Stórfrétt úr heimspólitíkinni

Wen Jiabao, forsætisráðherra Kína, er í opinberri heimsókn í Suður-Kóreu og hefur þar gefið í skyn að Kína styðji Norður-Kóreu ekki lengur í deilum ríkjanna tveggja á Kóreuskaganum.  Hann hefur ekki afdráttarlaust viljað fordæma Norður-Kóreu fyrir að hafa sökkt herskipi sunnanmanna á umdeildu hafsvæði nýlega, en sagði hins vegar í við komunar til Suður-Kóreu:  „Kína fordæmir allar aðgerðir sem grafa undan friði og stöðugleika á Kóreuskaga."

Kínverjar eru ekki þekktir fyrir neitt flaustur í stjórn lands síns og alls ekki í samskiptum sínum við umheiminn og hafa ekki látið neinn segja sér til verka í þeim efnum, frekar en öðrum.   Þeir hafa verið dyggustu stuðningsmenn Norður-Kóreu og nánast þeir einu, undanfarna áratugi og studdu norðanmenn dyggilega í Kóreustríðinu, sem raunar stendur enn, þar sem Norður-Kórea hefur sagt upp öllum vopnahléssamningum sem gerðir hafa verið, en í raun hefur aldrei verið lýst yfir að stríðinu sjálfu hafi lokið nokkurntíma.

Séu þessi ummæli forsætisráðherra Kína, þó undir rós séu, til marks um að Kína ætli ekki lengur að bakka upp vini sína, fram að þessu,  í Norður-Kóreu, þá er það stórfrétt og einhver merkilegustu tíðindi í heimspólitíkinni í marga áratugi.

Fróðlegt verður að fylgjast með framvindu mála á Kóreuskaganum í framhaldi þessara tíðinda.

Kína stendur með S-Kóreu

Athugasemdir

[Tómas Waagfjörð, 28.5.2010 kl. 14:50]

Ég fer ekki ofan af því að Bandaríkjamenn sökktu þessum kafbát, ástæðan er sú að þeir hafa staðið á bakvið lang flest stríð í heiminum á síðustu öld eins og kemur fram í Secrets of the CIA heimildarmyndinni og hefur komið fram í leyniskjölum.

Vopnasala er arðbær atvinnugrein, en bara ef það eru stríð.

[Axel Jóhann Axelsson, 28.5.2010 kl. 15:03]

Samsæriskenningar eru alltaf skemmtilegar, en það hlýtur nú að þurfa meira en lítið til að Kínverjar sannfærist um að tundurskeytið hafi komið frá Norður-Kóreumönnum.  Ætli þeir hafi ekki kannast við framleiðslunúmerið á gripnum, enda væntanlega framleitt hann sjálfir, því varla selja margir aðrir vopn til norðanmanna á Kóreuskaganum.

[Finnur Bárðarson, 28.5.2010 kl. 16:16]

Sambandið milli Kína og Bandaríkjanna er stöðugt að batna. Held að Kína nenni ekki lengur að standa í stuðningi við þetta stórfurðulega og ríki. Aðrir hagsmundir eru mikilvægari. En eins og þú segir þetta er mekileg yfirlýsing.