Nýta skal öll bifreiðagjöld og -skatta til þess sem upphaflega var ætlað

Jón Gunnarsson, samgöngu- og sveitarstjórnarráðherra, hefur tekið upp afturgengnar hugmyndir um vegatolla á þá bifreiðaeigendur sem álpast munu út fyrir borgarmörk Reykjavíkur í framtíðinni.

Þessi hugmynd virðist vera draugur sem gengur um í Samgönguráðuneytinu, því hann komst á kreik í tíð hinnar einu sönnu vinstri stjórnar þegar draugurinn tók sér bólfestu í þáverandi ráðherra málaflokksins, Kristjáni Möller, en var þá kveðinn niður með áköfum og eindregnum mótmælum þjóðarinnar.

Það verður að teljast furðulegt að ráðherra Sjálfstæðisflokksins skuli ekki berjast með kjafti og klóm við svona skattadrauga úr ráðuneytinu, þar sem flokkurinn hefur frekar kennt sig við hóflegar skattaálögur en skattahækkanir og hvað þá stuðning við afturgönguskatta, sem alltaf hafa tilhneygingu til að blása út og verða ógnvænlegri séu þeir ekki kveðnir niður strax í upphafi.

Nær væri fyrir ráðherrann að berjast fyrir því á þingi og í ríkisstjórn að núverandi bifreiðaskattar og önnur gjöld sem lögð eru á bíleigendur skili sér til vegagerðar, en séu ekki notuð til annarra þarfa samneyslunnar.

Tækist ráðherranum að vinna að því máli til réttrar niðurstöðu myndi hann bæði slá sjálfan sig til riddara og ekki síður yrði hans minnst fyrir að koma vegakerfi landsins í glæsilegt horf.

Til þess þarf ekki nýja skatta, aðeins að nýta þá sem fyrir eru til þess sem þeir voru á lagðir upphaflega.

Rætt um vegtolla