Al Capone, Jón Ásgeir, Hannes Smárason og aðrir álíka

Samkvæmt heimildum Viðskiptablaðsins stendur fyrir dyrum að skattrannsóknarstjóri kyrrsetji hundruð milljóna króna virði af "eignum" Jóns Ásgeirs í Bónusi og Hannesar Smárasonar glæpafélaga hans til margra ára.  Á meðal þess sem verið er að rannsaka er rekstrarkosnaður upp á 5,2 milljarða króna á árinu 2007, sem skráður var á FL-group, ef grunur leikur á að hafi í raun verið að stórum hluta eyðslufé þeirra félanna sjálfra, þar á meðal þoturekstur og annar persónulegur lúxus.

Húsleit fór fram hjá FL-Group (sem nú heitir Stoðir) í nóvember árið 2008, sem sýnir hve flóknar og tímafrekar svona rannsóknir eru, en til samanburðar má geta þess að embætti Sérstaks saksóknara tók til starfa 1. febrúar 2009, þannig að það hefur aðeins starfað í rúmt ár, en er nú að drukkna í málum, sem þar eru nú þegar til rannsóknar.  Miðað við fyrri reynslu munu því líða mörg ár þangað til niðurstaðna er að vænta úr stærstu málunum, sem þar eru til rannsóknar.

Því hefur nokkrum sinnum verið slengt fram á þessu bloggi, að líklega færi fyrir helstu banka- og útrásarglæpamönnunum eins og Al Capone forðum, en yfirvöldum tókst aldrei að sanna á hann þátttöku í glæpaverkum, þrátt fyrir að allir vissu að hann væri stjórnandi þeirra, heldur fór svo að það voru skattsvik, sem komu honum bak við lás og slá, þar sem hann lést síðar af sárasótt.

Vonandi verða þessar aðgerðir skattrannsóknarstjóra aðeins fyrstu raunverulegu aðgerðirnar gegn þeim glæpamönnum sem rændu öllu steini léttara út úr þjóðfélaginu á síðustu árum og skildu það eftir í rjúkandi rúst.

 

Eignir Jóns Ásgeir og Hannesar kyrrsettar

Athugasemdir

[Birgir Viðar Halldórsson, 21.4.2010 kl. 08:49]

Æ - æ...

[Ragnar Gunnlaugsson, 21.4.2010 kl. 09:45]

Loksins loksins.

[Þorgeir Ragnarsson (IP-tala skráð) 21.4.2010 kl. 10:11]

Hvernig væri nú að vera ekki að tilkynna um svona aðgerðir fyrr en þær eru frágengnar?

[Axel Jóhann Axelsson, 21.4.2010 kl. 10:45]

Þorgeir, það er alveg rétt, að þessar fyrirframtilkynningar um kyrrsetningu eigna eru dálítið einkennilegar.  Skattrannsóknarstjóri hefur tilkynnt að fjöldi kyrrsetninga muni fara fram á næstu vikum og mánuðum, fyrst til að byrja með hjá fólki sem liggur undir grun um að hafa stungið 50 milljónum, eða meira, undan skatti og síðar vegna upphæða allt að 5 milljónum.

Hver halda menn að viðbrögð þeirra, sem vita upp á sig skattsvik verði við svona tilkynningum?  Auðvitað munu þeir reyna allar leiðir til að koma eignum undan, sérstaklega munu allir peningar hverfa af bankareikningum, en þá er hægt að geyma hvar sem er, t.d. bara undir koddanum, ef ekki vill betur til.

[Ásdís Sigurðardóttir, 21.4.2010 kl. 12:20]

[Hrólfur Þ Hraundal, 21.4.2010 kl. 13:51]

Það er búið að tala um að kyrrsetja eignir þessara manna mánuðum saman, en þá hefur ekkert gerst.  Þegar það er boðað að nú allt í einu eigi að taka til höndunum í þessu efni þá er ekkert óeðlilegt við það að tortryggni gæti. 

Íslenska réttarkerfið hefur ekki gefið tilefni til bjartsýni þar sem um það er að ræða að taka á svona fólki.  Það hefur sýnt sig að það er skapað til að taka á vesalingum og fólki sem vegna mistaka og þekkingarleysis gefur rangt fram tekjur eða eignir. 

Alvöru menn í þessu efni hafa alltaf sloppið billega.  Þess veggana er full ástæða til að vekja athygli á orðum stjórnvalda, því þeim ber öðrum fremur að standa við orð sín.  þakka þér fyrir Axel Jóhann.