Jón Bjarnason er góður fjölskyldumaður

Jón Bjarnasons, sjávarútvegs- og landbúnaðarráðherra, skipaði nýlega nefnd til að fara yfir ýmis atriði sem lúta að fiskveiðum og fiskveiðistjórnun og fannst meira en tilvalið að skipa son sinn í nefndina, enda væri hann líffræðingur og vel metinn sem slíkur þar að auki, eins og Jón sagði á Alþingi í vörn sinni fyrir skipun sonarins í nefndina.

Nú boðar Jón skipan nefndar á vegum ríkisstjórnarinnar nr. 151 á síðustu tuttugu mánuðum, og á hún að fjalla um svín, þ.e. svín í svínabúum, líðan þeirra í lifanda lífi og fantalegar geldingar á grísum, þ.e. afkvæmum svína.  Nú vill svo vel til að sonur Jóns er líffræðingur og vel metinn sem slíkur, meira að segja, og því hlýtur hann að vera flestum öðrum mönnum heppilegri til að sitja í þessari svínanefnd og helst að stjórna henni.

Ekki eru tiltækar upplýsingar um fjölskyldu Jóns Bjarnasonar, ættboga eða vinatengsl, svo vel getur verið að í þeim hópi séu meira en nógu margir hæfir einstaklingar til þess að skipa alla nefndina og auðvitað er þægilegast og fljótlegast að þurfa ekkert að fara með svona smámál út fyrir fjölskylduna.

Það er svínslegt fyrir ráðherra að þurfa að sitja undir gagnrýni fyrir að vera góður fjölskyldufaðir.

Jón skipar starfshóp um vandamál svínaræktar

Athugasemdir

[Rafn Haraldur Sigurðsson (IP-tala skráð) 26.11.2010 kl. 12:32]

Já ég skil ekki alveg þetta moldviðri, þó svo að hann sé sonur Jóns. Jón er bara að gera það sem hefur viðgengist í gegnum tíðina og það sem Gnarrinn boðaði, þ.e. að koma ættingjum og vinum í góðar stöður. Þetta er ekkert nýtt og hefur verið stundað lengi og aldrei gert neitt úr þessu fyrr en sonur Davíðs var ráðinn í eitthvert starf fyrir norðan.

[Haukur Gunnarsson, 26.11.2010 kl. 13:01]

Aum afsökun að svona hafi verið gert áður, lofaði þessi velferðastjórn ekki allt öðrum vinnubrögðum m.a. að hætta vinavæðingunni. Þeir sem þekkja til kommana vissu svo sem að það stæðist aldrei.

[Rafn Haraldur Sigurðsson (IP-tala skráð) 26.11.2010 kl. 13:40]

Ég var ekki að afsaka neitt var bara að benda á að sukkið heldur áfram, sama hver er við stjórnvölinn og svo að þjóðin ætti að  vera alveg sátt við þessi vinnubrögð, allavega boðaði Jón Gnarr svona vinnubrögð og var kosinn  þrátt fyrir það. Fólk ríkur upp af smá tilefni útaf því að hann komi syni sínum í gott embætti en kýs svo Gnarrinn sem boðar samskonar vinnubrögð.

[Sveinn Úlfarsson (IP-tala skráð) 26.11.2010 kl. 15:06]

Hefur þú Rafn, einhver dæmi þess að ráðherrar fyrri stjórna hafi skipað börn sín í störf fyrir eigið ráðuneyti.

það heldur því enginn fram að börn ráðherra geti ekki orðið opinberir starfmenn eins og sonur Davíðs sem sótti um dómarastarfið fyrir norðan en var ekki settur í starf í ráðuneyti föður síns.

Ráðherrar eiga bara ekki að skipa börn sín til vinnu fyrir eigin ráðuneyti það er spilling og held ég að í öllum löndum hins siðaða heims yrði slíkur ráðherra knúinn til afsagnar.

[Rafn Haraldur Sigurðsson (IP-tala skráð) 26.11.2010 kl. 16:01]

Ég er bara að benda á að í þjóðfélaginu hefur tíðkast  að koma sínum nánustu í þægileg störf og embætti án þess þó að menn hafi boðað það í kosningabaráttu eins og Jón Gnarr gerði og fékk glimrandi kosningu.

Ég veit ekki hvort að ráðherra hafi skipað börn sín í störf fyrir eigið ráðuneyti, enda skiptir ekki máli hvort hann komi honum fyrir í sínu ráðuneyti eða öðru, skíturinn er bara meira undir teppinu þegar þeir koma þeim fyrir annarsstaðar í krafti stöðu sinnar.

Og svo það fari ekki á milli mála, þá er ég alls ekki hlynntur svona vinnubrögðum enda kaus ég ekki Gnarrinn.