vegna Landsbankans.

Það verður að spyrja að leikslokum.