Góðkunningjar Sérstaks saksóknara?

Síbrotamenn, þ.e. venjulegir afbrotamenn, hafa í gegnum tíðina verið kallaðir "góðkunningjar lögreglunnar", en með nýjum og breyttum tímum verður væntanlega farið að tala um "góðkunningja Sérstaks saksóknara" og "góðkunningja Efnahagsbrotadeildar", að ekki sé minnst á "góðkunningja skattrannsóknarstjóra".

Fjórir af fyrrum stjórnarmönnum 365 hf. flokkast líklega í hóp góðkunningja allra þessara aðila, en þeir eru Jón Ásgeir í Bónus, Pálmi Haraldsson í Iceland Express, Þorsteinn M. Jónsson og Magnús Ármann.  Fimmti stjórnarmaðurinn sagði sig úr stjórninni, vegna andstöðu við vafasama fjármálagerninga fjórmenninganna og fellur ekki í góðkunningjahópinn, en það er Árni Hauksson.

Landsvaki hyggst kæra þessa stjórnarmenn og gera þá persónulega ábyrga fyrir að skjóta eignum undan þrotabúi 365 hf., en fjórmenningarnir komu öllum fjölmiðlahluta félagsins í hendur Jóni Ásgeiri í Bónus, en skildu skuldirnar eftir í gamla félaginu, sem nú er gjaldþrota.

Þetta er sami leikur og þessir menn hafa leikið hvað eftir annað, í þeim félögum, sem þeir hafa komið nálægt og verði þeir kærðir fyrir aðferðir sínar í einu félagi, má gera ráð fyrir raðréttarhöldum yfir þeim vegna samskonar mála.

Arion Banki er um þessar mundir að hjálpa Jóni Ásgeiri í Bónus og meðreiðarsveinum hans, að losa sig við skuldir 1998 ehf. með nýstárlegri aðferð, þ.e. að gefa eftir skuldir í einu félagi, en gefa Baugsveldinu kost á að kaupa Haga hf., með þeim peningum, sem annars hefðu átt að ganga til greiðslu á skuldunum.

Vegir fjármálakerfisins eru órannsakanlegir, en Sérstakur saksóknari og Eva Joly reyna þó.

Stjórn 365 gæti borið ábyrgð