Skyldi Sigurður veita saksóknaranum áheyrn?

Samkvæmt fyrirsögn á frétt DV, sem mbl.is vitnar til, mun Ólafur Hauksson, Sérstakur saksóknari, hald til Bretlands í dag, þar sem hann mun freista þess að ná tali af Sigurði Einarssyni, fyrrverandi stjórnarformanni Kaupþings. 

Hvers vegna saksóknarinn gerir sér ferð til útlanda til að freista þess að ná tali af aðila, sem hefur stöðu grunaðs manns í sakamáli, í stað þess að knýja viðkomandi til þess að mæta til yfirheyrslu á skrifstofu embættisins, eins og aðrir þurfa væntanlega að gera, er ekki alveg auðskilið mál. 

Enska rannsóknardeild alvarlegra efnahagsbrota mun vera í samstarfi við embætti Sérstaks saksóknara við rannsóknir "bankaránanna", svo hugsast getur að bæði embættin ætli að vinna saman að yfirheyrslum yfir Sigurði, en sé það ekki raunin, verður það að teljast óvenjuleg ráðstöfun, að saksóknarinn sjálfur skuli skreppa yfir hafið til að spjalla við sakborning.

Vonandi veitir Sigurður saksóknaranum áheyrn og býður jafnvel ferðaþreyttum manninum upp á te. 

VIÐBÓT:

Allt sem að ofan var skrifað er byggt á misskilningi, þar sem fréttin á DV, sem umsögnin var byggð á var tóm lygi, sem er svo sem ekki neitt einsdæmi um það sorprit.  Ólafur Hauksson mun vera á leið til Svíþjóðar, til að sitja fund norrænna saksóknara.  DV þóttist hafa staðfestingu Ólafs á því að hann væri að fara til Bretlands til að yfirheyra Sigurð Einarsson, en allt var þetta uppspuni blaðsins, samanber þessa frétt  hérna

DV: Freistar þess að ræða við Sigurð

Athugasemdir

[Axel Jóhann Hallgrímsson, 10.5.2010 kl. 09:14]

Hvað ætli saksóknari telji sig þurfa að hanga lengi á hurðahúninum hjá Sigga áður en til greina kemur að viðhafa sömu aðferð og við aðra glæpamenn, sem réttvísin þarf að ná tali af?

[Axel Jóhann Axelsson, 10.5.2010 kl. 09:19]

Nafni, það er ekki gott að segja, en ég reikna nú svona frekar með, að ef Ólafur hefði haft eitthvað við mig að tala, þá hefði hann bara sent menn eftir mér, hvort sem ég hefði verið í stuði til að spjalla við hann eða ekki.