Árni Páll talar aldrei í alvöru

Þegar Árni Páll, félagsmálaráðherralíki, tilkynnti að öll íbúðalán yrðu flutt frá bönkunum til Íbúðalánasjóðs, sagði hann að tillögur þar að lútandi myndu verða kynntar síðar þann sama dag, daginn eftir, eða að minnsta kosti fyrir helgi.

Það er reyndar fastur frasi frá allri ríkisstjórnarnefnunni, nánast í hvert einasta skipti, sem eitthvert málefni kemur til umræðu og snertir það, sem ríkisstjórnardruslan ætti að vera að gera, en gerir aldrei.

Hvað Árna Pál snertir sérstaklega, þá hefur aldrei dottið út úr honum vitræn setning, ekki einu sinni óvart.

Enda skiptir það ekki máli, engum myndi detta í hug að taka mark á honum hvort sem er.

Aldrei rætt í alvöru

Svör ríkisstjórnar koma í dag eða á morgun eða hinn daginn

Ríkisstjórnin hefur aldrei svör á reiðum höndum um nokkurn skapaðan hlut, heldur er alltaf sagt að eitthvað muni gerast seinna í dag, á morgun eða í síðasta lagi fyrir næstu helgi.  Þetta hafa menn þurft að hlust á allt þetta ár, t.d. varðandi niðurstöðu í Icesavemálinu.

Á fundi með aðilum vinnumarkaðarins vegna stöðugleikasáttmálans, hafði ríkisstjórnin engar lausnir í farteskinu, en gaf það út að hún myndi líklega kynna sína afstöðu í kvöld, á morgun eða bara einhvern tíma seinna.

Þjóðin er löngu orðin hundleið á ráðaleysi þessa ríkisstjórnarlíkis og ráðherranefnanna, sem í því sitja.  Allir eru líka dauðleiðir á þeim svörum, að eitthvað muni gerast í kvöld, á morgun eða seinna.

Það þarf lausnir núna.  Ekki á morgun eða hinn.

Lágmarkskrafa er að ríkisstjórnarlíkið hætti að flækjast fyrir atvinnuuppbyggingu og baráttu gegn atvinnuleysinu og kreppunni.

Nóg er að þessi ríkisstjórnarhörmung svíki þjóðina með Icesaveþrældómi, þó hún vinni ekki öllum árum að því að gera kreppuna sársaukafyllri, lengri og dýpri, en hún annars hefði orðið.

„Þetta mjakast áfram“

Blaðamaður á eftir tímanum

Áður fyrr var klukkunni breytt tvisvar á ári hérlendis, þ.e. klukkunni var breytt um eina klukkustund eftir vetrar- eða sumartíma.  Þessu er löngu hætt hérlendis, en er enn við lýði annarsstaðar í heiminum.

Hins vegar er þetta svolítið ruglingslegt og fólk ekki alltaf með það á hreinu, hvað klukkan er á hverjum stað og ekki bætir úr skák, þegar klukkan er færð fram og aftur eftir árstíma.  Á miðnætti s.l. var klukkan færð aftur um eina klukkustund í Evrópu, þegar vetrartími tók þar gildi.  Þetta ruglaði blaðamann mbl.is. í ríminu, eins og sést af þessu:  "Það þýðir, að klukkan er nú það sama á Íslandi og á Bretlandseyjum og einum klukkutíma á eftir íslenska tímanum í Danmörku, Svíþjóð og Noregi.

Þarna er blaðamaðurinn ekki alveg með tímaskinið í lagi, því í Danmörku, Svíþjóð og Noregi er klukkan einum klukkutíma á undan íslenska tímanum en ekki á eftir.  Til að glöggva sig á hvað tímanum líður, vítt og breitt um veröldina, má t.d. skoða þessa síðu, sem sýnir hvað klukkan er á hinum ýmsu stöðum.

Ekki er vert að rugla fólk meira í ríminu með hvað tímanum líður á hverjum stað, en tímaflakkararnir bjóða sjálfir upp á.

Vetrartími í Evrópu